Read Toraja-Sa'dan MATIUS 20 Bible Online

MATIUS 20 - Toraja-Sa'dan bible

MATIUS 20

¹Belanna iatu Parenta Suruga susi to makaka, tu tae’pa bongi nasun la urra’ta’ sarona tu to la mengkarang lan pa’lak anggoro’na.

²Iatonna sipatumo to sumaro misa’ dinara’ sangallo, nasuami tu tau tama pa’lakna.

³Sunmi tonna agi-agi tette’ kasera melambi’, nakita pole’omi tu to senga’ be’dang-be’dang punala bang lan pasa’.

⁴Nakuami ungkuanni tinde tau: Lao dukakomi inde tu tama pa’lak anggoro’, padami sipatunna padami kubenkomi. Malemi tinde tau.

⁵Sun pole’omi tinde tau tonna agi-agi tette’ sangpulo dua, sia tette’ tallu, anna pogau’ dukai susito.

⁶Iatonna sae pole’omo tinde tau agi-agi tette’ lima makaroen, nakabu’tui pole’omi tu to senga’ be’dang-be’dang bang, nakuami ungkuanni: Ma’apari ammi be’dang punala bangra indete tu’tu’na allo?

⁷Nakuami tinde tau lako: Belanna tae’ bang tau ussarokan. Nakuami lako: Male dukakomi inde tu tama pa’lak anggoro’.

⁸Iatonna bongimo nakuami tu puangna tinde pa’lak anggoro’ lako bandoro’na: Tambaimi tu to mengkarang, benni tu sarona, randuk dio mai tu undi’-undi’na tama sae lako dolo’-dolo’na.

⁹Iatonna sae tu to sitette’ lima makaroen namane tama, natarimami simisa’ dinara’ namisa’i.

¹⁰Iatonna sae tu dolo’-dolo’na tama, nasangami la losong natarima; apa simisa’ duka bangsiari dinara’ natarima ke misa’i.

¹¹Tonna tarimai, sipa’nuku-nuku- ammi tu tau iato lako tinde to makaka, nakua:

¹²Iatu to undi’-undi’na tama sangdiangmora ia mengkarang, ammi papada bangkanni kami tu situ’turanna allo mara’tak sia natumbui allo.

¹³Apa nakua mebali lako misa’na: E sangmane, tae’ nasala tu kupogau’ lako kalemu, tang misa’raka dinara’ tasipatui?

¹⁴Alami tu taamu, ammu male; iate to undi’-undi’na inaangku aku umbenni pada tu kubenko.

¹⁵Tang sipatura’ka la ma’inaanna kalena umpamalei tu apangku? Ba’tu musuru mataraka, tu belanna aku te masokanna’?

¹⁶Tenmoto tu to undi’-undi’na la mendadi dolo’-dolo’na, sia to dolo’-dolo’na la mendadi undi’-undi’na.

¹⁷Iatonna la male langngan Yerusalem tu Yesu, Napopa’misami tu anak gurunNa sangpulo dua Nasolan, Nama’kada lako dio tangnga lalan, Nakua:

¹⁸La maleki’ langngan Yerusalem, sia la disorong tu Anak rampan dilino lako pangulu to minaa sia pandita Sura’, anna situru’i kumua la dipatei.

¹⁹Anna sorongi lako to kapere’, natelle-tellei, naongkan-ongkan ue, sia naa’ta’, na allo ma’pentallun Namalimbangun sule.

²⁰Tonna iato saemi lako Kalena tu indo’na anakna Zebedeus sola tu anakna sola duai, natukku umparampo palakunna lako.

²¹Nakuami Yesu lako: Apara mitungkanan? Nakuami lako: Eloranni tu anakku sola duai ammi paunno’ko’ dioi kananMi misa’ na dio kairimMi misa’ lan ParentaMi.

²²Mebalimi Yesu sia Nakua: Tae’ mitandai tu apa mipalaku. Ma’dinraka la miiru’ tu la Kuiru’na lan mai irusan? Nakuami lako: Ma’din.

²³Nakuami lako tau iato: Tonganna iatu Kuiru’na lan mai irusan la miiru’ duka, apa iatu unno’ko’ dio kananKu sia dio kairingKu, tangia Aku ma’lalan inaanNa la umpa’benganni, sangadinna la Napa’bengan Ambe’Ku lako tu to inang Naparandanammo.

²⁴Iatonna rangi tinde sangpulona tu iannato, saemi kasengkeanna lako sola duai tu to massiulu’.

²⁵Apa Natambai nasang Yesu tu anak gurunNa, Nakua: Miissan sia kumua iatu to disanga pangulunna mintu’ bangsana tau, umpalalo parentana lako tau iato mai, sia iatu to paana ungkuasai.

²⁶Apa iatu kamu tae’ misusito, sangadinna minda-mindammi tu la morai madaoan, sipatu mendadi to ma’parakami;

²⁷sia minda-mindammi tu la morai pangulu, sipatu la mendadi kaunanmi sola nasang.

²⁸Susi Anak rampan dilino tae’ Nasae kumua Nadikamayai, sangadinna kumua anNa ma’kamayai sia ussorong penaanNa la napopela’bak buda tau.

²⁹Iatonna malemo sun lan mai Yerikho, lendu’mi budanna tau undi urrundu’I.

³⁰Denmi to buta da’dua unno’ko’ dio biring lalan; iatonna rangi kumua lendu’ tu Yesu, metamba-tambami sola duai, nakua: O Puang, o Anakna Daud, kamaseikan dikka’!

³¹Nasarabaimi to buda, nasua ma’loko-loko, apa samandu-mandunnaora metamba sola duai, nakua: O Puang, o Anakna Daud, kamaseikan dikka’!

³²Tadangmi tu Yesu, sia Natambai sola duai, Namane kumua: Apara tu mikamorai la Kupogau’ lako kalemi?

³³Nakuami tinde tau lako: O Puang, elo’namo ke pakita dukakan.

³⁴Massemi penaanNa Yesu untiroi tinde tau, Nakaka’i tu matanna: ta’pa pakitami, naundi urrundu’I.