Read Toraja-Sa'dan MATIUS 21 Bible Online

MATIUS 21 - Toraja-Sa'dan bible

MATIUS 21

¹Iatonna mandappi’mo lako Yerusalem tonna rampomo lako Betfage, dio buntu Zaitun, Nasuami Yesu tu anak gurunNa da’dua,

²sia Nakua ungkuanni: Malekomi lako tu tondok misipatuan, ammi ta’pa unnappa’ misa’ keledai disangkin sola anakna; bukai tu ulangna ammi banNa’ dio mai.

³Iake den tau umpa’kadaikomi, la mikua: den la Napapatuanni Puang, madomi’ bang sia la Napasule.

⁴Mintu’nate iannate dadi nasangmo, kumua anna sundun tu kadanna nabi, tu nakua:

⁵Pokadanni anak dara Sion, kumua: Tiromi tu Datummu sae lako kalemu, umpamadiongan penaanNa, ussakei keledai, keledai lundara, anak patuoan dipassampei.

⁶Malemi tinde anak gurunNa, napogau’i susitu Napepasananna Yesu lako.

⁷Nabaami tu keledai sola anakna nalapikki pakeanna tinde tau, Naunno’ko’ dao tu Yesu.

⁸Anna buda tau umballa’ pakeanna lako lalan sia den pole’o pira ussembang tangke-tangke kayu, naampa’i lako lalan.

⁹Iatu to buda, tu dolona dio tingayoNa sia undinna unturu’I, unnarrak-arrak, nakua: Hosanna tu Anakna Daud, Kurre sumanga’Na tu saeNa umpotete sanganNa Puang, Hosanna dao masuanggana.

¹⁰Iatonna tamamo Yerusalem, marambami tu mintu’ tau lan tondok iato, nakua: Mindamora te?

¹¹Nakuami tu to buda: Iamo nabi tu, Yesu to dio mai Nazaret dio tana Galilea.

¹²Malemi tu Yesu tama to’ Banua Kabusungan, Narambai tu mintu’ to ma’baluk sia to mangalli lan to’ Banua Kabusungan. Nabalittua’i tu mai medana to ussapi’ doi’ sia o’koranna to ma’baluk bu’ku’;

¹³sia Nakua ungkuanni tu tau: Mangkamo disura’ kumua: Iatu banuangKu la disanga banua passambayangan; apa mipadadimo kamu lo’ko’ pa’gora’.

¹⁴Saemi lako Kalena lan Banua Kabu- sungan tu to buta sia to kupi’, Napa- mondoi.

¹⁵Apa iatonna tiroi pangulu-pangulu to minaa sia pandita Sura’ tu mintu’ penggauran memangnganNa, sia iatu mintu’ pia unnarrak-arrak lan Banua Kabusungan kumua: Hosanna tu Anakna Daud, sengkemi tinde tau,

¹⁶sia nakua lako Yesu: Mirangiraka tu kadanna te pia? Nakuami Yesu lako tinde tau: Kurangi tongan ia; apa tae’paraka mibasa lenni tu nakua: Dio mai pudukna pia’-pia’ sia pia’-pia’ ma’susupa inang Miparandanmo tu pa’pudi-pudian?

¹⁷Natampemi tu tau, Nasun lan mai tondok male lako Betania, Nama’bongi dio.

¹⁸Iatonna masiang to, tae’pa bongi, tonna sule lako tondok iato, ussa’dingmi tangdia’.

¹⁹Iatonna kitami tu ara sangto’ dio biring lalan, laomi lako, natae’ bang apa misa’ duka Nakabu’tui dio kayu iato, sangadi daunna manna. Nakuami ungkuanni: Damo mumembua len sae lakona! Ta’pa malayu bangsiami tinde kayu ara.

²⁰Iatonna kitai anak gurunNa tu iannato, mangngami sia nakua: Umba ia nakua nata’pa malayu bang tinde kayu ara?

²¹Mebalimi Yesu sia Nakua lako tau iato mai: Tonganna tongan Kukua lako kalemi, iake denni kapatonganammi sia tae’ mibata-bata, tae’ nasusinna manna te dipogau’ lako kayu ara ma’din mipogau’ sangadinna iake mikua ungkuanni te buntu: Tiangka’ko ammu tipembuang rokko tasik, tae’ natang dadi.

²²Sia apa-apa mipalaku lan passambayangmi, ke mikatappa’i, manassa miappa’.

²³Iatonna male tu Yesu tama to’ Banua Kabusungan, marassanmo unnada’i tau, saemi lako Kalena tu mai pangulu-pangulu tominaa sia pekaamberan, nakua: Kuasa apara Mipokuasa umpogau’i tu mintu’na te sia mindara umpakuasaKomi susite?

²⁴Mebalimi Yesu sia Nakua lako tinde tau: Aku den duka misa’ la Kupekutanan lako kalemi. Iake miissanni umpokadanNa’ inang la Kupokadan dukakomi ia, kumua kuasa apara Kupokuasa umpogau’i tu mintu’nate.

²⁵Iatu pa’dioranna Yohanes, umbara nanii sae? Lu daoraka mai suruga, ba’tu lu dioraka mai tolino? Nasitangnga’-tangnga’i kalenami tinde tau nakua: Iake la takua, lu dao mai suruga, inang la Nakua: nama’apai anna tae’ mipatonganni?

²⁶Na iake la takua: lu dio mai tolino, mataku’oki’ lako to buda, belanna mintu’i ussangai nabi tu Yohanes.

²⁷Mebalimi lako Yesu, nakua: Tae’ kami kiissanni. Nakuami Yesu lako tinde tau: Iake susito tae’ duka Kumorai umpokadangkomi, kuasa apara Kupokuasa umpogau’i tu mintu’nate.

²⁸Apa tumbara tu tangnga’mi? Den misa’ tau da’dua anakna muane. Laomi lako pa’bunga’na nakua: E anakku, laoko te allo iate mengkarang tama pa’lak anggoro’ iate.

²⁹Mebalimi nakua: Io ambe’, apa tae’ nalao.

³⁰Namane lao lako ma’penduanna nama’kada susi dukato. Mebalimi nakua: Manokana’ aku, apa undinna menassanmi, nalao.

³¹Mindannara tinde pia sola duai tu umpogau’ pa’poraianna ambe’na? Nakuami tinde tau: Iamo ia tu undinna. Nakuami Yesu lako tinde tau: Tonganna tongan Kukua mati’, kumua moi passima sia baine sala’kedo nadoloi dukakomi tama ParentaNa Puang Matua.

³²Belanna saemo tu Yohanes lako kalemi umpadulluangkomi lalan kamaloloan, anna tae’ mipatonganni. Apa napatonganmo ia passima sia baine sala’ kedo. Tonganna iate kamu te mitiromo tu iannato, apa tae’ duka mimengkatoba’ undinna, ammi patonganni.

³³Perangiimi tu pa’pasusian senga’ misa’: Den misa’ to makaka mantanan anggoro’, narompoi tiku lao, nabo’bokki tu pa’parran anggoro’, sia napabendan tu barung malangka’ misa’, napa’petesananni lako to ma’tesan, nake’de’ lako tondok senga’.

³⁴Iatonna la peanggorosammo, nasuami tu kaunanna lako tu to ma’tesan la unnalai tu buanna.

³⁵Nala’ka’imi tinde to ma’tesan tu mai kaunanna, misa’ nalonga’, misa’ napatei, na iatu misa’ natumbui batu.

³⁶Nasua pole’omi tu kaunan senga’na, losong pole’o na iatu dolona; apa napasusi siao tu dolona.

³⁷Ma’katampakanna anakna muanemi nasua lako tinde tau, nakua: Tae’ natang ungkasiri’ siami te anakku.

³⁸Apa iatonna tiroi tinde to ma’tesan tu anakna, sipa’kada-kadami, nakua: Indemo tu la umpoapai; maikomi tapatei, tapoapai tu apanna.

³⁹Nala’ka’imi napembuanganni lan mai pa’lak anggoro’ lako salian, napatei.

⁴⁰Iake saei tu puangna pa’lak anggoro’, la napatumbai tinde to ma’tesan?

⁴¹Nakuami tu tau lako: La napasikita tongan mapaina’ tinde to kadake anna patei, sia iatu pa’lak anggoro’ napa’petesanan pole’ lako to ma’tesan senga’, tu to la ussorong nenne’i tu buanna lako ke peanggorosanomi.

⁴²Nakuami Yesu lako: Tae’paraka mibasa lenni lan Sura’ madatu kumua: Iatu batu natibe pande, ia bangsiamo mendadi batu petau. Susimoto Napogau’ Puang, na iatu iannato memangngan ke pentirota.

⁴³Iamoto Kukua mati’, kumua iatu ParentaNa Puang Matua la diala dio mai kalemi, anna disorong lako bangsa la umpabu’tui tu buanna.

⁴⁴(Minda-minda tobang rokko batu iato la ru’puk; apa minda-minda nai’pinni batu iato, la manisak.)

⁴⁵Iatonna rangii pangulu-pangulu to minaa sia to Farisi tu pa’pasusianNa, naissanmi kumua gau’na Naparuai.

⁴⁶Undaka’mi lalan la morai untingkanNi, apa mataku’ lako to buda, belanna nabilang nabi to buda tu Yesu.