Read Toraja-Sa'dan MATIUS 22 Bible Online

MATIUS 22 - Toraja-Sa'dan bible

MATIUS 22

¹Mebalimi lako tau iato mai tu Yesu sia ma’kada umpokadan pole’i pa’pasusian, Nakua:

²Iatu Parenta Suruga dipasusi misa’ datu umpogau’ pa’maruasan umpopa’kapa’ anakna.

³Nasuami tu mai kaunanna umpokadanni tu to ditambai tama pa’maruasan iato, apa manoka tu mai tau sae.

⁴Nasua pole’omi tu kaunan senga’na, nakua: Pokadanni tu to ditambai kumua: suka’-suka’i, kupasakka’mo tu pa’maruasangku, mangkamo kutunu tu mai tedongku sia patuoan maloppokku, sia sakka’ nasangmo; maimokomi umpellindoi te pa’maruasan rampanan kapa’.

⁵Apa napasalai duka penaa tau sia male, den lu lako pa’lakna, den lu lako pa’balilinna.

⁶Ia tu tau pira nala’ka’i tu mai kaunanna, napakario-rioi sia napatei.

⁷Sengkemi tinde datu, nasuai tu surodadunna ummangsanni tu mintu’ to papatean sia umballai tu kotana.

⁸Nakuami lako kaunanna: Tonganna sakka’mo tu pa’maruasan rampanan kapa’, apa to ditambaimira tu tang sipatu.

⁹Iamoto malekomi lako to’ kasitammuan batatta, na padami tau misitammuan, padami mitambai tama, te pa’maruasan rampanan kapa’.

¹⁰Sunmi tinde kaunan dio lu to’ batatta, narampunni tu mintu’nato nasitammuan, nala to bulituk nala to malolo. Naponnoimi to unno’ko’ kumande tu inan pa’maruasan rampanan kapa’.

¹¹Tamami tinde datu la untiroi tu to unno’ko’ kumande nakitai tu tau misa’ lan tang umpake pakean pa’maruasan rampanan kapa’.

¹²Nakuami ungkuanni: E sangmane, ma’apai mutama dio mai tang umpake pakean pa’maruasan rampanan kapa’? Kabelle-bellemi tinde tau.

¹³Nakuami tu datu lako solana: Pungoi tu lentekna sia limanna, mipembuanganni lako kalillinanna dio salian; indemoto nanii katumangiran sia kasisangeran isi.

¹⁴Belanna buda tu tau ditambai, apa sidi’ri tu dipilei.

¹⁵Tonna iato malemi tu to Farisi sipakulu-kulu umba la nakua umpoya kadai tu Yesu.

¹⁶Anak gurunna kalenami nasua sola to Herodian lao umpokadai kumua: O Guru, kiissan kumua Kamumo misa’ to malolo, sia lalanna tongan bang Puang Matua Mipa’pangadaran, sia tae’ tau Milaenan moi misa’ duka, belanna tae’ Mimentiro lindo lako tau.

¹⁷Iamoto pokadangkanni, umbara Misanga? Sipaturaka disorong tu sima lako datu kapua, tae’raka?

¹⁸Apa belanna Natandai Yesu tu tangnga’ kadakena, Nakuami: E to belo puduk, ma’apai ammi toba-tobaNa’?

¹⁹PakitanNa’ tu doi’ diposima. Nabammi lako tu dinara’ misa’.

²⁰Nakuami Yesu lako tinde tau: Mindara rupa te sia mindara passura’ te?

²¹Nakuami tu tau mebali: Datu. Nakuami Yesu lako tau iato: Iamoto dadi pennoloanni lako datu kapua tu apanna datu kapua, sia lako Puang Matua tu apanNa Puang Matua.

²²Iatonna rangii tu iannato, mangngami tinde tau, namale umboko’i.

²³Iatonna allo ia bangsiato, saemi ba’tu pira-pira to Saduki lako Kalena tu umpokadai kumua: tae’ tu katuoan sule, anna mekutana lako, nakua:

²⁴O Guru, naannangki’ Musa kumua, iake denni tau mate, anna tae’ nakeanak, siulu’na la umpobainei tu bainena anna pabu’tuanni bati’ tu siulu’na.

²⁵Denmo solaki pitui muane massiulu’; kebainemi tu pa’bunga’na anna mate; na belanna tae’ nakeanak, natampeammi siulu’na tu bainena.

²⁶Susi dukato tu ma’penduanna sia ma’pentallunna sae lako ma’pempitunna.

²⁷Undinnato mate dukami tinde baine.

²⁸Dadi iake allo katuoan sule to, umbannamo tinde tau sola pitui la umpobainei? Belanna mangka nasangmo umpobainei.

²⁹Mebalimi Yesu sia Nakua lako tau iato: Pusakomi, belanna tae’ mitandai la lanna Sura’ madatu la kuasanNa Puang Matua.

³⁰Belanna iake allo katuoan sule, tae’mo tau kebaine sia tae’ tau dipakemuane, sangadinna susi bangmo malaeka’ dao suruga.

³¹Apa iatu diona katuoanna to mate sule, tae’paraka mibasai tu NapokadanNa Puang Matua lako kalemi, kumua:

³²Akumote tu Puangna Abraham, sia Puangna Ishak, sia Puangna Yakub? Iatu Puang Matua tangia Puangna to mate, sangadinna to tuo.

³³Iatonna rangii to buda tu iannato, lendu’mi napomangngana tu pangadaranNa.

³⁴Iatonna rangii to Farisi tu diona Yesu umpo’don to Saduki, sirampunmi.

³⁵Denmi misa’i tinde tau, misa’ pandita Sukaran aluk ungkutanai Yesu la morai untobal, nakua:

³⁶O guru, umbannara tu ma’indo’na parentaNa Puang Matua lan Sukaran aluk?

³⁷Nakuami Yesu lako: La ponno penaammu sia mintu’ tangnga’mu sae lako deatammu la ungkamali’ Puang Kapenombammu.

³⁸Iamote tu ma’indo’na sia garonto’na parenta.

³⁹Na iatu ma’penduanna tu sama bangsiato, iamotu nakua: La mukamasei tu padammu tolino susi batang kelemu.

⁴⁰Iamote parenta iate da’dua napenggaronto’i mintu’ Sukaran aluk sia sura’na mintu’ nabi.

⁴¹Iatonna sirampun tu to Farisi, mekutanami Yesu lako, Nakua:

⁴²Tumbara tangnga’mi tu diona Kristus? Mindara Anak? Nakuami mebali lako: Anakna Daud.

⁴³Nakuami Yesu lako tinde tau: Iake susito, umba nakua anna Daud kalena mekapuang lako, belanna pa’patudu-tudunNa Penaa Masallo’, nakua:

⁴⁴Nakuamo Puang lako Puangku: unno’ko’Ko dio kananKu, sae lako Kupadiongna nasang to’ lentekMu tu ualimMu?

⁴⁵Iamoto iake Daud kalena umpekapuangi, umba nakua nala Ia pole’o napoanak?

⁴⁶Tae’ bangmi tau misa’ umpebalii moi sangbuku duka kada, anna randuk duka tonna allo iato natae’ bangmo tau misa’ barani mekutana len lako.