Read Toraja-Sa'dan MATIUS 23 Bible Online

MATIUS 23 - Toraja-Sa'dan bible

MATIUS 23

¹Tonna iato ma’kadami tu Yesu lako to buda sia lako anak gurunNa, Nakua:

²Iatu pandita Sura’ sia to Farisi unnisungi isunganna Musa.

³Iamoto, dadi la mipogau’ sia la mituru’ tu mintu’ apa napokadangkomi; apa iatu penggauranna da mipeolai, belanna iatu tau iatu mati’ napokada-kada manna, apa tae’ napogau’i.

⁴Naarra’i tu pamaan magasa sia maparri’ dilemba, anna papassanni tu tau, apa ia kalena moi rakka’na manna tae’ namorai urrumbui.

⁵Napogau’ bang tu mintu’ penggauranna kumua nakitai tau; napekalua’i tu beke’ napake massambayang sia napekalandoi tu rombe-rombe sambu’na.

⁶Sia naporai unno’ko’ dio inan madaoan lan pa’maruasan sia kao’koran mala’bi’ lan banua pa’kombongan,

⁷sia naporai dipekatabe’i dio lu pasa’, sia naporai nasanga tau Rabi.

⁸Apa iatu kamu da nasangaikomi tau Rabi: Belanna Misa’ri tu Gurummi, na iatu kamu sola nasang siulu’komi.

⁹Sia da naden tau misa’ misanga ambe’ lan te lino, belanna Misa’ri tu Ambe’mi, Iamotu dao suruga.

¹⁰Sia da nasangakomi tau panglalan, belanna Misa’ri tu Panglalanmi, Iamotu Kristus.

¹¹Apa iatu madaoanna tu kamu sola nasang, la mendadi to ma’parakami.

¹²Minda-minda umpamadaoan kalena, iamo la dipamadiongan; sia minda-minda umpamadiongan kalena, iamo la dipamadaoan.

¹³Upu’ allomi, e pandita Sura’ sia to Farisi, to belo puduk! belanna mitutu’ tu ba’ba Parenta Suruga miampangi tu tau. Kamu tang tama, na iatu to la morai tama migagai.

¹⁴(Upu’ allomi, e pandita Sura’ sia to Farisi, to belo puduk, belanna miimbakan tu iananna baine balu, ammi angga’-angga’i umpamalambe’ passambayangmi; iamoto mandu la naruakomi tampak ropu.)

¹⁵Upu’ allomi, e pandita Sura’ sia to Farisi, to belo puduk! Belanna lumilingkomi diong tasik sia dao gantanan la umpasada’ misa’ poso tau tama aluk; na ianna tamamo mipopentonarakami penduan manglokkon anna kamu.

¹⁶Upu’ allomi, e panglalan buta, tu ma’kada kumua: Minda-minda umposumpai tu Banua Kabusungan, tae’ namatumba; apa minda-minda, umposumpai tu bulaan lan Banua Kabusungan, tae’mo natilendok.

¹⁷E to baga sia buta! Umbara la ondong: bulaanraka ba’tu banua kabusunganraka tu umpamadatunna bulaan?

¹⁸Sia mikua: Minda-minda tu umposumpa inan pemala’, tae’ namatumba; apa minda-minda umposumpai tu pemala’ dao inan pemala’, tae’mo nala tilendok.

¹⁹E to buta, umbara la ondong: pemala’raka ba’tu inan pemala’raka, tu umpamadatui tu pemala’?

²⁰Iamoto, minda-minda tu umposumpa inan pemala’, ia bangsiamo umposumpai tu inan pemala’ sia ia duka tu mintu’ apa dao.

²¹Sia minda-minda tu umposumpa Banua Kabusungan, ia bangsiamo umposumpai tu Banua Kabusungan sia ia duka tu Puang torro lan.

²²Sia minda-minda tu umposumpa suruga, iamo umposumpa isungan kapayunganNa Puang Matua sia Ia duka tu Puang unnisungi dao.

²³Upu’ allomi, e pandita Sura’ sia to belo puduk! Belanna ianna dipa’sangpulo tu kamangi sia salasi sia dintan, sangtaanna mipennoloan, apa mipasalai tu ma’iringanna lan Sukaran aluk, susinna tu katonganan sia kamamasean sia kamarurusan. Iari ia to tu sipatu dipogau’ sia iatu senga’na da duka nadipaboko’i penaa.

²⁴E perenden buta, to ussungke’i kasisi’, anna unta naampello’ kalebu.

²⁵Upu’ allomi, e pandita Sura’ sia to Farisi, to belo puduk! Belanna umbaseikomi salianna irusan sia kandian, apa lanna lu ponno apa dirampa mibarakki.

²⁶E to Farisi buta! Basei dolo tu lanna lu kandian sia irusan, anna pada mabase salianna.

²⁷Upu’ allomi, e pandita Sura’ sia to Farisi, to belo puduk! Belanna butungkomi kaburu’ disapu’ kapu’; moi me’lok tu salianna ditiro, apa lanna lu ponno buku to mate sia anggenna maruttakna.

²⁸Susi dukamoto tu kamu, ianna salianmi natiro tau malolo, apa lanna lu ponno kakelokan sia kamataparan lako sukaran aluk.

²⁹Upu’ allomi, e pandita Sura’, sia to Farisi to belo puduk! Belanna unggaragakomi lamunanna nabi-nabi, sia untananni batu lamunanna to malambu’.

³⁰Mikuami: Iakengki denmo tonna linona nene’ to doloki, inang tae’ kila sanginaa tu tau iato umpato’doi tu rarana tu nabi-nabi.

³¹Susimoto, kamu kalena ussa’bii kalemi, kumua kamumo tarukna tu to umpatei nabi-nabi.

³²Ma’elo’namokomi umponnoi tu sukaranna nene’ to dolomi!

³³E ula’ sia bati’ ula’. Umba la mikua umpallaian kalemi dio mai ukungan naraka?

³⁴Iamoto palan ara’i, ussuaNa’ nabi-nabi sia to kinaa sia pandita Sura’ lako kalemi. Na den pira la mipatei sia mia’ta’, sia den pira la mibamba ulang lan lu banua pa’kombongan sia mipasilamban-lamban tu kota minii ullolai.

³⁵Kumua ammi buntu rengnge’i tu mai rarana to malambu’ tu to’do rokko padang, tempon dio mai rarana Habel tau lambu’ sae lako rarana Zakharia, anakna Berekhya, tu mangka mipatei dio kasiallaranna banua kabusungan anna to’ kapemalaran.

³⁶Tonganna tongan Kukua mati’, kumua iate mintu’na te la narampoi te bangsa iate.

³⁷E Yerusalem, Yerusalem, tu umpatei tu mai nabi sia untumbui batu mintu’ to disua lako kalemu. Ba’tu pempiranMo’ la morai urrampun anakmu, susi indo’ manuk urrampun anakna lan to’ pani’na, apa manokakomi.

³⁸Tiromi midisa’bianganan tu banuammi.

³⁹Belanna Kukua mati’, kumua randuk te attu iate, tae’mo milaungkitaNa’ sae lako mikuanna: Kurre sumanga’na tu saeNa umpotete sanganNa Puang.