Read Toraja-Sa'dan MATIUS 24 Bible Online

MATIUS 24 - Toraja-Sa'dan bible

MATIUS 24

¹Sunmi tu Yesu lan mai Banua Kabusungan anNa male; saemi tu anak gurunNa umpakitanNi tu garaganna Banua Kabusungan.

²Mebalimi Nakua ungkuanni tinde tau: Tang mipemaranga nasangmoraka te mintu’na te? Tonganna tongan Kukua mati’, tae’ la torro indete tu batu mettodo’ dao batu senga’, tu tang la diseranna.

³Tonna unno’ko’ dao buntu Zaitun, ussarakki misami kalena tu anak gurunNa nasae lako Kalena, sia nakua: Pokadangkan, attu umbara nala dadi tu iannato, sia apara tandana tu kasaeamMi sia katappuranna te lino?

⁴Mebalimi Yesu sia Nakua ungkuanni: Kanandai tonganni, den manii tau umpapusakomi.

⁵Belanna buda tau la sae umposanga sangangKu, nakua: Akumote tu Kristus! iamoto tau iato tu la umpapusa buda tau.

⁶La mirangi tu diona kasirarian sia kareba kasirarian, apa da mitiramban, belanna tae’ nasalai tang dadi tu mintu’nato, apa tae’pa nala katappuranna to.

⁷Belanna bangsa la siea pada bangsa sia to sangkadatuan siea to sangkadatuan; sia umba-umba nii la den karorian sia lino’.

⁸Apa mintu’nato, mane pamulannari kamaparrisan.

⁹Attu iato la nasorongkomi tau la dipakario-rio sia la napateikomi tau, sia la nakabiri’komi mintu’ bangsa belanna sangangKu.

¹⁰Attu iato nabuda tau la dipakondo’, anna sipa’pesorongan len sia sikabiri’.

¹¹Buda tu nabi tang tongan la bendan, anna umpapusa buda tau.

¹²Sia belanna sadipisik-pisikna tu sukaran aluk, budami tau la moro’ kamamaseanna.

¹³Apa minda-minda tu mengkabatta’ sae lako ma’katampakanna, iamo la dikarimmanni.

¹⁴Iatu Kareba kaparannuan diona ParentaNa Puang Matua la dipa’peissanan lan mintu’ lili’na te lino la mendadi tanda sa’binna lako mintu’ bangsa; undinnato, maneri sae tu katappuranna.

¹⁵Iamoto, iammi kitami tu kamaparrangan megi’giran tu umpabu’tu kasanggangan bendan dio inan masero, susitu napokada nabi Daniel minda-minda tu umbasai natangnga’ mandalanni —

¹⁶ianna attu iato la mallai langngan tanete tu to dio tana Yudea:

¹⁷sia iatu to dao bubungan banua, da namengkalao rokko sia unnala apanna lan mai,

¹⁸sia iatu to dio pa’lakna, da nasule unnala sambu’na.

¹⁹Upu’ allona tu to ma’tambuk sia to sumusupa anakna to attu iato.

²⁰Massambayangkomi umpalakui da nasiappa’ attu kamadinginan ba’tu allo katorroan tu kapallaiammi.

²¹Belanna attu iato la bu’tu tu ma’iringanna kadipakario-rioan; iatu susinna to tae’ bangpa nadadi len tempon dio mai pamulanna lino sae lako te totemo, sia tae’ dukamo nala dadi len.

²²Sia iakenna tae’ nadipakadomi’ tu attunna, inang la tae’mo tau misa’ duka dikarimmanni; apa belanna iatu mintu’ to ditonno’, anna dipakadomi’ tu attu iato.

²³Iake attu iato naden tau ma’kada lako kalemi kumua: Tiromi, indemo tu Kristus!, ba’tu: Diomo tu Kristus!, da mipatonganni.

²⁴Belanna ba’tu pira-pira tu Kristus tang tongan sia nabi tang tongan la bendan, tu umpabu’tu tanda kalle-kallean tongan sia penggauran memangngan, kumua anna ma’papusa moi na iatu to ditonno’, ke la ma’din siai.

²⁵Palan ara’i, mangkamo kupokada dolo tu iannato lako kalemi.

²⁶Iamoto, ianna kua tau ungkuangkomi: Tiromi, diomo Ia padang pangallaran, da milao lako; ba’tu nakua: tiromi, lanmo Ia inan; da mipatonganni.

²⁷Belanna susi kila’ mellepa’ dio mai matallo, naparrang sae lako matampu’ susi dukamoto tu kasaeanna Anak rampan dilino.

²⁸Belanna umba-umba nanii batang rabuk, iamo nanii pa’duku’ sirampun.

²⁹Ianna lendu’ nasangmo tu kadipakario-rioan, ta’pa la dipaliun tu allo sia tae’ duka nala parrang tu bulan, sia la ronno’ tu mintu’na bintoen dao langi’, sia mintu’na kamatotoran dao langi’ la tigega’.

³⁰Namangkato la payan tu tandaNa Anak rampan dilino dao langi’; anna mintu’na bangsa lan lino la umbating, anna kitaI tu Anak rampan dilino sae dao gaun dao mai langi’ umpake kamatotoran sia kamala’biran kapua.

³¹Anna ussua malaeka’Na umpannoni tarompe’ pua, kapua oninna, sia urrampun mintu’ to NapileinNa dio mai matallo matampu’, lo’ mai engkokna padang sae rekke ulunna langi’, tempon dio mai randanna langi’ sae lako randan sangsesena.

³²Alai rapang-rapangna dio kayu ara: ianna mentarukmo takke’-takke’na sia mellolo, inang miissan bangmo kumua la madomi’mo pealloan.

³³Ten dukamoto tu kamu: Iammi tiromi dadi tu mintu’nato, issan bangmi, kumua mareke’mo dio to’ ba’ba tu iannato.

³⁴Tonganna tongan Kukua lako kalemi kumua: Tae’ nala pa’de te bangsa iate, ke tae’pi nadadi tu mintu’nato.

³⁵Iatu langi’ sola lino la pa’de, apa iatu kadangKu tae’ nala pa’de.

³⁶Apa iatu allona ba’tu attunna tae’ tau misa’ duka untandai, moi na iatu malaeka’ dao suruga ba’tu iatu Anak, sangadinna Ia manna tu Ambe’.

³⁷Belanna tumba tonna linona Nuh, la susi dukamoto tu kasaeanNa Anak rampan dilino.

³⁸Belanna susi bangsia tonna attu la madomi’mo sae uai saba’: kumande-mande bang tu tau, sia mangiru’ sia kebaine sia ma’pakemuane, sae lako allo katamanna Nuh tama lembang.

³⁹Sia tae’ bang namengkilala, sae lako saena uai saba’ ussabu’i nasangi, la susi dukamoto tu kasaeanNa Anak rampan dilino.

⁴⁰Attu iato iatu tau da’dua dio pa’lak, misa’ la disolan na misa’ la ditampe.

⁴¹Sia iatu da’dua baine ma’ta’pung dio to’ pangrissoan, misa’ la disolan na misa’ ditampe.

⁴²Iamoto ma’penandakomi, belanna tae’ miisanni, umba allo nala sae tu Puangmi.

⁴³Apa miissan sia tu diona te kumua: Iake naissanni ampu banua umba attu nala sae to boko, tae’ natang ma’penanda sia tae’ napopa’elo’nai tu banuanna dilu’bakki.

⁴⁴Iamoto la marea dukakomi, belanna iatu Anak rampan dilino la sae lan attu tang mikapang-kapang.

⁴⁵Mindara tu kaunan maruru’ sia kinaa, tu napakuasa puangna umpoissan mintu’ rurananna la umpapantanni kande ke attunnaomi?

⁴⁶Maupa’ tu kaunan iato, ke saei puangna nakarampoi umpogau’i susi to.

⁴⁷Tonganna tongan Kukua mati’: Inang la napakuasa umpoissanni tu mintu’ apanna.

⁴⁸Apa iake kaunan kadake nakua lan penaanna: marempa siapa namane sae tu puangku;

⁴⁹anna parandukki ungkambei tu mai solana, sia kumande-mande sia mangiru’-iru’ sola to pa’malangoan.

⁵⁰Na iatu puangna la sae ke allo tang nakapang sia attu tang natandai,

⁵¹nateba-tebai la’bo’ sia napakitai kataananna sisola to belo puduk. Indemoto nanii katumangiran sia kasisangeran isi.