Read Toraja-Sa'dan MATIUS 25 Bible Online

MATIUS 25 - Toraja-Sa'dan bible

MATIUS 25

¹Attu iato iatu Parenta Suruga susi sangpulo anak dara umbaa palitanna, anna sun la untammui muane la diparampo.

²Ia tinde baine, lima tu baga, na lima tu kinaa.

³Belanna iatu baganna tae’ minna’ napasalian, lan manna palitanna.

⁴Apa iatu kinaanna umbaa minna’ lan pa’pannianna sia lan palitanna.

⁵Iatonna marempamo sae tu to la diparampo tikkaru’du’mi sola nasangi, anna mamma’.

⁶Pakalan tonna ma’tangngamo bongi, denmi tau metamba nakua: Mareakomi saemo tu to la diparampo! Sunmokomi untammui!

⁷Millik nasangmi tinde anak dara napada umparandan palitanna.

⁸Nakuami tu baganna lako kinaanna: Benkan kami minna’mi pira, belanna la pa’demo tu palitangki.

⁹Apa mebali tu kinaanna nakua: Umbai tae’mo ia nala silasa ke la kibenkomi pira; melo ke laomokomi lako to ma’baluk, ammi allii kamu.

¹⁰Memboko’mo male unnalli minna’, anna sae tu to diparampo; na iatu ma’parandanna tamamo naturu’i tu to diparampo tama pa’maruasan rampanan kapa’; disalli’mi tu ba’ba.

¹¹Mangkato sae dukami tu anak dara senga’ nakua: O puang, o puang, bungkarangkan kami ba’ba.

¹²Apa mebali nakua: Tonganna tongan kukua mati’: tae’ aku kutandai- komi.

¹³Iamoto la ma’penandakomi, belan- na tae’ miissanni tu allona ba’tu attunna.

¹⁴Belanna iatu iannato susi misa’ to la male lako padang senga’; natambai tu mintu’ kaunan marimbanganna, napakambi’i tu iananna.

¹⁵Misa’ naben lima talenta, misa’ naben da’dua, naden pole’o misa’ naben misa’; pantan napapatui bang lako. Namane ke’de’ lako padang senga’.

¹⁶Iatinde to diben lima talenta, ta’pa male umpalolo’ pongna, anna kesaro lima talenta.

¹⁷Susi dukato tu to diben da’dua talenta, kesaro da’dua talenta.

¹⁸Apa iatu to diben misa’ talenta, male umbo’bok patuang, nabunii tu doi’na puangna.

¹⁹Iatonna ba’tu sangapa-apa undinnato, saemi tu puangna tinde mintu’ kaunan anna sisalu.

²⁰Saemi mennolo tu to diben lima talenta, nabaai tu nasarona lima talenta, nakua: O Puang, lima talenta misorong lako kaleku; tiromi kesaro siamo lima talenta.

²¹Nakuami tu puangna lako: iamo melonato, e kaunan masokan sia maruru’! sala sidi’na munii duka maruru’; dadi la kupamanassamoko ungkambi’i tu budanna: tamamoko kaparannuanna puangmu.

²²Saeomi mennolo tu to diben da’dua talenta, sia nakua: O puang, da’dua talenta misorong lako kaleku; tiromi kesaro siaomo da’dua talenta.

²³Nakuami tu puangna lako: Iamo melonato, e kaunan masokan sia maruru’! sala sidi’na munii duka maruru’; dadi la kupamanassamoko ungkambi’i tu budanna. Tamamoko kaparannuanna puangmu.

²⁴Sae dukami mennolo tu to mangka dipongi misa’ talenta, sia nakua: O puang, kuissan kumua kamumo misa’ to masuangga, umpeparei bangkomi tangpantananmi, sia urrampunkomi tang pangambo’mi;

²⁵Iamoto angku mataku’ kulao umbunii tu talentami rokko padang. Tiromi, inde sia tu apammi.

²⁶Mebalimi tu puangna, sia nakua ungkuanni: E kaunan bulituk sia tukkunan! muissanmo kumua umpeparei bangna’ tang pantananku sia urrampunna’ tang pangambo’ku;

²⁷iamoto, sipatuko ussorongi tu doi’ku lako to umpa’pedenneran doi’, kumua iangku sae to kualami aku sule tu doi’ku sola denne’na.

²⁸Iamoto allai dio mai tu talenta, benni ia tu to sangpulo talenta dio.

²⁹Belanna minda-minda tu den dio, la diben dukapa lako, anna kala’bian pissan; apa minda-minda tu tae’ dio, la dialai pissan dio mai moi iatu dionamo kalena.

³⁰Anna iatu kaunan tae’ gai’na pembuanganni tama malillinna dio salian; diomo la nanii katumangiran sia kasisangeran isi.

³¹IanNa sae tu Anak rampan dilino nakabu’ kamala’biranNa, sia naturu’ mintu’ malaeka’Na, anNa unno’ko’ dao isungan kapayunganNa;

³²mintu’ bangsana tolino la dirampun dio oloNa, anNa sarakki simisa’i, susi to manglaa ussarakki domba dio mai to’ bembe’.

³³Anna rampunni tu domba dio rampe kananNa, apa iatu bembe’ dio rampe kairinNa.

³⁴Namane ma’kada tu Datu lako tu to dio rampe kananNa kumua: Maimokomi, e kamu tu Naparongko’na Ambe’Ku, ammi pomana’i tu mana’, iamotu kadatuan diparandanangkomi tempon dio mai dikombongna tu lino.

³⁵Belanna iatongKu tangdia’, mipakandeNa’; ma’rangNa’ mipairu’Na’; torro to saeNa’, mitammuiNa’;

³⁶ma’kale-kaleNa’, mitamangkaleiNa’; masakiNa’, mitollongiNa’; lanNa’ pa’tarungkuan, saekomi ussitiroanNa’.

³⁷Anna mebali tu mintu’ to maruru’, sia ma’kada lako nakua: O Puang, attu umbara kitiroi tu Puang tangdia’, angki pakandeI? ba’tu ma’rang, angki pairu’I?

³⁸Ba’tu attu umbara kitiroi tu Puang torro to sae, angki tammui ba’tu ma’kale-kale, angki tamangkalei.

³⁹Ba’tu attu umbara kitiroI tu Puang masaki, ba’tu lan pa’tarungkuan, angki tollongI?

⁴⁰La mebali tu Datu, sia ma’kada lako tu tau, Nakua: Tonganna tongan Kukua mati’, kumua tumba tu mipogau’namo lako misa’ te siulu’ makario-rioKu, iamoto tu mipogau’ lako Kaleku.

⁴¹Namane ma’kada tu Datu lako tu to dio rampe kairinNa kumua: Pallaikomi dio mai oloKu, e tampak ropu, tamamokomi api naraka sae lakona, tu diparandanan deata masussuk sia mintu’ pesuanna.

⁴²Belanna iatongKu tangdia’ tae’ mipakandeNa’; ma’rangNa’, tae’ Mipairu’Na’;

⁴³torro to saeNa’, tae’ mitammuiNa’; ma’kale-kaleNa’, tae’ mitamangkaleiNa’; masakiNa’ sia lanNa’ pa’tarungkuan, tae’ mitollongiNa’;

⁴⁴La mebali tu tau, kumua: O Puang, attu umbara angki tiroI tu Puang tangdia’ ba’tu ma’rang, ba’tu torro to sae, ba’tu ma’kale-kale, ba’tu masaki, ba’tu lan pa’tarungkuan, anna tae’ kiparakai tu Puang?

⁴⁵La mebali tu Datu, sia ma’kada lako tu tau kumua: Tonganna tongan Kukua mati’, kumua tumba tu tang mipogau’na lako misa’i te to makario-rio iate, tae’ duka naden tu mipogau’na lako Kaleku.

⁴⁶Dadi tau iato la lu tama kamaparrisan tontong sae lakona; apa iatu to malambu’ la tama katuoan tontong sae lakona.