Read Toraja-Sa'dan MATIUS 26 Bible Online

MATIUS 26 - Toraja-Sa'dan bible

MATIUS 26

¹Iatonna mangkamo Yesu unnupu’i tu mintu’ kada iato, ma’kada pole’omi lako anak gurunNa Nakua:

²Inang miissanmo kumua duang allopi nalambi’i tu pa’gauran Pasa, anNa disorong tu Anak rampan dilino, kumua anNa dia’ta’.

³Tonna iato sirampunmi tu mintu’ pangulu to minaa sia pekaamberan dio banua pangra’tasan kara-karana Tominaa Kapua, tu disanga Kayafas,

⁴nasituru’imi la untangnga’ Yesu natingkanNi, kumua napatei.

⁵Apa nakua tu tau: Da ia ke allo kapua, da nabu’tu tu la napomarukkana tau.

⁶Iatonna dio Betania tu Yesu, dio banuanna Simon masaki kadake,

⁷saemi lako Kalena tu baine misa’, sibaa tonde gori-gori nanii minna’ busarungngu’ masuli’ allinna, nabolloanni langngan ulunna Yesu, tonna unno’ko’ kumande.

⁸Iatonna tiroi anak gurunNa pada bangngomi ara’na, sia nakua: Apara patunna tu kamalaboan iato?

⁹Belanna iatu minna’ ma’din dibalukan masuli’, nadipa’kamasean lako to mase-mase.

¹⁰Apa iatonna tiroi Yesu tu iannato, Nakuami ungkuanni tu tau: Ma’apari ammi sussairi tu baine iatu? Anna umpogau’ misa’ kameloan lako Kaleku.

¹¹Belanna iatu to mase-mase tontong siakomi sisola, apa iate Aku te tae’ Kutontong misisolan.

¹²Belanna iatu kanabolloianna minna’ tu Kaleku tinde baine butung to napogau’ la umpasakka’i tu kadipe- liangangKu.

¹³Tonganna tongan Kukua mati’: Umba-umba nii lan te lino dinii umpa’peissanan Kareba kaparannuan, la disa’bu’ duka tu penggauranna te baine, dinii umpengkilalai.

¹⁴Undinnato malemi misa’ tu anak gurunNa sangpulo dua, tu disanganna Yudas Iskariot, lako mintu’ pangulu to minaa,

¹⁵sia nakua: Apara la mibenna’, ke kupa’peturoanNi tu Yesu lako kalemi? Natimbangammi salaka tallungpulo batunna.

¹⁶Randuk tonna iato nanii Yudas undaka’ attu melo la ussorongI lako tau iato mai.

¹⁷Iatonna bunga’na tu allo kapua dinii ungkande roti tang diragii, saemi lako Yesu tu mai anak gurunNa, nakua: Umbara tu Miporainna la kinii lao umpasakkarangKomi tu kande Pa’pasa?

¹⁸Nakuami Yesu: Laomokomi tama kota umpellambi’i anu, ammi pokadanni kumua: Nakua Guru: mandappi’mo lampakKu; dadi lan banuammu la Kunii ungkande Pa’pasa sola anak gurungKu.

¹⁹Napogau’mi anak gurunNa susitu Napepasanan Yesu lako, sia napasakka’ tu Pa’pasa.

²⁰Iatonna bongimo, unno’ko’mi tu Yesu kumande sola tu anak gurunNa sangpulo dua.

²¹Marassanmo kumande, Nama’kada tu Yesu Nakua: Tonganna tongan Kukua lako kalemi kumua denkomi misa’ tu la umpa’peturoanNa’.

²²Lendu’mi masussanna, anna randuk pantan mekutana lako nakua: O Puang, akuraka?

²³Mebalimi Yesu Nakua: Na tu to Kusangbarasan unnoton limangKu rokko pindan, iamoto tu la umpa’peturoanNa’.

²⁴Inang la maleNa tu Anak rampan dilino, belanna mangkamo disura’ tu iannato; apa upu’ allona tu tau iato, tu umpa’peturoan Anak rampan dilino! La’bi’pissan ia kenna tae’ nadidadian tu tau iato.

²⁵Mebalimi Yudas tu la umpa’peturoanNi, nakua: akuraka, Guru? Nakuami Yesu ungkuanni: Susimo tu kadammu.

²⁶Iatonna marassanmo kumande, Naalami Yesu tu roti Nasambayangi, Namane untepu-tepui Nabenni anak gurunNa sia Nakua: Alami, mikandei, iamote tu batang kaleKu.

²⁷Namane unnangkaranni tu irusan, Nama’kurre sumanga’ anNa tadoanni anak gurunNa sia Nakua: Iru’imi sola nasangkomi te irusan.

²⁸Belanna iamote tu raraKu, rara titanan basse ba’ru, tu dipato’do belanna buda tau, napotete kadipa’deian kasalan.

²⁹Apa Kukua mati’ kumua randuk te attu iate tae’mo Kula unniru’ uai bua anggoro’ sae lako tairu’na sola, tu ba’runna lan parentaNa Ambe’Ku.

³⁰Iatonna mangkamo umpopenani pa’pudian, sunmi namale ma’palulako buntu Zaitun.

³¹Nakuami Yesu ungkuanni: La mo’dongkomi sola nasang tu diona Aku te bongi iate, belanna den disura’ kumua: la Kubamba tu to manglaa, anna sisaraksarak tu domba sangtun- tunan.

³²Apa undinna ke malimbangunMo’ sule, la Kudoloikomi male lako Galilea.

³³Mebalimi Petrus sia nakua lako: Moi namo’dong nasang tu mati’ tu diona Puang, apa aku te tae’.

³⁴Nakuami Yesu ungkuanni: Tonganna tongan Kukua mati’, kumua ia bangsiamote bongi iate, tae’pa naunnoni manuk, mupeonganniMo’ pentallun.

³⁵Nakuami Petrus lako: Moi angku pada mate Puang, inang tae’ kula umpeonganni Puang. Susi duka kadanna to tu mintu’ anak gurunNa.

³⁶Iatonna mangkato saemi tu Yesu sola tinde mai tau lako misa’ pa’lak disanga Getsemani. Nakuami lako anak gurunNa: Unno’ko’mokomi indete, Kulaopa indetu lako massambayang.

³⁷Nasolammi tu Petrus na iatu anakna Zebedeus da’dua, randukmi Ia masussa sia lendu’ maparri’Na.

³⁸Nakuami Yesu lako tinde mai tau: Lendu’ masussanna penaangKu kari’ la mateMo’ Kusa’ding; torromokomi indete anta maroya sola.

³⁹Malemi sanglengko-lengko, Namalinguntu’ massambayang, Nakua: O Ambe’, ke ma’dinni amMi lendokanni te irusan iate dio mai Kaleku; apa iatu iannato tangia pa’poraiangKu tongan, sangadinna pa’poraiamMi.

⁴⁰Sulemi lako anak gurunNa, Nakabu’tui mamma’mo; Nakuami ungkuan Petrus: E, tae’ siamoraka mibelai maroya sangte’te’ duka Kusisolan?

⁴¹Ma’penandakomi sia massambayangkomi da naruakomi peroso; tonganna la morai tu penaa, apa langga’ tu kale.

⁴²Male pole’omi massambayang tonna ma’penduanna, Nakua: O Ambe’, iake tae’i nala tilendok dio mai Kaleku te irusan iate, sangadinna inang la Kuiru’ina, pa’poraiamMi tongan.

⁴³Iatonna sule pole’omo, mamma’omo Nakarampoi, belanna maga’sak tu matanna.

⁴⁴Napopa’elo’nami, Namale pole’o massambayang tonna ma’pentallunna, ia siao to kada iato Natole.

⁴⁵Namane sule lako anak gurunNa sia Nakua ungkuanni: Mamma’ bangmokomi ammi pamondo ta’ka’mi; totemo mandappi’mo attunna la disorong tu Anak rampan dilino lako to kadake.

⁴⁶Millikmokomi, mimale mai talao; tiromi tu to umpa’peturoanNa’ mandappi’mo.

⁴⁷Marassan bangsia ma’kada-kada, saemi tu Yudas, iamo misa’ tu to sangpulo dua, sia lendu’ budanna to ma’pa’dang sia ma’tarasulu’ nasisolan, tu to nasua pangulu to minaa sia pekaamberan pa’tondokan.

⁴⁸Iatinde to umpa’peturoan Yesu napokadan tanda tu tau, nakua: Minda-minda tu kuudung, iamoto; tingkanmi to.

⁴⁹Attu ia bangsiamoto nasae lako Yesu sia nakua: SiriaKomi kamarampasan, Guru! namane unnudungi.

⁵⁰Nakuami Yesu ungkuanni: E sangmane, pogau’mi tu mutungkananna sae. Napentireke’imi tau iate mai napata’pai lima namane untingkanNi.

⁵¹Denmi misa’ tu to nasisolan Yesu tikambe limanna, nanonokki tu la’bo’na, naba’tai tu kaunanna Tominaa Kapua natantangi tu talinganna.

⁵²Nakuami Yesu ungkuanni: Banuai sule tu la’bo’mu; belanna mintu’na tu to umpopaningoan la’bo’, la mate nakande la’bo’.

⁵³Musangaraka, tae’ Kuma’din umpa- lakui langngan Ambe’Ku, anNa pa’ka- maseanni lako Kaleku losong anna sangpulo dua sa’bu malaeka’, moi na totemo bangsiamote?

⁵⁴Iake susito, umbamo la dikua ussundunni tu lanna Sura’ Madatu tu nakua, tae’ nasalai tang dadi susito?

⁵⁵Tonna iato nakuami Yesu ungkuanni tu to buda: Takuakomi to la urrukka’ pa’gora’ ammi sun ma’la’bo’ sia ma’tarasulu’ la untingkanNa’? Keallo-keallo mangada’iNa’ lan Banua Kabusungan, anna tae’ra mitingkanNa’.

⁵⁶Apa mintu’na te dadi, kumua anna sundun tu lanna sura’na mintu’ nabi. Sangmallaiammi tu anak gurunNa ussitampei.

⁵⁷Iatinde to untingkan Yesu, male umbaaI lako Kayafas, Tominaa Kapua, lako tu inan nanii sirampun mintu’ pandita Sukaran aluk sia pekaamberan pa’tondokan.

⁵⁸Apa iatu Petrus undi unturu’ mambela bangI tu Yesu, sae lako to’ banuanna Tominaa Kapua, anna tama unno’ko’ sola mintu’ kaunan la untiroi ma’katampakanna.

⁵⁹Napatamammi kada pangulu-pangulu to minaa sola mintu’ Ada’ tu Yesu, kumua anna patei;

⁶⁰tae’mi lalan nakabu’tui, moi anna buda sa’bi tang tongan. Apa undinna saemi tau da’dua,

⁶¹nakua: Iamora te tu to umpokadai tu kada kumua: Ma’din Kurondonni tu Banua Kabusungan, angKu bangunni lan tallung allo.

⁶²Bendanmi tu Tominaa Kapua sia nakua ungkuanNi: Tae’raka Mila mebali len? Apara te nasa’biangKomi tau?

⁶³Apa ma’loko-loko bang tu Yesu. Nakuami tu Tominaa Kapua ungkuanNi: La kupopassumpaKomi ussa’bu’ Puang matontongan Mipokadangkanni ke Kamumo Kristus, tu AnakNa Puang Matua.

⁶⁴Nakuami Yesu lako: Susimo tu kadammi. Apa Kukua mati’, randuk te totemo ammi kitai tu Anak rampan dilino unno’ko’ dio kananNa To umpoissan angge maritik, sia sae lan gaun dao mai langi’.

⁶⁵Usse’bu-se’bumi pakeanna tu Tominaa Kapua sia nakua: Umpa’kada solangi Puang Matua; apaopa gai’na lako kaleta tu sa’bi? Totemo mirangimo tu kada solangNa.

⁶⁶Tumbara tangnga’mi? Mebalimi tu tau, nakua: Sipato’namo la mate.

⁶⁷Natittuduimi tu lindoNa, sia natambusuk; sia den tu untappele’I,

⁶⁸sia nakua: Pa’nubuarangkanni, e Kristus, mindara tu ungkambeikomi?

⁶⁹Iatu Petrus unno’ko dio salian, dio to’ banua kombongan kalua’na Ada’; saemi lako kalena tu baine ruranan misa’, nakua: Iko dukapa tu sisola tu Yesu, to Galilea.

⁷⁰Apa meongan dio tingayona mintu’ tau, nakua: Tae’ aku kuissan tu mupokadanna.

⁷¹Iatonna sunmo lako to’ babangan, den pole’omi baine ruranan senga’ ungkitai sia nakua ungkuanni tu to indeto dio: Ia dukapa te tau iate tu nasisolan Yesu, tu to Nazaret.

⁷²Meongan pole’omi sia menggata nakua: Tae’ aku kutandai tu tau ia tu.

⁷³Sattu’-sattu’ to saeomi lako Petrus tu to bendan indeto dio sia nakua: Manassa iko dukapa misa’ tu solana tu tau ia tu, belanna kadammu umpa’petandangko.

⁷⁴Randukmi umpatamai karangan makula’ kalena sia menggata nakua: Tae’ aku kutandai tu tau ia tu. Ta’pa unnonimi manuk tonna iato.

⁷⁵Tilanta’mi lan penaanna Petrus tu kadanNa Yesu kumua: Tae’pa naunnoni manuk, ammu peonganniMo’ pentallun. Sunmi naunnade-ade tumangi’.