Read Toraja-Sa'dan MATIUS 27 Bible Online

MATIUS 27 - Toraja-Sa'dan bible

MATIUS 27

¹Iatonna masiangmo, nakombongammi mintu’ pangulu to minaa sia pekaamberan pa’tondokan tu diona Yesu, kumua anNa dipatei.

²Napungomi namale umbaaI, nasorongI lako Pilatus, to maraya.

³Iatonna tiroi Yudas tu mangka umpa’peturoan Yesu, kumua dipakannaimo ukungan, menassanmi, napasulei tu salaka tallungpulo batunna lako to minaa sia pekaamberan,

⁴nakua: Madosana’, belanna ussorong rarana to tang kasalan. Apa nakua tu tau: Apara kami la kiissan? Iko iko rengnge’na.

⁵Nasamboran nasangmi tu salaka tama Banua Kabusungan, namale, anna lao untoke’ kalena.

⁶Narurukmi pangulu to minaa tu salaka sia nakua: tae’ nasipatu la dipatama patti doi’ pa’kamasean te doi’ iate, belanna alli rara.

⁷Nasituru’imi umpangallianni sanginan padangna to tumampa kurin tu doi’ iato, la dipopanglamunan to sae.

⁸Iamoto anna disanga Padangrara tu padang iato sae lako te allo iate.

⁹Tonna iato sundunmo tu napokadanna nabi Yeremia, nakua: Naalamo tu salaka tallungpulo batunna, tu allinna to dipasiangga’ to Israel,

¹⁰anna sorongi napamayaran alli padangna to tumampa kurin, susitu Napokada Puang lako kaleku.

¹¹Bendanmi tu Yesu dio olona to maraya, anna mekutana to maraya lako, sia nakua: Kamumoraka tu Datunna to Yahudi? Nakuami Yesu: Susimo tu kadammi.

¹²Iatonna parapa’i pangulu-pangulu to minaa sia pekaamberan moi misa’ tae’ duka Napebalii.

¹³Nakuami Pilatus ungkuanNi: Tae’raka Mirangii ba’tu pira-piramo tu kara-kara nasa’bii tau diona Kamu?

¹⁴Moi sangbuku kada tae’ Napebalian lako, anna mangnga tongan tu to maraya.

¹⁵Ianna allo kapua biasa tu to maraya umpatassuranni to buda tu to ditarungku misa’, minda-minda tu naporai tau.

¹⁶Apa iatonna iato, den misa’ to ditarungku, to lele kadakena, disanga Barabas.

¹⁷Iatonna sirampunmo tu to buda, ma’kadami tu Pilatus lako tu tau iato mai nakua: Mindara tu miporai kupatassurangkomi? Barabas raka ba’tu Yesu, tu disanga Kristus?

¹⁸Belanna naissanmo, kumua kamabirisanna tu tau anna sorongI.

¹⁹Iatonna unno’ko’ tu Pilatus dao kadera nanii unno’ko’ mangra’ta’ kara-kara, mesuami tu bainena lako umpokadai kumua: Da mipatumba-tumbai tu to malambu’; belanna ba’tu pempiranmo kutibuang-buangan te allo iate lan tindoku tu diona Ia.

²⁰Apa napatunduk pangulu to minaa sia pekaamberan tu to buda, kumua napalakui naia dipatassuranni tu Barabas, anna dipatei tu Yesu.

²¹Mebalimi tu to maraya nakua ungkuanni tu tau: Umbannara miporai te tau da’dua kupatassurangkomi? Nakuami tu tau: Barabasmo.

²²Nakuami Pilatus lako tu tau: Iake susito, umba tu sipatu la kugauranNi tu Yesu disanga Kristus? Nakuami tu tau mintu’: Sipatu Ia dia’ta’.

²³Apa nakua Pilatus: Kakadakean apara tu napogau’? Samandu-mandunnami tu tau metamba, nakua: Sipatu Ia dia’ta’!

²⁴Iatonna tiroi Pilatus kumua tae’mo gai’na tu kadanna, sangadi sakerangngan-rangnganna kamarekoan, naalami tu uai nabasei tu limanna dio tingayona to buda, nakua: Maserona’ aku dio mai raraNa te to malambu’: kamu rengnge’na!

²⁵Mebalimi tu mintu’ to buda, nakua: Na kalekimora sola nasang sia tarukki natirampanni tu raraNa.

²⁶Tonna iato napatassurammi tu Barabas, apa iatu Yesu nabamba, sia nasorong kumua anNa dia’ta’.

²⁷Mangkato nabaami surodadunna to maraya tu Yesu tama pangra’tasan kara-kara, anna pasirampun nasangi tu mintu’ surodadu sangkaponan.

²⁸Nasabakkimi tu pakeanna Yesu, napaluangi bayu lamba’ lango-lango.

²⁹Sia naampinniran sa’pi’ duri, napasa’pi’i, napatangkei tekken tallang tu lima kananNa; namalinguntu’ dio tingayoNa untelle-telleI, nakua: Tabe’ datu to Yahudi!

³⁰Natittuduimi tau, sia naala tu tallang nalonga’i tu ulunNa.

³¹Iatonna mangka untelle-telleI, nasabakkimi sule tu bayu lando, napapasangi tu bayunNa siamo, namale umbaaI, kumua Nadia’ta’.

³²Iatonna sun, sitammumi misa’ to Kirene disanga Simon; naparukumi tu tau iato umpassanni tu kayu pea’ta’Na Yesu.

³³Iatonna rampo lako inan disanga Golgota, battuananna Inan ma’kararo ulu,

³⁴nabenmi Yesu tu uai anggoro’ dipasito’bo’ pa’du; iatonna lepa’i, manokami unniru’i.

³⁵Tonna mangka unna’ta’i tu Yesu, nasitaaimi tu pakeanNa nasire’tekki.

³⁶Naunno’ko’ indeto dio ungkampai.

³⁷Iatu kada diparapasanni disura’ dao to’ ulunNa nakua: Iamote tu Yesu, Datunna to Yahudi.

³⁸Tonna iato dipasia’ta’ duka pa’gora’ da’dua, misa’ dio kananNa, na misa’ dio kairinNa.

³⁹Na iatu mai to lendu’ indeto dio nasilo’bo-lo’boi sia unniling-iling,

⁴⁰Nakua: ai’, Kamumo para’ tu la urrondonni Banua Kabusungan amMi bangunni sule lan tallung allo, karimmanni kalenamoKomi Kalemi; iake AnakNaKomi Puang Matua, mengkalaoKomi dao mai tu kayu pea’ta’!

⁴¹Susi duka tu to mintu’ pangulu to minaa sia pandita Sukaran aluk sia pekaamberan ussitelle-tellei, sia nakua:

⁴²Nakarimmannimo tu to senga’, anna Kalena tang nabela ungkarimmanni. Ia para’ Datunna to Israel, namengkalaomo totemo dao mai kayu pea’ta, tamane umpatonganNi.

⁴³Rannu lakomo Puang Matua, da’ito na Puang Matua duka ungkarimmanNi totemo, ke Naporai Puang Matua; belanna nakua: AnaknaNa’ Puang Matua.

⁴⁴Susi dukato tu pa’gora’ nasisolan dia’ta’ untelle-telleI.

⁴⁵Randukmi tonna te’te’ sangpulo dua ma’tangnga allo malillin tu mintu’ padang sae lako te’te’ tallu makaroen.

⁴⁶Agi-agi te’te’ tallu Nametamba tu Yesu umpemandui gamaranNa, Nakua: Eli, Eli lama sabakhtani! battuananna: O PuangKu, o PuangKu, ma’apari amMi tampemoRa’.

⁴⁷Iatonna rangii ba’tu pira-pira to bendan inde to dio, nakuami ma’kada: untambaimo Elia te Tau te.

⁴⁸Tikarami ma’dondo tu tau misa’ unnala lumu’ batu, napatamai sukka, napadioi tallang, anna pairu’I.

⁴⁹Apa nakua tu to senga’: Da’ito, anta tiroi: ba’tu la saei tu Elia ungkarim- manni!

⁵⁰Metamba pole’omi tu Yesu umpemandui gamaranNa, namane ussorong PenaanNa.

⁵¹Pakalan natipa’duamo tu kulambu lan Banua Kabusungan, tempon dao mai sae rokko; sia tiseno-seno tu padang; sia iatu mai buntu batu silalla-lalla.

⁵²Sia iatu mai liang tibungka’, anna den ba’tu pira-pira tu batang rabukna to masallo’ malimbangun sule;

⁵³anna sun lan mai liangna; na iatonna mangkamo kamalimbangunanNa Yesu, tamami tondok maindan, nabuda tau ungkitai.

⁵⁴Iatonna tiroi kamandang sia iatu mai to nasisolan ungkampai Yesu tu lino’ sia iatu mintu’ apa dadi, lendu’mi mataku’na, nakua: Manassa AnakNa Puang Matua te Tau iate.

⁵⁵Denmi ba’tu pira-pira baine inde to dio untiro mambelai, iamotu mai to unturru’I dio mai Galilea sia umparakai.

⁵⁶Ia siamo tu mai sia Maria Magdalena sia Maria indo’na Yakobus sola Yusuf, sia indo’na anakna Zebedeus.

⁵⁷Iatonna makaroen, saemi misa’ to sugi’ disanga Yusuf, lu dio mai Arimatea; ia dukamo misa’ anak gurunNa Yesu.

⁵⁸Laomi mennolo lako Pilatus umpalakui tu batang rabukNa Yesu. Namesua Pilatus umbenni.

⁵⁹Naalami Yusuf, nabalunni sampin kasa me’lok sia bangla’.

⁶⁰Napatamai liang ba’runna, liang mane mangka napa’; nalentenni tu batu kapua misa’ lako to’ babana tu liang, namane male.

⁶¹Iatu Maria Magdalena sola tu Maria senga’ dio unno’ko’ sipatu tu liang.

⁶²Iatonna masiangnato, tonna lendu’mo tu allo dinii ma’pasakka’, sirampunmi tu mintu’ pangulu to minaa sia to Farisi mennolo lako Pilatus,

⁶³nakua: Tabe’ tuang, kikilalai kumua nakua ma’kada tu iti’ To ma’papusa tonna tuopa: tallung allo Kumalimbangun sule.

⁶⁴Iamoto melo ke misuai tau ungkampai tu liangNa sae lako allo ma’pentallunna, da’ nasae anak gurunNa umbokoI, anna pokadai lako pa’tondokan kumua malimbangun dio mai to’ to mate; satama-tamannami tu dipopusanna undinna na iatu dolona.

⁶⁵Nakuami Pilatus lako tu tau: Ma’dinkomi diben pa’ronda’; laomokomi ungkampai tonganni.

⁶⁶Laomi nakampai tu liang, tonna mangka unca’i, natundui mintu’ pa’ronda’.