Read Toraja-Sa'dan MATIUS 28 Bible Online

MATIUS 28 - Toraja-Sa'dan bible

MATIUS 28

¹Tonna lendu’mo tu allo katorroan, mane tibaan masiang tonna allo bunga’na lan minggu iato, saemi Maria Magdalena sola Maria senga’ la untiroi tu liang.

²Pakalan denmi lino’ kapua, belanna den malaeka’Na Puang mengkalao dao mai suruga, nasae ullentenni tu batu dio mai baba liang, anna unno’ko’ dao.

³Iatu rupanna susi kila’, na iatu pakeanna mabussang susi bua uran.

⁴Ma’parondomi tu pa’ronda’ belanna mataku’, naurunganni susi bangmo to mate ditiro.

⁵Ma’kadami tu malaeka’ sia nakua lako tu baine; Da mimataku’, belanna kuissan kumua undaka’komi Yesu, tu dia’ta’.

⁶Tae’ Ia Naindete, belanna malimbangunmo susitu kadanNa dolona. Maimokomi mitiroi tu NaninNa Puang.

⁷Laomokomi madomi’ umpokadanni anak gurunNa, kumua malimbangunmo dio mai to’ to mate, sia la Nadoloikomi lako Galilea; diomo la minii untiroI; pengkilalai, kupokadammokomi tu iannato.

⁸Tikarami tinde mai baine male untampei tu liang situang kamatakuran sia kaparannuan kapua, namale ma’dondo-dondo la umpokadanni anak gurunNa Yesu.

⁹Pakalan nasitammumo Yesu, sia Nakua: Siriakomi kamarampasan! Saemi tinde mai baine urraka’i tu lentekNa, sia tukku umpennoloI.

¹⁰Nakuami Yesu ungkuanni: Da mimataku’! Laomokomi umpokadanni sangsiulurangKu, anna lao lako Galilea, nadio nanii untiroNa’.

¹¹Iatonna malemo memboko’, rampomi tu mai pa’ronda’ tama tondok umpokadai lako pangulu-pangulu to minaa tu mintu’ apa dadi.

¹²Sirampunmi sola pekaamberan anna ma’kombongan, nabenni doi’ salaka buda tu surodadu ba’tu pira-pira,

¹³sia nakua: La mikua umpokadai: Sae bongi tu anak gurunNa tongki mamma’, anna bokoI.

¹⁴Ianna rangi to ma’parenta undinna tu iannato, kiada’imira sia kipa’kadangkomi.

¹⁵Naalami tu doi’, napogau’i susitu diadaranni. Kaleleammi te kada iate lako to Yahudi sae lako totemo te.

¹⁶Malemi tinde to sangpulo misa lako Galilea, lako misa’ tanete napamanassamo Yesu lako tau iato mai.

¹⁷Iatonna kitaI tu Yesu, tukkumi umpennoloI; apa den duka tu tau bata,

¹⁸Napentireke’imi Yesu, anNa ma’kada lako tu tau, Nakua: Mintu’na kakuasan disorongmo lako Kaleku, la dao suruga la lan te lino.

¹⁹Iamoto malemokomi mipopendadii anak gurungKu tu mintu’na bangsa, ammi dio’i tama sanganNa Ambe’, sia Anak na Penaa Masallo’;

²⁰sia miada’i susitu mintu’na Kupa’peannan lako kalemi; la miissan kumua: Aku te la tontongNa’ ussisolangkomi sae lako katappuranna lino.