Read Toraja-Sa'dan MATIUS 4 Bible Online

MATIUS 4 - Toraja-Sa'dan bible

MATIUS 4

¹Pakalan Nabaami Penaa tu Yesu lako padang pangallaran, anna rosoI deata bulituk.

²Iatonna patangpulomo allona patangpulo bonginna Nanii ma’puasa, katampakanna tangdia’mi.

³Saemi tinde to pangrosoan sia nakua lako: Iake AnakNaKomi Puang Matua, suai te batu mendadi roti.

⁴Apa mebali Nakua: Den disura’ kumua: Tae’ nakande manna la napotuo tau, sangadinna ia duka tu mintu’ kada, tu Napokadanna Puang Matua.

⁵Mangkato nasolammi deata bulituk tu Yesu lako tondok maindan, anna pabendanNi dao bubungan Banua Kabusungan,

⁶sia nakua lako: Iake AnakNaKomi Puang Matua, tobangangKomi Kalemi indete rokko, belanna den disura’, kumua: La NasuangKo tu malaeka’Na, natimangKo da natitampa’ tu lentekMu lako batu.

⁷Nakuami Yesu lako: Den dukao disura’ kumua: Da mutoba Puang Totumampamu.

⁸Nasolan pole’omi deata bulituk tu Yesu langngan buntu malangka’ tongan, napakitanNi tu mintu’ parenta lan te lino sola mintu’ kamala’biranna;

⁹sia nakua ungkuanNi: Mintu’nate la kuben nasangKomi, ke tukkuKomi umpenombaina’.

¹⁰Pakalan Nakuami Yesu lako: Sumarombonko mallai, e deata bulituk, belanna den disura’ kumua: La menombako lako Puang Totumampamu sia Ia mammo mupekapuangi.

¹¹Mangkato soro’mi tu Deata bulituk dio mai Kalena, nasae malaeka’ ungkamayaI.

¹²Iatonna rangimi Yesu kumua dipa’petarungkuammo tu Yohanes, sulemi lako tana Galilea.

¹³Natampemi tu tondok Nazaret anna lu tama Kapernaum natorro dio, dio to’ randan tasik, nalili’na padangna Zebulon sola Naftali,

¹⁴anna sundun tu kadanna nabi Yesaya, tu nakua:

¹⁵Iatu padangna Zebulon sola Naftali, padang lakona tasik, rampe lianna Yordan, iamotu Galilea padang to kapere’;

¹⁶iatu to torro lan malillinna ungkitamo arrang ma’lana-lana, sia bu’tumo maserona umpanta’i tu mintu’ to torro lan padang naluang kamatean.

¹⁷Tempon iamoto naranduk tu Yesu mangada’i sia nakua: Mengkatoba’komi belanna mengkareke’mo tu Parenta Suruga.

¹⁸Iatonna sumalong-malong dio randan tasik Galilea, Nakitami tu Petrus sola siulu’na disanga Andreas, marassan umbuang dalla’ diong tasik, belanna tau iato pa’dalla’.

¹⁹Nakuami ungkuanni: Malekomi mai urrundu’Na’ angKu popendadikomi pa’dalla’ tau.

²⁰Ta’pa natampemi tu dalla’na tinde tau, naundi urrundu’I.

²¹Iatonna male inde to dio mai, Nakita pole’omi tu to massiulu’ senga’ da’dua, iamotu Yakobus, anakna Zebedeus sola siulu’na disanga Yohanes lan lopi sola ambe’na ussula’i dalla’na, Natambai.

²²Ta’pa natampemi sola duai tu lopi sola ambe’na, naundi urrundu’I.

²³Malemi tu Yesu ullelei mintu’ tana Galilea mangada’i lan lu banua pa’kombonganna tau, sia umpa’peissanan Kareba kaparannuan diona ParentaNa Puang Matua sia umpasoro’ mintu’ saki sia rammun dio mai kalena tau.

²⁴Tiseno-senomi karebanNa dio mintu’ lili’na tana Siria; nabaami tau lako Kalena tu mintu’ to mandalan sakinna, tu narua ma’rupa-rupa saki sia pa’di’, tu mai to natamai deata bulituk sia to ta’taran sia to kupi’; anNa pamalekei.

²⁵Budami tau dio mai Galilea sia Dekapolis sia Yerusalem sia Yudea sia dio mai lamban lianna salu Yordan undi urrundu’I.