Read Toraja-Sa'dan MATIUS 5 Bible Online

MATIUS 5 - Toraja-Sa'dan bible

MATIUS 5

¹IatonNa kitami Yesu tu to buda, kendekmi langngan tanete; tonna unno’ko’mo, saemi lako tu anak gurunNa.

²Umbuangmi kada sia Naada’i tu tau, Nakua:

³Maupa’ tu mintu’ to umpamadiongan penaanna belanna tau iato umpoparenta Parenta Suruga.

⁴Maupa’ tu mintu’ to masussa, belanna tau iato la dipakatana.

⁵Maupa’ tu mintu’ to sorong inaanna, belanna tau iato la umpomana’ lino.

⁶Maupa’ tu mintu’ to umpotangdia’ sia umpoma’rang kamaloloan, belanna tau iato la dipedia’i.

⁷Maupa’ tu mintu’ to unnampui kamamasean, belanna tau iato la dikamasei.

⁸Maupa’ tu mintu’ to masallo’ penaanna, belanna tau iato la untiro lindo Puang Matua.

⁹Maupa’ tu mintu’ to ma’pasikaelo, belanna tau iato la disa’bu’ AnakNa Puang Matua.

¹⁰Maupa’ tu mintu’ to dipakario-rio diona kamaloloan, belanna tau iato umpoparenta Parenta Suruga.

¹¹Maupa’komi ke nasayukomi tau sia napakario-riokomi sia napalele bekokomi naben tang gau’mi diona Aku.

¹²Parannu paimankomi sia sende pakadua, belanna kapua serongmi lan suruga, belanna susi dukamoto tu nabi dolona anna kamu, dipakario-rio.

¹³Kamumo te tu sianna lino. Iake memmatammakki tu sia, apa pole’pa la dipamapi’danni? Tae’mo naden len gai’na, sangadinna ditibe sia nalullu’ tau.

¹⁴Kamu te arrangnakomi lino. Misa’ tondok dao tanete, ma’apa-apai nala kabunian.

¹⁵Tae’ dukao ia tau untutungi dama’, anna samboi baka, sangadinna dipadao tongkonanna, anna arrangi tu mintu’ tau lan banua.

¹⁶Susi dukamoto la ma’lana-lana tu arangmi dio tingayona mintu’ tau, anna kitai tu gau’ melomi, napakala’bi’i tu Ambe’mi dao suruga.

¹⁷Da’ misangai kumua saeNa’ la ullelleng Sukaran alukNa Puang Matua ba’tu sura’na nabi; tae’ Kusae la ullellengi sangadinna la ussundunni.

¹⁸Belanna tonganna Kukua mati’, sae lako rabunna langi’ sola lino, moi sangto’dikan ba’tu pada kanuku malotong tae’ napa’de len lan mai Sukaran alukNa Puang Matua sae lako dadinna nasang.

¹⁹Iamoto minda-minda umpisikki misa’ tu bittikna lan mai te mintu’ parenta iate, sia umpa’pangadaranni lako tau susi to, iamo la bittikna disa’bu’ lan Parenta Suruga; apa minda-minda tu ungkanannangi tu parenta sia umpa’pangadaranni, iamo la kapua disa’bu’ lan Parenta Suruga.

²⁰Belanna Kukua lako Kalemi: Iake tae’i nalosong tu kamaloloammi na iatu kamaloloanna pandita Sura’ sia to Farisi, dennoraka mila tama len Parenta Suruga.

²¹Mirangimo tu apa dipokadan to dolo-dolo kumua: Da’ mupapatean, na minda-minda tu papataen, la napakannai ukungan ada’.

²²Apa Aku Kukua mati’ kumua: minda-minda tae’ natore kasengkeanna lako siulu’na, la napakannai ukungan ada’; sia minda-minda tu ma’kada lako siulu’na kumua: E baga! La napakannai ukungan ada’ lompo; sia minda-minda tu kumua: E to bomboan? La nakanna ukungan tama api naraka.

²³Iamoto, iammu baa pemala’mu lako to’ kapemalaran, ammu kilalai dio, kumua den siulu’mu madiong penaa lako kalemu,

²⁴tampei tu pemala’mu dio to’ kapemalaran, mulao sitama siulu’mu dolo, mumane sule umpemalaranni tu pemala’mu.

²⁵Madomi’ko umpemeloanni penaa tu balimmu, ke diopoko lu lalan sola; da’ anna baako balimmu lako to mangra’ta’ kara-kara, nasorong pole’oko to mangra’ta’ kara-kara lako sapiri, ammu dipatama pa’tarungkuan.

²⁶Tonganna tongan Kukua mati’; dennoraka mula tassu’ lan mai, ke tae’pi mubaya’i tu utangmu moi misa’ seng dokko’ tae’ nama’din kurang.

²⁷Mirangimo tu kada susite: Da’ mupasandak salu lako rampanan kapa’.

²⁸Apa Aku Kukua mati’ kumua, minda-minda tu umpenunu misa’ baine anna sae kamoraianna lako, mangkamo ia pasandak salu lako rampanan kapa’ lan penaanna lako tu baine to.

²⁹Iake mata kananmu untumangko, su’be’i, mutibei; belanna la’bi’ sia ia ke pa’dei misa’ tu lesoan kalemu na iake dipembuangan kalebuko tama naraka.

³⁰Sia iake lima kananmu untumangko, ta’takki, mutibei; belanna la’bi’ sia ia ke pa’dei misa’ tu lesoan kalemu, na iake dipembuangan kalebuko tama naraka.

³¹Sia iatu nakua: Minda-minda untantang bainena, la naben sura’ kasitantangan.

³²Apa Aku Kukua mati’: Minda-minda tu untantang bainena sangadinna ke passalan kalosi dibuni, ia untumangi napasandak salu lako rampanan kapa’ tu baine, sia minda-minda umpobainei tu baine ditantang susi to, ia dukamo pasandak salu lako rampanan kapa’.

³³Sia mirangi dukamo tu apa dipokadan to dolo-dolo kumua: Da mutengkai sumpamu, sangadinna sipatu la mupalanda’ lako Puang tu mintu’ sumpamu.

³⁴Apa Aku Kukua mati’: Da’ mimassumpa len; da’ mumassumpa ussa’bu’ langi’, belanna iamo isungan kapayunganNa Puang Matua;

³⁵ba’tu lino, belanna iamo pelleseanNa, ba’tu Yerusalem, belanna iamo kotana Datu kabarre-alloan;

³⁶sia da’ mumassumpa urrere’ kollongmu, belanna moi sang lamba’ beluak tae’ mukuasa umpopemmabusai ba’tu umpopemmalotongi.

³⁷Sangadinna la mikua: tonganna ke tonganni, ba’tu tae’ ke tae’i, iatu madaoanna na iato ulang diomira kakadakean.

³⁸Mirangimo te kada susite: Mata dipasibala’ mata, sia isi dipasibala’ isi;

³⁹apa Aku Kukua mati’: Da’ mipasuleanni tu to kadake, sangadinna minda-minda ussala’pa popo kananmu, patadoanni lako tu sangbalinnapa.

⁴⁰Sia iake la naparapa’ko tau, nala unnalai tu bayummu, da’ito naala dukai tu sambu’mu.

⁴¹Sia minda-minda umparukuko lumingka misa’ kilo mambelanna, maleko sola penduan pada to.

⁴²Benni tu to malaku lako kalemu, sia da mupa’taeranni tu to la morai mangindan mati’.

⁴³Mirangimo tu kada susite: la muala mase tu solamu, sia mukabiri’ tu ualimmu.

⁴⁴Apa Aku Kukua mati’: Ala masei tu ualimmi, sia passambayanganni tu to umpakario-riokomi,

⁴⁵ammi paan anakNa Ambe’mi dao suruga; belanna Ia umpabu’tuanni alloNa tu to kadake sia to masokan, sia umpasaeanni uranNa tu to malambu’ sia to tang malambu’.

⁴⁶Belanna iake unnala masekomi to ungkamaseikomi, apara poleanna lako kalemi? Tang napogau’ dukaraka passima susi to?

⁴⁷Sia iake siulu’mi manna mikambaroan melo, apara mipolosong? Tang napogau’ dukaraka to kapere’ susito?

⁴⁸Iamoto dadi la tae’ sayuammi, susi Ambe’mi dao suruga tae’ sayu-sayuanNa.