Read Toraja-Sa'dan MATIUS 6 Bible Online

MATIUS 6 - Toraja-Sa'dan bible

MATIUS 6

¹Pengkilalai tonganni: da mipogau’i tu gau’ malolomi dio tingayona tau kumua nakitai tau: iake susito tae’ mitarimai tu poleanna dio mai Ambe’mi dao suruga.

²Iamoto, iammu bengan pa’kamasean, da mupa’petendenganni tu iannato dio tingayomu, susitu napogau’ to belo puduk lan banua pa’kombongan sia dio lu lalan, kumua anna tendengi tau. Tonganna tongan Kukua mati’, inang naala dolomo tu poleanna.

³Apa iatu iko, iammu bengan pa’kamasean, da naissanni lima kairimmu tu apa napogau’ lima kananmu,

⁴da anna kakitanan tu pa’kamaseammu; anna Ambe’mu tu ungkita tang kakitananna, Iamo la umpapakkanni lako kalemu.

⁵Iammi massambayang, da misusi to belo puduk; belanna naporai ke’de’ massambayang lan lu banua pa’kombongan sia dio lu tetuk batatta kumua anna kitai tau. Tonganna tongan Kukua mati’, naala dolomo tu poleanna.

⁶Apa iatu iko, iammu la massambayang, kendekko langngan banuammu mutama inanmu, musalli’i tu ba’bamu, ammu massambayang langngan Ambe’mu Puang tang kakitanan, anna Ambe’mu tu ungkita tang kakitananna, Iamo la umpapakkanni lako kalemu.

⁷Iammi massambayang, da mirombe-rombei tu kada susi gau’na to kapere’ belanna nasanga kumua iari naditarima pangimbona tu kamalengkoanna kadanna.

⁸Iamoto da misusitu tau iato; belanna naissan dolomo Ambe’mi tu mipomelona mimane umpalakui lako.

⁹Iamoto dadi la mikua massambayang: O Ambe’ki dao suruga, (kipalaku) anna dipakala’bi’ tu sangamMi:

¹⁰Anna patalo tu ParentaMi anna dadi tu pa’poraiamMi lan te lino susi dao suruga.

¹¹Benkanni tu silasanna kikande allo iate

¹²sia pa’dei tu sala budangki, susi kami umpagarri’ salana to kasalan lako kaleki.

¹³Sia da Mielorangkanni diroso, sangadinna rinding pala’kan da narandankan deata bulituk. Belanna Kamu tu unnampui Parenta sia kapaan sia kamala’biran sae lakona.

¹⁴Belanna iake umpagarri’komi salana tau, tae’ Natang umpa’dei dukai Ambe’mi dao suruga tu salami.

¹⁵Apa iake tang umpagarri’komi salana tau, manassa tae’ duka Napa’dei Ambe’mi tu salami.

¹⁶Sia iammi ma’puasa, da misusi to belo puduk umpamaru’gun lindona; belanna umpamariga-riga rupanna anna tandan nakita tau kumua ma’puasa. Tonganna tongan Kukua mati’, naala dolomo tu poleanna tu tau iato.

¹⁷Apa iatu iko, iammu ma’puasa, boka’i tu ulummu sia dau’i tu lindomu,

¹⁸da mupa’pepayananni lako tau kumua ma’puasako, sangadinna lako Ambe’ tang kakitanammu; anna Ambe’mu tu ungkita tang kakitananna, Iamo la umpapakkanni lako kalemu.

¹⁹Da’ mipakombongan ianan kalemi lan te lino tu naninna busung sia ta’ga’ umbala’-bala’i, sia to boko ullo’po’ banua anna boko,

²⁰sangadinna pakombongangkomi ianan kalemi lan suruga, tu inan tang nanii busung sia ta’ga’ umbala’-bala’i sia tae’ to boko ullo’po’ banua ba’tu boko.

²¹Belanna umba-umba nii iananmu, dio duka tu penaammu.

²²Iatu mata, palitanna kale; iamoto, ianna masero tu matammu, tae’ natang masero tu mintu’ kalemu.

²³Apa iake kadakei tu matammu, manassa malillin tu mintu’ kalemu. Iamoto, iake malillinni tu maserona dio kalemu tang padamo ia kapuanna tu kamalillinan iato!

²⁴Tae’ misa’ kaunan ma’poperuranni lako da’dua puangna, belanna tae’ nasalai tang nakasorro tu misa’na, naporai tu misa’, ba’tu la’ka’ lakoi misa’na nasarroanni tu misa’na. Tae’ mima’din umpekapuangi Puang Matua mipengkaolai dukai tu Mamon.

²⁵Iamoto Kukua lako kalemi: Da miposelangi tu katuoammi, tu kumua: apa tu la mikande ba’tu la miiru’, ba’tu diona kalemi, kumua apa tu la mipake. Tae’raka nalosong tu penaa na iatu kande, sia kale na iatu tamangkale?

²⁶Tiro-tiroi tu manuk-manuk dao langi’, tae’ namantanan len sia mepare, ba’tu urrampun kande langngan alang, anNa patuo dukai Ambe’mi dao suruga. Tae’raka milosong na iatu mintu’ manuk-manuk?

²⁷Mindarokomi kamu ke miposelangi ma’din umpamalambe’ sunga’mi sidi’ duka?

²⁸Sia ma’apari miposelangi tu diona tamangkale? Tangnga’-tangnga’ri tu diona danga-danga dio lu padang, umbara nakua tuona; tang la mengkarang sia, tang la mangunu’sia.

²⁹Na Kukua lako kalemi: Moi Salomo nakabu’ mintu’ kamala’biranna, tae’ nadipakei susitu danga-danga sangtangke.

³⁰Iake susito tu Puang Matua umbeloi tu riu dio lu padang, tu tuo siapa te allo iate, anna manikale’ dibuangmo tama api dapo’, ondong pissan tu kamu, e to tangkan ma’patongan?

³¹Iamoto da miposelangi, kumua: Apara tu la kikande? ba’tu: Apara tu la kiiru’? ba’tu: Apara tu la kipotamangkale?

³²Belanna mintu’na te napengkali-kalii to kapere’, apa Naissan Ambe’mi dao suruga kumua mipotuona tu mintu’nato.

³³Apa daka’ tonganni dolo tu ParentaNa Puang Matua sola kamaloloanNa, na iatu mintu’nato, la dipangrangnganan duka lako kalemi.

³⁴Iamoto da miposelangi tu allo masaa, belanna iatu allo masaa den toda ia tu naposelangna. Silasamo ke pantan denni ia kamasussanna ke sangallooi.