Read Toraja-Sa'dan MATIUS 9 Bible Online

MATIUS 9 - Toraja-Sa'dan bible

MATIUS 9

¹Kendekmi Yesu langngan lembang, Nama’lembang lian, Narampo lako tondokNa.

²Nabaami tau lako tu to kupi’ misa’, mamma’ bang diong ampa’na; belanna Natiro Yesu tu kapatongananna tinde tau, Nakuami ungkuanni tinde to kupi’: Parapa’i tu penaammu, e anakKu, dipa’deimo tu kasalammu.

³Denmi ba’tu pira-pira pandita Sura’ dio, tu ma’tangnga’ lan penaanna kumua: Ma’kada solang Ia te Tau iate.

⁴Belanna Naissan nasang Yesu tu tangnga’ lan penaanna tinde tau, Nakuami: Ma’apari ammi ma’tangnga’ salara lan penaammi?

⁵Umbannara maraa, dikuaraka: Dipa’deimo tu kasalammu, ba’tu dikuaraka: Millikmoko, muma’lingka?

⁶Apa dikua ammi issanni kumua kuasa tu Anak rampan dilino umpa’dei kasalan lan te lino — , Nakuami ungkuanni tinde to kupi’: Millikko, mualai tu ampa’mu, musule lako banuammu.

⁷Millikmi nasule lako banuanna.

⁸Iatonna tiromi to buda tu iannato, mataku’mi sia umpudi Puang Matua, tu umpa’kamasean kuasa susito lako to lino.

⁹Malemi tu Yesu inde to dio mai, Natiroi tu tau misa’ disanga Matius unno’ko’ dio to’ passiman; Nakuami ungkuanni: undiko urrundu’Na’. Ke’de’mi naundi urrundu’I.

¹⁰Iatonna unno’ko’ kumande tu Yesu lan banua, budami passima sia to kadake gau’na sae duka unno’ko’ kumande Nasisolan sia anak gurunNa.

¹¹Iatonna kitai to Farisi tu iannato nakuami ungkuanni tu anak gurunNa: Ma’apari tu gurummi Nakumandera sisola passima sia to kadake gau’na?

¹²Iatonna rangii Yesu te kada iate, Nakuami: Tae’ naanga’i to maleke tu to ma’dampi, sangadinna to masakiri.

¹³Apa laomokomi ammi tangnga’-tangnga’i patunna te kada iate: Kamamasean Aku tu Kukamorai, tangia pemala’, belanna tae’ Kusae untambai to malambu’, sangadinna to kasalan.

¹⁴Iatonna iato saemi tu anak gurunna Yohanes lako Yesu nakua: Ma’apai anna kami kami ma’puasakan sia to Farisi duka, anna tae’ kamu tu anak gurumMi?

¹⁵Nakuami Yesu ungkuanni: La makarorrongmoraka tu mai to pasolan ke sisolapi tu to la diparampo? Apa la sae tu allona, to ke dialami dio mai kalena tu to diparampo, namane ma’puasa.

¹⁶Tae’ ia tau misa’ umpa’tampiran sampin ba’ru sangserek lako pakean malusa; belanna inang la naserek pissan dipa’tampiranna tu malusanna, anna sakalua’-lua’na tu serekna.

¹⁷Sia tae’ duka tau umpatama uai anggoro’ ba’ru tama kiriba’ malusa. Belanna iake susito inang la tesse tu kiriba’ natibollo tu uai anggoro’ sia sanggang duka tu kiriba’, sangadinna iatu uai anggoro’ ba’ru sipatu dipatama kiriba’ ba’ru, anna pada-pada manda’.

¹⁸Iatonna marassan Yesu umpokadanni tinde tau tu kada susito, saemi misa’ kapala banua pa’kombongan, tukku umpennoloI, nakua: Iatu anakku baine, mane mate, maipoKomi dikka’ urremme’i limamMi anna tuo sule.

¹⁹Ke’de’mi tu Yesu Naundi urrundu’i, nasangundian tu anak gurunNa.

²⁰Denmi misa’ baine nakasunni nenne’ bang rara, sangpulo duamo taunna, tama lu dio mai boko’, nakaka’i tu rombe sambu’na.

²¹Belanna nakua lan penaanna: Moi anna sambu’Na manna kukaka’, manassa la malekena’.

²²Apa messaile tu Yesus, anNa kitai, Nakuami: E anakKu, parapa’i tu penaammu, kapatonganammumo umpatuoko. Maleke bangsiami tinde baine to attu iato.

²³Iatonna rampo tu Yesu lako to’ banuanna tinde kapala, Natiroi tu to massuling sia tau mamak bangmo.

²⁴Nakuami: Mengkalaokomi, tae’ ia namate te pia te, sangadinna mamma’ri. Napetaaimi tau.

²⁵Apa iatonna papallai nasangmi tu tau rokko padang, malemi tama, anNa toei tu limanna, anna malimbangun tinde pia baine.

²⁶Tiseno-senomi karebanNa lan mintu’ lili’na padang iato.

²⁷Iatonna male tu Yesu inde to dio mai, denmi da’dua to buta undi urrundu’I sia metamba-tamba, nakua: O Anakna Daud, kamaseikan dikka’.

²⁸Tonna kendekmo langngan banua, saemi tinde to buta umpennoloI Nama’kada Yesu lako tinde tau, Nakua: Mikatappa’iraka, kumua ma’din Kupogau’ tu ianna te? Nakuami: Kikatappa’i, Puang!

²⁹Nakaka’mi tu matanna tinde tau sia Nakua: Susitu mipatonganna ten dukamo dadi lako kalemi to.

³⁰Millikmi tu matanna, anNa pakare’na-re’na tonganni Yesu, Nakua: Kanandai tonganni, da naden tau misa’ duka unnissanni te ianna te.

³¹Apa iatonna sun tinde tau, napatiseno-senomi karebanNa lan mintu’ lili’na padang iato.

³²Tonna male tinde tau nabaa pole’omi tau lako Yesu tu to mamang misa’ natamai deata masussuk.

³³Iatonna rambaimi sun tu deata masussuk, ma’kada-kadami tinde to mamang. Mangngami tu to buda sia nakua: Tae’pa ditiro len tu susinna te dio to Israel.

³⁴Apa nakua tu to Farisi: Kamatotorannari pangulunna deata masussuk anNa rambai tu deata.

³⁵Malemi tu Yesu ullelei mintu’ kota sia kampong, Namangada’i lan lu banua pa’kombonganna tau sia umpa’peissanan Kareba kaparannuan diona parentanNa Puang Matua sia umpasoro’ mintu’ saki sia rammun.

³⁶Iatonna tiroi tu to buda, tilaomi masseNa lako tau iato mai, belanna mauyu bangmo sia bo’yok susi domba tae’ to mangkambi’na.

³⁷Tonna iato Nakuami lako anak gurunNa: Tonganna buda tu bura padang, apa sidi’ri tu to ungkasara’i.

³⁸Iamoto, dadi palakui langngan Puang ampunna bura padang anNa sua tau ungkasara’i tu bura padangNa.