Read Toraja-Sa'dan MARKUS 1 Bible Online

MARKUS 1 - Toraja-Sa'dan bible

MARKUS 1

¹Iamote tu tipamulanna Kareba kaparannuan diona Yesu Kristus, AnakNa Puang Matua.

²Susitu disura’ lan sura’na nabi Yesaya, nakua: Tiromi, ussuaNa’ pesuangKu undoloangKo, tu la umpasakka’ lalanMu.

³Denmi gamaranna tau metamba-tamba dio padang pangallaran, nakua: Pasakka’mi tu batattaNa Puang, ranteimi tu lalanNa.

⁴Saemi tu Yohanes Pa’dio’ umpa’peissananni dio padang pangallaran tu kadidioran tanda pengkatobaran, tu napotete kadipa’deian kasalan.

⁵Sangsunammi tu mintu’ pa’tondokan tana Yudea sia mintu’ pa’tondokan Yerusalem male umpellambi’i, naumpopedio’ kalena tu tau iato mai nadio’i Yohanes diong salu Yordan tonna unnaku kasalanna.

⁶Iatu pakeanna Yohanes bulu unta sia iatu salipi’ lan ayakna balulang anna iatu kandena batik sia tallo’ merang pangala’.

⁷Mangada’imi, nakua: Undinna na aku la sae tu mandunna kuasa na aku, moi ulang lapik lentekNa tae’ duka kusipatu la tukku umbukai.

⁸Kudio’mokomi uai, apa Ia la undio’komi Penaa Masallo’.

⁹Pakalan tonna iato saemi tu Yesu dio mai Nazaret, tana Galilea, anna dio’I Yohanes diong salu Yordan.

¹⁰Iatonna kendekmo diong mai to’ uai, ta’pa Natiromi tu langi’ tibangnga nasonglo’ tu PenaanNa Puang Matua lako Kalena susi bu’ku’.

¹¹Anna sae tu gamara dao mai langi’, Nakua: Ikomo tu Anak Pa’kaboro’Ku, dio dukamo Kalemu nanii kasendeangKu.

¹²Iatonna attu ia bangsiamoto Napaseremi Penaa sun lako padang pangallaran.

¹³Patangpulo allona dio tu padang pangallaran naroso deata bulituk anNa sisola bang olo’-olo’ masuru, sia malaeka’ ungkamayai.

¹⁴Iatonna dipa’petarungkuammo tu Yohanes, saemi Yesu lako tana Galilea umpatiranda kareba kaparannuan lu dio mai Puang Matua.

¹⁵Nakua: Nalambi’mo attunna, mengkareke’mo tu ParentaNa Puang Matua. Mengkatoba’komi sia patonganni tu Kareba kaparannuan.

¹⁶IatonNa sumalong-malong dio randan tasik Galilea, Nakitami tu Simon na Andreas, siulu’na Simon, marassan umbuang dalla’ diong tasik, belanna tau iato pa’dalla’.

¹⁷Nakuami Yesu lako: Malekomi mai urrundu’Na’, angKu popendadikomi pa’dalla’ tau.

¹⁸Ta’pa natampemi tu dalla’na tinde tau naundi urrundu’I.

¹⁹Iatonna male dio mai tu Yesu tae’pa nasangapa mambelanna, Nakitami tu Yakobus, anakna Zebedeus sola Yohanes, siulu’na, unno’ko’ lan lopi ussula’i dalla’na.

²⁰Ta’pa Natambaimi, anna untampe Zebedeus, ambe’na lan lopi sola to sumaro namale urrundu’ Yesu.

²¹Malemi tama Kapernaum, na iatonna allo katorroan, ta’pa malemi tu Yesu tama banua pa’kombongan sia unnada’i tau.

²²Lendu’mi tirambanna tu tau mintu’ diona pangadaranNa, belanna susi misa’ to paa unnada’i tu tau, senga’ bang na iatu mai pandita Sura’.

²³Sirupang tonna attu iato denmi lan banua pa’kombongan tu tau misa’ nataba deata masussuk, namelalla-lalla,

²⁴nakua: E, Yesu to Nazaret, la siapariki’! La saeKomi ussanggangikan. Kutandai siaKomi, kumua mindaraKomi te, iamora To Sallo’ lu dio mai Puang Matua.

²⁵Nasarabaimi Yesu, Nakua: Ma’loko-lokoko sia tassu’ko lan mai tau iate!

²⁶Napaganggang tonganmi deata masussuk tu tau iato, bassa’mi kumarrak-marrak natassu’ lan mai kalena.

²⁷Tiramban nasangmi tu tau, naurunganni sikutana len, nakua: Aa, apamo ia te? Pangadaran ba’ruomo sia paa tongan! Belanna moi mintu’ deata masussuk Naparenta anna turu’i tu parentaNa.

²⁸Ta’pa tiseno-senomi karebanna tu diona Yesu dio mintu’ lili’na Galilea.

²⁹Ta’pa sunmi tinde tau lan mai banua pa’kombongan, namale tama banuanna Simon na Andreas sisola Yakobus na Yohanes.

³⁰Mamma’ bangmi tu matusanna baine Simon dio lumalla’, ta’pa napokadammi Yesu.

³¹Saemi Yesu untoei, Nabangunanni, napa’de tu lalla’na anna ia tinde baine umparakai.

³²Iatonna makaroenmo tonna lambun allo, nasolammi tau lako tu mintu’ to nasanta’ saki sia to natamai deata masussuk.

³³Sang sirampunammi tu mintu’ pa’tondokan dio to’ ba’ba.

³⁴Budami tau Napamaleke tu nasanta’ ma’rupa-rupa saki sia buda deata masussuk Narambai, natae’ Natangga’i tu deata masussuk ma’kada-kada belanna natandai deata masussuk tu Yesu.

³⁵Iatonna dannari malillin bangsiapa, millikmi Nasun male lako to’ kasalanna nadio Nanii massambayang.

³⁶Undimi tu Simon sola mintu’ to nasolan urrundu’I.

³⁷Iatonna kabu’tuimi, nakuami tinde tau lako: Mintu’ tu tau undaka’Komi.

³⁸Ma’kadami Yesu lako: Maikomi talulako inan senga’, indete dio lu tondok-tondok mandappi’, angKu mangada’i duka dio, belanna iamo patunna to angKu sun.

³⁹Nasae mangada’i lan lu mintu’ banua pa’kombonganna tau ullelei mintu’ tana Galilea sia urrambai deata masussuk.

⁴⁰Saemi lako Yesu tu misa’ to golenan malaku sia malinguntu’ dio oloNa, nakua: Iake Miporai, manassa kuasaKomi umpamalekena’.

⁴¹Maturu-turumi, Nasoronganni tu limanNa, Nakaka’i sia Nakua lako: Kuporai la malekemoko!

⁴²Ta’pa pa’de bangsiami tu golen dio kalena, anna maleke.

⁴³Iatonna mangkamo umpakare’na-re’na tonganni, ta’pa Napasassa’-sassa’mi la male,

⁴⁴sia Nakua lako: Kanandai tonganni, da mupokada lenni moi lako misa’ duka tau, sangadinna malemoko umpa’pekitanan kalemu lako to minaa sia pemalaranni tu pemala’ belanna kamalekeammu, susito napa’peannan Musa, tu la mendadi tanda lako tu tau.

⁴⁵Apa sun tinde tau, naranduk umpatiseno-seno lu lako lu dioi mai tu karebanNa sia umpalelei tu iannato, naurunganni tae’mo nama’din tu Yesu umpa’pepayanan Kalena tama tondok sangadinna dio bang Ia salian dio lu to’ kasalanna. Nasae tu tau lako Kalena pantan tama bang sae.