Read Toraja-Sa'dan MARKUS 10 Bible Online

MARKUS 10 - Toraja-Sa'dan bible

MARKUS 10

¹Malemi dio mai tu Yesu, Narampo lako lili’na tondok Yudea sia lamban lianna Yordan; buda pole’omi tau sae sirampun lako Kalena, Naada’i pole’oi tu tau susitu biasanNa.

²Saemi to Farisi sia mekutana lako la untobaI nakua: Ma’dinraka tau untantang bainena?

³Apa Nakua mebali lako tu tau: Umbara nakua tu nanannangkomi Musa?

⁴Nakuami tu tau: Naeloran Musa tu tau unggaraga sura’ kasitantangan, sia untantang bainena.

⁵Nakuami Yesu lako tu tau: Tonganna, apa kamakarrasanna penaammi, anna surasangkomi tu parenta iato.

⁶Apa iatu tempon dio mai sipamula lino, Napadadimo Puang Matua tu muane sia baine.

⁷Iamoto anna la untampe ambe’na sia indo’na tu tau, anna la’ka’ lako bainena,

⁸anna mendadi sangbatang kale sola duai, dadi tae’mo nada’dua tau, sangadinna sangkalemora.

⁹Iamoto, iatu Napasibalinna Puang Matua, da napasisarakki tolino.

¹⁰Iatonna saemo lako banua, napekutanan pole’omi anak gurunNa lako tu iannato.

¹¹Nakuami Yesu lako: Minda-minda untantang bainena, naumpobaine to senga’, iamo umposala gau’ sala lako baine dolona.

¹²Sia iake baine untantang muanena, anna umpomuane to senga’, ia umposala gau’ sala.

¹³Denmi pia’-pia’ nasolan tau lako Yesu, kumua anNa kaka’i, apa nasarabai anak gurunNa tinde to ussolanni.

¹⁴Tonna tiroi Yesu tu iannato, re’dekmi ara’Na sia Nakua lako tau iato mai: Popa’elo’nai tu pia’-pia’ sae lako Kaleku, da migagai, belanna iamotu to susite tu unnampui ParentaNa Puang Matua.

¹⁵Kukua mati’: Tonganna minda-minda tu tang susi pia’-pia’ untarima ParentaNa Puang Matua, la tama lennorika!

¹⁶Naraka’mi, sia iatonNa remme’mi limanNa Napassakkemi.

¹⁷IatonNa sunmo lako to’ batatta tu Yesu, saemi tu tau misa’ ma’dondo-dondo lako Kalena anna malinguntu’ dio oloNa, nakutanai nakua: O Guru masokan, apara tu sipatu la kupogau’, angku pomana’ katuoan tontong sae lakona?

¹⁸Nakuami lako: Ma’apari musangaRa’ masokan? Tae’ tau misa’ duka masokan, sangadinna Misa’ri, Ia manna tu Puang Matua.

¹⁹Manassa mutandai sia tu Sukaran alukNa Puang Matua kumua: Da mupapatean, Da mupasandak salu lako rampanan kapa’, Da muboko, Da musa’bi tang tongan, Da mutangnga’ tau, sia kasiri’i tu ambe’mu sia indo’mu.

²⁰Nakuami lako: O Guru, mintu’nato inang kupenandaimo tempon dio mai bitti’ku.

²¹Mentiromi Yesu lako tinde tau, sia mamase untiroi, Nakuami lako: Misa’mora tu musala: Malemoko, mubalukanni tu mintu’ apa dio kalemu ammu benni to mase-mase, ammu ampui ianan dao suruga mumane male mai, undi urrundu’Na’.

²²Apa naporossoora penaanna tu kada iato, anna masussa penaanna male, belanna buda iananna.

²³Mentiro tikumi tu Yesu, sia ma’kada lako anak gurunNa, Nakua: Tangpada malia’na lako to unnampui ianan tu la tama ParentaNa Puang Matua!

²⁴Tirambanmi tu anak gurunNa belanna kada iato. Apa Nakua pole’o Yesu lako tinde tau kumua: E anakKu, tangpada malia’na la tama ParentaNa Puang Matua.

²⁵Malomo ia misa’ unta tama to’tok darun ke la to sugi’mora tama ParentaNa Puang Matua.

²⁶Apa satiramban-rambanna tinde tau sia nakua sipa’kada-kada: Iake susito, mindapa tu la ungkabu’tui kasalamaran?

²⁷Mentiromi Yesu lako tinde tau sia Nakua: Iake tolino tae’ nadadi tu iannato, apa tae’ natang dadi ke Puang Matua; belanna iatu Puang Matua mintu’na angge maritik lan nasang kuasanNa.

²⁸Randukmi Petrus ma’kada lako nakua: Kami te kitampe nasangmmo tu mintu’na angki undi urrundu’Komi.

²⁹Nakuami Yesu: Kukua mati’: tonganna tae’ misa’ duka tu to untampemo banuanna, ba’tu siulu’na muane, ba’tu siulu’na baine, ba’tu indo’na, ba’tu ambe’na, ba’tu anakna, ba’tu umanna tu belanna Aku sia belanna Kareba-kaparannuan,

³⁰sangadinna la nakabu’tui pessaratu’ manglokkon te attu totemo lan te lino iamotu banua sia siulu’ muane sia baine, sia indo’ sia anak, sia uma sisola kadipakario-rioan, apa iake attu la sae undinna la ungkabu’tui katuoan tontong sae lakona.

³¹Buda tu tau dolo iamo la undinna, sia iatu undinna iamo la dolona.

³²Diomi lu lalan la tuka’ langngan Yerusalem, Nadolo tu Yesu dio tingayona, tirambanmi tinde tau, sia ia duka tu tau undi urrundu’I mataku’. Tonna iato Napopa’misa pole’omi tu anak gurunNa sangpulo dua, Naparandukki umpokadai lako tinde tau tu mintu’na apa la dadi lako Kalena,

³³Nakua: Totemo la maleki’ langngan Yerusalem, anNa disorong lako pangulu to minaa sia pandita Sura’ tu Anak rampan dilino, anna situru’i kumua la dipateI, sia la nasorong lako to kapere’.

³⁴Anna telle-telleI sia natittuduI, sia naongkan-ongkan ue sia napateI, apa iake allo ma’pentallun la malimbangun sule.

³⁵Saemi tu Yakobus sola Yohanes, anakna Zebedeus lako Yesu sia ma’kada lako nakua: O Guru, kiporai ke Mipogaurangkan tu kipalakunna lako Kalemi.

³⁶Nakuami lako: Apara tu pa’poraiam- mi tu la Kupogaurangkomi.

³⁷Nakuami tinde tau lako: Elorangkanni unno’ko’ misa’ dio kanan na misa’ dio kairimMi lan inan kamala’biramMi.

³⁸Apa Nakua Yesu lako: Tae’ mitandai tu apa mipalaku. Ma’dinrokomika la unniru’i tu Kuiru’na lan mai irusan? Ba’tu ma’dinraka didiorangkomi tu pa’dioran la didioranNa?

³⁹Nakuami sola duai: Ma’din. Ma’kadami Yesu lako nakua: Tonganna iatu Kuiru’na lan mai irusan la miiru’duka, sia iatu pa’dioran didioranNa’ la didioran dukakomi;

⁴⁰apa iatu unno’ko’ dio kananKu sia dio kairingKu tangia Aku ma’lalan inaanNa la umpa’benganni, sangadinna iatu iannato la diben tu to inang diparandanammo.

⁴¹Iatonna rangii tinde to sangpulo tu iannato, randukmi sengke lako Yakobus sia Yohanes.

⁴²Natambaimi Yesu sola nasangi sia Nakua: Miissan sia kumua iatu to disanga pangulunna bangsana tau, umpalalo parentana lako tu tau, sia iatu to paana ungkuasai.

⁴³Apa iatu kamu tae’ misusito, sangadinna minda-mindammi tu la morai madaoan, sipatu la mendadi to ma’parakami.

⁴⁴Sia minda-mindammi tu la morai pangulu, sipatu la mendadi kaunanmi sola nasang.

⁴⁵Belanna Anak rampan dilino duka tae’ Nasae kumua Nadikamayai sangadinna kumua Nama’kamayai sia ussorong penaanNa la napopela’bak buda tau.

⁴⁶Rampomi lako Yerikho. Iatonna sunmo tu Yesu dio mai Yerikho sola anak gurunNa sia lendu’ budanna tau Nasisolan, denmi anakna Timeus, disanga Bartimeus, to buta kapalaku-laku, unno’ko’ dio biring lalan.

⁴⁷Iatonna rangii kumua Yesumo te, tu to Nazaret, randukmi metamba-tamba, nakua: o Yesu, Anakna Daud kamaseina’ dikka’.

⁴⁸Budami tau ussarabai, ussuai ma’- loko-loko, apa samandu-mandunaora metamba, nakua: O Anakna Daud, kamaseina’ dikka’!

⁴⁹Tadangmi tu Yesu sia Nakua: Tambai. Natambaimi tau tinde to buta, nakua lako: Parapa’i tu penaammu; ke’de’moko, Natambaimoko.

⁵⁰Narampanammi tu sambu’na, nata’pa ke’de’ sia male lako Yesu.

⁵¹Mebalimi Yesu lako, Nakua: Apara mukamorai la Kupogau’ lako kalemu? Nakuami tinde to buta lako: O Guru, elo’namo ke pakita dukana’.

⁵²Nakuami Yesu lako: Malemoko, kapatonganammumo umpamakarimmanko. Ta’pa pakitami to attu iato, naundi urrundu’ Yesu dio lu lalan.