Read Toraja-Sa'dan MARKUS 11 Bible Online

MARKUS 11 - Toraja-Sa'dan bible

MARKUS 11

¹Iatonna reke’mi tu Yerusalem, sikandappi’ Betfage sia Betania dio buntu Zaitun, Nasuami Yesu tu anak gurunNa da’dua,

²sia Nakua lako: Malekomi lako tu tondok misipatuan; iake malekomi tama, ta’pa la unnappa’komi misa’ anak keledai disangkin, tu tae’ bangpa misa’ duka tau ussakei; bukai, mibaai dio mai.

³Iake denni tau ungkuangkomi kumua: Ma’apari mipasusiri to?, la mikua; den la Napapatuanni Puang, madomi’ bangsia la Napasule.

⁴Malemi tinde tau, naappa’i tu keledai misa’ disangkin sikandappi’ ba’ba rampe salianna messikunna batatta, nabukai tu ulangna.

⁵Denmi tu to ke’de’ dio nakua lako: La mipatumbai ammi rampananni tu anak keledai?

⁶Apa mebali tinde tau lako susitu Napokadanna Yesu; naelorammi tinde tau sola duai male.

⁷Nabaami tu anak keledai lako Yesu; sia nalapikki pakeanna Naunno’ko’ dao tu Yesu.

⁸Budami tau umballa’ pakeanna lako lalan sia den pole’o senga’na unnampa’i tangke-tangke kayu nasembang lan mai pa’lak.

⁹Iatu to dolo dio tingayoNa sia to undi unturu’I unnarrak-arrak, nakua: Hosanna!

¹⁰Kurre sumanga’na tu saena umpotete sanganNa Puang; Maupa’ tu kadatuanna nene’ to dolota Daud te sae te; Hosanna dao masuanggana.

¹¹Malemi tama Yerusalem tama to’ Banua Kabusungan; iatonna mangka nasangmo untiroi tu mintu’ apa untikuI, belanna makaroenmo, sunMi Namale lako Betania sola anak gurunNa sangpulo dua.

¹²Iatonna masiang to, tonna sun lan mai Betania, ussa’dingmi tangdia’.

¹³Iatonna kita mambelai tu kayu ara sangto’, loomi Natiro, kumua den sia manii buanna dio Nakabu’tui! Iatonna saemo lako, tae’ bangra apa Nakabu’tui, sangadinna daunna manna! belanna tae’pa naallu’na ara membua.

¹⁴Ma’kadami lako nakua: Da’mo naden len tau ungkandei buammu sae lakona. Narangimi anak gurunNa te kada iate.

¹⁵Rampomi lako Yerusalem. Iatonna malemo Yesu tama to’ Banua Kabusungan, Naparandukmi urrambai tu to ma’baluk sia to mangalli dio to’ Banua Kabusungan, Nabalittua’ tu mai medana to ussapi’ doi’, sia o’koranna to ma’baluk bu’ku’.

¹⁶Sia tae’ Natangga’i tu tau misa’ duka umbaa oongan banua unnolai tu to’ Banua Kabusungan.

¹⁷Mangada’imi sia Nakua lako tu tau: Tang mangkamoraka disura’ kumua: Iatu banuangKu la disanga banua passambayanganna mintu’ bangsa? Apa mipadadimo kamu lo’ko’ pa’gora’.

¹⁸Narangimi mintu’ pangulu to minaa sia pandita Sura’ tu kada iato, undaka’mi tangnga’ la morai ussanggangi; apa mataku’ tinde tau lako, belanna mintu’na tau umpotirambanni tu pangadaranNa.

¹⁹Iatonna makaroenmo sunmi lan mai kota.

²⁰Iatonna melambi’ anna lendu’ indeto dio, nakitami tu kayu ara marangkemo sae lako uaka’na.

²¹Nakilalaimi Petrus tu iannato, nakuami lako: O Rabbi tiromi marangkemo tu kayu ara Migatai.

²²Mebalimi Yesu sia Nakua lako tau: Patonganni tu Puang Matua.

²³Tonganna tongan, Kukua mati’, minda-minda tu ma’kada lako te buntu kumua: Tiangka’ko ammu tipemparrak rokko tasik! natae’ nabata lan penaanna sangadinna nakatappa’i kumua la dadi tu napokadanna, manassa dadi duka tu napokadanna.

²⁴Iamoto Kukua mati’: Apa-apa tu miando sia mipalaku, iake mikatappa’i kumua mitarimamo, manassa la miappa’.

²⁵Iake ke’de’komi massambayang, pagarri’i salana ke denni to mikalia-lia, anna pa’dei dukai Ambe’mi dao suruga tu mintu’ salami.

²⁶Apa iake tae’ mipagarri’i, tae’ duka Napa’dei Ambe’mi dao suruga tu mintu’ salami.

²⁷Sae pole’omi lako Yerusalem. Marassanmo tu Yesu sumalong-malong lan to’ Banua Kabusungan, saemi lako Kalena tu pangulu to minaa sia pandita Sura’ sia pekaamberan

²⁸sia ma’kada lako nakua: Kuasa apara Mipokuasa umpogau’i tu mintu’na te? Ba’tu mindara umpakuasaKomi la umpogau’i tu mintu’na te?

²⁹Nakuami Yesu lako tu tau: Aku duka den misa’ la Kupekutanan lako kalemi; pebaliimi mai, angKu pokadan dukakomi kumua kuasa apara, Kupokuasa umpogau’i tu mintu’nate.

³⁰Iatu pa’dio’na Yohanes, lu daoraka mai suruga, ba’tu lu dioraka mai tolino? Pebaliimi mai.

³¹Nasitangnga’-tangnga’i kalenami tinde tau, nakua: Iake la takua: lu dao mai suruga, inang la Nakua: nama’apai anna tae’ mipatonganni?

³²Na iake la takua: lu dio mai tolino — ; mataku’ tinde tau lako to buda, belanna mintu’na tau ussangai nabi tongan tu Yohanes.

³³Mebalimi tinde tau lako Yesu, nakua: Tae’ kami kiisanni. Nakuami Yesu lako tinde tau: Iake susito tae’ duka Kumorai umpokadangkomi kuasa apara Kupokuasa umpogau’i tu mintu’na te.