Read Toraja-Sa'dan MARKUS 12 Bible Online

MARKUS 12 - Toraja-Sa'dan bible

MARKUS 12

¹Naparandukmi Yesu ma’kada lako tinde tau unnala pa’pasusian Nakua: Den misa’ tau mantanan anggoro’ lan misa’ pa’lak, narompoi tiku lao, sia nagaraga tu pa’parran anggoro’ sia napabendan tu barung malangka’ misa’, napa’petesananni lako to ma’tesan nake’de’ lako tondok senga’.

²Iatonna la peanggorosammo nasuami tu kaunanna misa’ lako tu to ma’tesan, kumua natarimai tu bura pa’lak anggoro’na dio mai tu to ma’tesan.

³Nala’ka’imi to ma’tesan tinde tau nalonga’i sia narambai lo’bang lan mai.

⁴Sia nasua pole’ loo lako tu kaunan senga’ misa’, apa nalonga’ duka tu ulunna sia napakasiri’.

⁵Nasua pole’omi tu to senga’, napatei tu tau iato, sia budapa tu to senga’ nasua, na iatu tau iato den pira nalonga’ den pira napatei.

⁶Den siapa tau dio kalena misa’, iamotu anakna muane napakaboro’; ma’katampakanna iami nasua loo lako tau iato mai, belanna nasanga: inang la nakasiri’ sia te anakku.

⁷Apa nakuaora sipa’kada-kada tinde to ma’tesan: Indemo tu la umpoapai; maikomi tapatei, anna kita umpoapai tu apanna.

⁸Nala’ka’imi sia napatei, napembuanganni lan mai pa’lak anggoro’ lako salian.

⁹Apara la napogau’ tu puangna tinde pa’lak anggoro’? La sae ussanggangi tu to ma’tesan, nabenni to senga’ tu pa’lak anggoro’.

¹⁰Tae’raka mibasai te kada iate lan mai Sura’ Madatu kumua: Iatu batu natibe pande mendadi batu petau;

¹¹Susimoto Napogau’ Puang, na iatu iannato memangngan ke pentirota.

¹²Undaka’mi lalan tinde tau la untingkan Yesu, apa mataku’ lako tau buda, belanna natandai kumua iatu pa’pasusian iato, gau’na Naparuai. Napopa’elo’nami namale.

¹³Nasuami tinde tau lako Yesu ba’tu pira-pira tu to Farisi sia to Herodian, la umpetilende’i tu kadanNa.

¹⁴Saemi tinde tau, nakua lako: O Guru kiissan kumua to manappa’Komi sia tae’ tau Milaenan, belanna tae’ Mimentiro lindo lako tau, sangadinna lalanna tongan bang Puang Matua Mipa’pangadaran. Sipaturaka disorong tu sima lako datu kapua, tae’raka? La kisorongraka, tae’raka?

¹⁵Apa belanna Natandai Yesu tu tangnga’ leko’na tinde tau, Nakuami ungkuanni: Ma’apai ammi toba-tobaNa’? BanNa’ mai tu dinar misa’, angKu tiroi.

¹⁶Nabaami. Nakuami Yesu lako tinde tau: Mindara rupa te sia mindara passura’ te? Nakuami tu tau mebali: datu kapua.

¹⁷Nakuami Yesu lako tau iato mai: Iamoto dadi pennoloanni lako datu kapua tu apanna datu kapua sia lako Puang Matua tu apanNa Puang Matua. Napomangami tinde mai tau tu Yesu.

¹⁸Saemi ba’tu pira-pira to Saduki lako Kalena — tu umpokadai kumua: tae’ ia katuoan sule — anna mekutana lako, nakua:

¹⁹O Guru, mangkamoki’ nasurasan Musa te pepasan iate, kumua: iake denni siulu’na tau mate, anna den bainena natampe, apa tae’ nakianak, la napobaine siulu’na tu bainena anna pabu’tuanni bati’ tu siulu’na.

²⁰Den tau pitu massiulu’. Kebainemi tu pa’bunga’na, apa mate natae’ anak natampe.

²¹Iami tu sidampi’na umpobainei, namate tae’ anak natampe; susi dukato tu ma’pentallunna.

²²Tae’ bangi sola pitui untampe anak; undinna tonna mate nasangmo to, mate dukami tinde baine.

²³Dadi iake allo katuoan sule to, umbannamo tinde tau sola nasang la umpobainei tinde baine? Belanna mangkamo sola pitui umpobainei.

²⁴Mebalimi Yesu sia nakua lako tau iato mai: Tang iaraka mipopusa te iannate, belanna tae’ miisanni la lanna Sura’ Madatu, la kuasanNa Puang Matua?

²⁵Belanna iake malimbangunmi sule dio mai to’ to mate, tae’mo nala kebaine sia dipakemuane, sangadinna susi bangmo malaeka’ dao suruga.

²⁶Apa iatu diona to mate kumua dipatuo sule, tae’raka mibasai lan sura’na Musa tu dininna umpokadai tu diona to’ duri, tumba tu kadanNa Puang Matua lako, Nakua: Akumote tu Puangna Abraham sia Puangna Ishak sia Puangna Yakub?

²⁷Iatu Puang Matua tangia Puangna to mate, sangadinna to tuo. Lendu’ tonganmo pusammi.

²⁸Saemi misa’ pandita Sura’, tu urrangimi tumba tu kasitamben-tamben kadanna tinde tau anna naissanmo kumua Napebalii melo Yesu, ia pole’omi ungkutanai, nakua: Umbannara tu garonto’na tongan tu ParentaNa Puang Matua?

²⁹Nakuami Yesu mebali lako: Iatu garonto’na parenta inde sia; Perangiimi, o Israel, Iatu Puang Kapenombanta Iamo Puang Misari;

³⁰la ponno penaammu sia mintu’ tangnga’mu sia padami kamatotorammu sae lako deatammu la ungkamali’ Puang Kapenombammu.

³¹Na iatu ma’penduanna inde sia: La mukamasei tu padammu tolino susi batang kalemu. Tae’mo tu parenta senga’ undaoanni te parenta iate da’dua.

³²Nakuami tu pandita Sura’ lako: Io tonganna, Guru, manassa tu mintu’ kadamMi kumua iatu Puang Matua Misari sia tae’ senga’na sangadinna Ia manna;

³³sia iatu ponno penaa sia mintu’ tangnga’ sia padami kamatotoran sae lako deata la ungkamali’ Puang Matua, sia ungkamasei padanta tolino, ondong ia to na iatu mintu’ pemala’ ditunu pu’pu’ sia pemala’ pangrere’.

³⁴Iatonna tiroi Yesu kumua kinaa mebali, Nakuami lako: Tae’mo mimambela dio mai ParentaNa Puang Matua. Tae’ bangmi tau misa’ duka barani mekutana pole’lako.

³⁵Ma’kadami tu Yesu tonna mangada’i lan Banua Kabusungan, sia Nakua: Matumbai nakua tu pandita Sura’, kumua Anakna Daud tu Kristus?

³⁶Daud kalenamo ma’kada belanna pa’patudu-tudunNa Penaa Masallo’ kumua: Nakuamo Puang lako Puangku: Unno’ko’Komi dio kananKu sae lako Kupadiongna nasang to’ lentekMi tu ualimMi.

³⁷Daud kalenamo umpekapuangi, umba nakua nala ia pole’o napoanak? Budami tu tau lendu’ naporainna umperangii.

³⁸Napokadami lan pangadaranNa kumua: Kanandaikomi kalemi dio mai pandita Sura’, tu naporai bang male sumalong ma’bayu lamba’ sia morai bang dipekatabe’i dio lu pasa’,

³⁹sia naporai unno’ko’ dio kao’koran mala’bi’ lan banua pa’kombongan sia inan madaoan lan pa’maruasan;

⁴⁰sia unnimbakan iananna baine balu, sia naangga’-angga’i umpamalambe’ passambayangna; iatu tau susito mandu la narua tampak ropu.

⁴¹Unno’ko’mi tu Yesu untingoi patti doi’ pa’kamasean, sia untiro to buda umpatama doi’ tama patti doi’ pa’kamasean; ba’tu pira-pirami tu to sugi’ umpatama doi’ buda.

⁴²Sae dukami misa’ baine balu kalala’, napatamai tu doi’ bittik da’dua, misa doi’ kalebu angga’na da’dua doi’ bittik.

⁴³Natambaimi tu anak gurunNa sia Nakua lako: Kukua lako Kalemi: Tonganna losong ia napa’bengan te baine balu kalala’ iate na iatu tau mintu’, tu umpatamanna doi’ tama te patti doi’ pa’kamasean.

⁴⁴Belanna iatu tau sola nasang la’binnapi nanii unnalai tu napatamanna, apa iate baine iate kataeranna napatama nasangi tu diona kalena tu la napotuona.