Read Toraja-Sa'dan MARKUS 13 Bible Online

MARKUS 13 - Toraja-Sa'dan bible

MARKUS 13

¹Iatonna sunmo Yesu lan mai Banua Kabusungan, nakuami anak gurunNa misa’ lako: O Guru, tiromi lendu’ ia melona te batu iate sia lendu’ ia kapuanna te panggaraga iate!

²Nakuami Yesu lako: Mupemaranga tonganmoraka garaganna te banua pua iate? Moi misa’ batu tae’ duka la torro mettodo’ dao batu senga’, tu tang la diseranna.

³Tonna unno’ko’ tu Yesu dao buntu Zaitun sitingoan tu Banua Kabusungan, mekutana misami tu Petrus na Yakobus na Yohanes na Andreas lako, nakua:

⁴Pokadangkan piranda nala dadi tu mintu’nato sia apara tandana, to ke la dadi tu mintu’nato?

⁵Nakuami Yesu mebali lako sia Naparanduk ma’kada susite: Kanandai tonganni, da napapusakomi tau.

⁶Belanna buda tau la sae umposanga sangangKu, nakua: Akumote tu Kristus! iamoto tau iato tu la umpapusa buda tau.

⁷Iammi rangi diona kasirarian sia kareba kasirarian, da mitiramban belanna tae’ nasalai tang dadi tu mintu’nato, apa tae’pa nala katappurannato.

⁸Belanna bangsa la siea pada bangsa sia to sangkadatuan siea to sangkadatuan. Sia umba-umba nii la dadi lino’ sia karorian. Iamoto tu pamulanna mintu’ kamasussan.

⁹Apa iatu kamu kanandaikomi kalemi, belanna la nabaakomi tama kombongan ada’ sia la dibambakomi ulang lan lu banua pa’kombongan, sia la dipakendekkomi lako olona to maraa sia datu tu belanna Aku, la napotanda sa’bi tinde tau.

¹⁰Tae’ nasalai tang dipa’peissanan dolo tu Kareba kaparannuan lako mintu’ bangsa.

¹¹Apa ianna baakomi la lao napakendek, da miposelang doloi tu la mipokadanna, sangadinna iatu apa dikamaseangkomi ke attu iato, iamo mipokada, belanna tangia kamu tu la ma’kada-kada, sangadinna Penaa Masallo’.

¹²To siulu’ la ussorong penaanna siulu’na anna mate dipongko, sia ambe’ la ussorong penaanna anakna; sia pia la umbali indo’ ambe’na sia napa’pepatean.

¹³La nakabiri’komi mintu’ tau tu belanna sangangKu; apa minda-minda tu mengkabatta’ sae lako ma’katampakanna, iamo la dikarimmanni.

¹⁴Iammi kitai tu kamaparrangan megi’giran tu umpabu’tu kasanggangan, bendan dio inan tang sipatu — minda-minda tu umbasai natangnga’ mandalanni — ianna attu iato la mallai langan tanete tu to dio tana Yudea.

¹⁵Sia iatu to dao bubungan banua, da namengkalao rokko natama unnala ba’tu apa-apa lan mai banuanna.

¹⁶Sia iatu to dio pa’lakna, da nasule la unnala sambu’na.

¹⁷Apa upu’ allona tu to ma’tambuk sia to sumusupa anakna to attu iato.

¹⁸Massambayangkomi umpalakui da nasiappa’ attu kamadinginan tu kamallaiammi;

¹⁹belanna mintu’na allo iato la nanii bu’tu kadipakario-rioan, iatu susinnato tae’ bangpa nadadi len tempon dio mai tipamulanna mintu’na angge maritik tu Napadadinna Puang Matua sae lako te totemo, sia tae’ dukamo nala dadi len.

²⁰Iakenna tae’ Napakadomi’i Puang to attu iato, inang tae’mo tau misa’ duka la dikarimmanni; apa belanna mintu’ tu to ditonno’, tu mangka Natonno’, napoulangi Napakadomi’ to attu iato.

²¹Sia iake attu iato, naden tau ma’kada lako kalemi kumua: Tiromi indemo tu Kristus! ba’tu: Diomo tu Kristus! da mipatonganni to!

²²Belanna ba’tu pira-pira tu Kristus tang tongan sia nabi tang tongan la bendan, tu umpabu’tu tanda kalle-kallean sia penggauran memangngan, kumua anna ma’papusa moi na iatu to ditonno’, ke la ma’din siai.

²³Apa iate kamu te palan ara’i! mangka nasangmo Kupa’pakilalan dolo lako kalemi.

²⁴Apa iato attu iato ke mangkai kadipakario-rioan, la dipaliun tu allo sia ia duka tu bulan tae’ nala parrang.

²⁵Sia mintu’na bintoen dao langi’ la ronno’, sia mintu’na kamatotoran dao langi’ la tigega’.

²⁶Attu iato la nakita tu Anak rampan dilino sae dao gaun situang kamatotoran kapua sia kamala’biran.

²⁷Namane ussuai tu malaeka’Na sia urrampunni tu mintu’ to Napilei dio mai matallo matampu’ lo’ mai engkokna padang sae rekke ulunna langi’, dio mai randanna lino sae lako randanna langi’.

²⁸Alai rapangan dio kayu ara: ianna mentarukmo takke’-takke’na sia mellolo, inang miissan bangmo kumua la madomi’mo pealloan.

²⁹Ten dukamoto tu kamu, iammi tiromi dadi tu mintu’nato, issan bangmi, kumua merreke’mo dio to’ ba’ba tu iannato.

³⁰Tonganna tongan Kukua lako kalemi: Bangsa iate tae’ nala pa’de, ke tae’pi nadadi tu mintu’nato.

³¹Iatu langi’ sola lino la pa’de, apa iatu kadangKu tae’ nala pa’de.

³²Apa iatu allona ba’tu attunna tae’ tau misa’ duka untandai, moi na iatu mintu’ malaeka’ dao suruga tae’ duka, ba’tu moi na iatu Anak tae’ duka, sangadinna Ia manna tu Ambe’.

³³Mainga’ tongankomi, ma’penandakomi sia massambayangkomi, belanna tae’ miissanni, piranra tu attunna to.

³⁴Iatu iannato susi misa’ to male lako padang mambela, untampe banuanna sia napakuasa tu mai kaunanna, sia pantan napatakoi pengkaranganna, anna mepasan lako to ma’kampa ba’ba, kumua anna ma’penanda-nanda.

³⁵Iamoto dadi ma’penandakomi, belanna tae’ miisanni, piranra nala sae tu ampu banua, ba’tu makaroenraka, ma’tangngaraka bongi, unnoniraka manuk, melambi’raka.

³⁶Kumua nakelokomi manii tu kasaeanna, anna kabu’tuikomi mamma’.

³⁷Iatu kupokadannakomi, ia dukamo Kupokada lako mintu’ tau to kumua: Ma’penanda-nandakomi!