Read Toraja-Sa'dan MARKUS 14 Bible Online

MARKUS 14 - Toraja-Sa'dan bible

MARKUS 14

¹Duang allopa namane allo Pasa sia allona roti tang diragii; undaka’mi lalan tu pangulu to minaa sia pandita Sura’ la morai untangnga’ Yesu natingkanNi sia napatei.

²Belanna nakua tinde tau: Da’na ia ke allo kapua, da’ namaramba tu tau.

³Iatonna dio Betania tu Yesu lan banuanna Simon golenan, marassanmo kumande, saemi misa’ baine sibaa tonde gori-gori pualam nanii minna’ pandere’ narawastu massang sia masuli’ allinna; napoloi tu tonde gori-gori nabolloanni dao ulunna Yesu.

⁴Denmi ba’tu pira-pira tau umpobang-ngo ara’i tu iannato sia sipa’kada-kada, nakua: Ma’apari nadipakasala-sala punala bangra tu minna’ pandere’?

⁵Belanna iake dibalukanni, inang la la’bi tallu ratu’ dinar allinna nama’din dipa’kamasean lako to makario-rio. Sengkemi tinde tau lako.

⁶Apa nakua Yesu: Popa’elo’nai ia; ma’apari ammi sussai? kameloan ia tu napogau’ lako Kaleku.

⁷Belanna iatu to makario-rio tontong siakomi sisola, sia iake moraikomi, ma’dinkomi umpogau’ kameloan lako tau iato mai, apa iate Aku te tae’ tala sola nenne’.

⁸Iate baine iate napogau’mo tu napengkulleinna; iamotu umbolloi minna’ tu Kaleku butung to mate ke la dipeliangi, su’ding tae’pi Kudipeliang.

⁹Tonganna Kukua lako kalemi; umba-umba nanii lan te lino dinii umpa’peissanan Kareba kaparannuan, dio duka dinii unnannanni batu silambi’ tu penggauranna te baine.

¹⁰Iatu Yudas Iskariot siposangpuloduanna anak gurunNa Yesu, male lako pangulu to minaa la umpa’peturoanNi lako tu Yesu.

¹¹Parannumi urrangii tu iannato, na allu’i la umbenni doi’. Undaka’mi tangnga’ tu Yudas umba nakua la umpa’peturoanNi lan attu melo.

¹²Iatonna bunga’na allo kapua dinii ungkande roti tang diragi, tonna ditunu tu anak domba Pa’pasa, nakuami tu anak gurunNa lako: Umbara tu Miporainna la kinii loo umpasakka’i tu Pa’pasa amMi kandei?

¹³Nasuami tu anak gurunNa da’dua sia Nakua ungkuanni: Loomokomi tama tondok, ammi sitammu misa’ tau umbaa busso nanii uai lan, undikomi urrundu’i.

¹⁴Umba-umba nanii tama, la mikua lako tu ampu banua: Nakua Guru: Umbara tu inan la Kunii ungkande Pa’pasa sola anak gurungKu?

¹⁵Anna pakitangkomi misa’ tu inan malona’, tiangka’ langnganna, sakka’ nasangmo tu pengkarangan dio; iamo minii umpasakkarangki’ to tu Pa’pasa.

¹⁶Malemi tinde anak gurunNa narampo tama kota, nakabu’tui susitu Napokadanni, napasakka’i tu Pa’pasa.

¹⁷Iatonna bongimo saemi tu Yesu sola anak gurunNa sangpulo dua.

¹⁸Marassanmo unno’ko’ kumande, Nakuami Yesu: Kukua lako kalemi, tonganna denkomi misa’ te Kusisolanna unno’ko’ kumande, la umpa’peturoanNa’.

¹⁹Randukmi pantan masussa, nasisonda-sonda ma’kada nakua: Akuraka?

²⁰Nakuami ungkuanni: Misa’komi te tau sangpulo dua, tu Kusangbarasan pada unnoton roti rokko pindan.

²¹Inang la Natampena Anak rampan dilino te lino, susitu disura’ diona a’ganNa, apa upu’ allona tu to umpa’peturoanNi tu Anak rampan dilino; la’bi’ pissan ia kenna tae’ nadadi tu tau iato.

²²Marassanmo kumande, Naalami Yesu tu roti Nasambayangi, Natepu-tepui Nabenni, Nakua: Alami, mikandei, iamote tu batang kaleKu.

²³Namane unnangkaranni tu irusan, Nama’kurre sumanga’ sia Naben, nairu’i sola nasangi.

²⁴Nakuami ungkuanni: Iamote tu raraKu, tu rara titanan basse, dipato’do belanna buda tau.

²⁵Kukua lako kalemi: Tonganna tae’mo Kula unniru’ len uai bua anggoro’ sae lako Kuiru’na pole’ tu ba’runna lan ParentaNa Puang Matua.

²⁶Iatonna mangkamo umpopenani pa’pudian, sunmi sola nasangi ma’palulako buntu Zaitun.

²⁷Nakuami Yesu ungkuanni: La mo’dong penaakomi sola nasang, belanna den disura’ kumua: La kubamba tu to mangkambi’, anna sisarak-sarak tu mintu’ domba.

²⁸Apa undinna ke malimbangunMo’ sule, la Kudoloikomi male lako Galilea.

²⁹Nakuami Petrus lako: Moi mo’dong penaa nasangi tinde mati’, apa aku aku tae’.

³⁰Nakuami Yesu ungkuanni: Kukua mati’, tonganna totemo ia bangsiamote bongi iate tae’pa napenduan manuk unnoni, ammu peongannimo’ pentallun.

³¹Apa nakuaora ma’kada: Moi angku pada mate Puang, inang tae’ angku la umpeonganni lenKomi. Susi dukato tu kadanna tinde tau sola nasangi.

³²Rampomi lako inan disanga Getsemani; Nakuami lako anak gurunNa: Unno’ko’komi inde te, Kuloopa massambayang.

³³Nasolanmi tu Petrus na Yakobus na Yohanes, saemi kamagiangan lako Kalena sia samapuppa-puppanna penaanNa.

³⁴Nakuami lako tinde tau: Lendu’ masussanna penaangKu, kari’ la matemo’ Kusa’ding, torromokomi inde te, ammi ma’penanda bang.

³⁵Malemi mambela-bela sidi’, Natukku malinguntu’ rokko padang sia massambayang kumua, ke ma’dinni anna tilendok dio mai Kalena tu attu iato.

³⁶Nakuami: Abba, o Ambe’, mintu’na angge maritik lan nasang kuasamMi, lendokanni dio mai Kaleku te irusan iate, apa iatu iannato tangia pa’poraiangKu sangadinna pa’poraiamMi.

³⁷Saemi Nakabu’tui tinde tau mamma’, Nakuami ungkuan Petrus: E Simon mamma’rokoka? Tang mubela siamoraka la maroya sangte’te’ bang?

³⁸Ma’penandakomi sia massambayangkomi, da naruakomi peroso; la morai tongan sia tu penaa, apa tang pa’bela tu kale.

³⁹Male pole’omi tu Yesu Namassambayang, ia bangsia tu kada ina’ Napokada.

⁴⁰Iatonna sule pole’mo Nakabu’tuimi tinde tau mamma’omo sule, belanna turruk bang matanna, sia tae’ naissanni, apa tu la napebalii lako.

⁴¹Saemi tonna ma’pentallunna Nama’kada lako tinde tau Nakua: Mamma’ bangmokomi mipamondo ta’ka’mi; totemo ganna’mo; nalambi’mo attunna; tiromi tu Anak rampan dilino disorong lako to kasalan.

⁴²Millikkomi, talao, tiromi mandappi’mo tu to la umpa’peturoanNa’.

⁴³Marassan bangsiapa ma’kada-kada to, ta’pa saemi tu Yudas siposangpuloduanna tu anak gurunNa, sia budapa tau nasisolan ma’takin sia ma’tarasulu’ nasua pangulu to minaa sia pandita Sura’ sia pekaamberan.

⁴⁴Iatu to la umpa’peturoan Yesu inang mangkamo napokadan tanda tinde tau, nakua: Minda-minda tu kuudung, Iamoto; tingkanNi ammi matangkin male umbaai.

⁴⁵Saemi nata’pa umpentireke’i Yesu sia nakua lako: O Guru!, naudungI.

⁴⁶Pada nasila’ka’-la’ka’imi tau, natingkanNi.

⁴⁷Denmi misa’ tu to ke’de’ dio unnonok la’bo’na, napama’tanni naruai tu kaunanna Tominaa Kapua, natantangi tu talinganna.

⁴⁸Ma’kadami Yesu Nakua lako tau iato mai: Susikomi to sun la urrukka’ pa’gora’ma’takin sia ma’tarasulu’ la untingkanNa’.

⁴⁹Keallo-keallo misisolanNa’ lan lu Banua Kabusungan mangada’i; natae’ra mitingkanNa’; — apa tae’ nasalai tang disundunni tu dipokadanna lan Sura’ Madatu.

⁵⁰Male nasangmi mallai tu anak gurunNa, untampeI.

⁵¹Denmi misa’ to mangura undi urrundu’ Yesu, pakari sambu’ kasa lan kalena, nala’ka’i tau iato mai.

⁵²Apa nalendokan tu sambu’na, nama’kale-kale male mallai.

⁵³Nabaami tinde tau tu Yesu lako Tominaa Kapua; iamo dio to, nanii sirampun mintu’ pangulu to minaa sia pekaamberan sia pandita Sura’.

⁵⁴Iatu Petrus undi duka unturu’ mambela bangI sae tama to’ banuanna Tominaa Kapua, naunno’ko’ sisola solana tominaa kapua sia mendarang dio to’ api.

⁵⁵Iatu pangulu to minaa sia mintu’ Ada’ undaka’ bang sa’bi la umpasala Yesu la morai umpatei, apa tae’ nakabu’tui.

⁵⁶Belanna buda tau tama sa’bi tang tongan ussa’bii, apa mintu’na sa’bi iato tae’ bang situdu.

⁵⁷Denmi ba’tu pira-pira tau ke’de’ sia ussa’bii tang tonganni, nakua:

⁵⁸Kirangimo tu kadanNa tau iate kumua: La Kurondonni te Banua Kabusungan tu nagaraganna limanna tolino na tallung allori Kupabendanni tu Banua Kabusungan senga’, tu tangia panggaraga lima tolino.

⁵⁹Moi susito tae’ duka nasitudu passa’binna tinde tau.

⁶⁰Ke’de’mi tu Tominaa Kapua male tama tangnga sia nakutanai tu Yesu nakua: Tae’ bangraka Mila umpebalii lenni? Apara te nasa’biangKomi tau?

⁶¹Apa ma’loko-loko bang, tae’ bang Napebalii lenni. Natole pole’omi tu Tominaa Kapua mekutana lako nakua: Tongannaraka Kamumo tu Kristus, AnakNa Puang dipenombai?

⁶²Nakuami Yesu: Aku bangsiamo; la mikita tu Anak rampan dilino unno’ko’ dio kananNa Toumpoissan angge maritik sia songlo’ sola gaun dao mai langi’.

⁶³Usse’bumi pakeanna tu Tominaa Kapua sia nakua: Apa opa gai’na tu sa’bi lako kaleta?

⁶⁴Mirangimo tu kada solangna. Tumbara timbangan penaammi? Nasituru’imi sola nasangi kumua: sala sia sipatu la dipatei.

⁶⁵Randukmi tinde tau pira untittudui sia umbungku’i tu lindoNa sia natambusuk sia nakua ungkuanNi: Ma’nubua’moKomi! Pantan natampa’mi solana tominaa kapua tu lindoNa.

⁶⁶Iatonna diong padang tu Petrus dio tarampak banua kombongan kalua’na Ada’, saemi misa’ baine rurananna Tominaa Kapua.

⁶⁷Iatonna kitami tu Petrus mendarang, napemarangami sia nakua: Iko duka tu Nasisolan titi’ Yesu, to Nazaret.

⁶⁸Apa napeonganni Petrus sia nakua: Tae’ aku kuissanni sia tae’ kutandai tu kadammu tu. Malemi sun lako to’ babangan, pakalan naunnonimo manuk.

⁶⁹Nakitami tinde kaunan baine, nakua pole’omi lako mintu’ tu to ke’de’ dio: Ia dukapa misa’ te, tu solana tu Tau tu.

⁷⁰Apa napeonganni siao. Sattu’-sattu’ to ma’kada pole’omi lako Petrus tu to ke’de’ dio, nakua: Tonganna iko dukapa tu Nasisolan, belanna to Galilea dukako.

⁷¹Randukmi tu Petrus untangdoi tu kalena sia menggata nakua: Tae’ aku kutandai tu To mipokada.

⁷²Ma’kukkua bang siami duka tu manuk unnoni ma’penduan to attu iato. Tilanta’mi lan penaanna Petrus tu kada Napokada Yesu lako, to kumua: Tae’pa napenduan manuk unnoni ammu peonganniMo’ pentallun. Iatonna kilalai to, tumangi’mi.