Read Toraja-Sa'dan MARKUS 15 Bible Online

MARKUS 15 - Toraja-Sa'dan bible

MARKUS 15

¹Tae’pa bongi tonna la masiangmo nara’ta’mi pangulu tominaa sia pekaamberan sia pandita Sura’, iamotu mintu’ to ma’kombongan, napungoI tu Yesu, namale umbaaI, nasorongI lako Pilatus.

²Mekutanami Pilatus lako, nakua: Kamumoraka tu datunna to Yahudi? Nakuami mebali: Susimo tu mipokadanna.

³Budami kara-kara naparapasanni pangulu to minaa.

⁴Mekutana pole’omi tu Pilatus lako, nakua: Tae’ bangraka Mila mebali len? Tiromi, pira ia budanna tu kara-kara naparapasangKomi tau!

⁵Apa tae’ bangmora misa’ duka Napebalii Yesu, anna mangnga tu Pilatus.

⁶Iake allo kapuaomi biasa tu Pilatus umpatassuranni misa’ to ditarungku tu tau, minda-minda napalaku.

⁷Denmi tu tau misa’ disanga Barabas, tu ditarungku sola mintu’ tu to nasisolan ma’pamaramba, sia umpatei tau lan kamaramban iato.

⁸Sangkendekammi tu to buda anna randuk umpalakui kumua napalaloanni susitu biasanna.

⁹Nakuami Pilatus mebali lako tu tau: Morairokomika kurampananangkomi tu Datu to Yahudi?

¹⁰Belanna naissan kumua ia sia nasorongI pangulu to minaa, apa kamabirisanna lako.

¹¹Apa napatunduk pangulu to minaa tu to buda kumua, la’bi’ ke ia tu Barabas natassuranni.

¹²Nakuaomi Pilatus mebali lako tu tau; Naapara pale’ la kugauranNi te To misanga Datunna to Yahudi?

¹³Rambanomi metamba tu tau nakua: A’ta’I Ia tu.

¹⁴Nakuami Pilatus lako tu tau: Kaka- dakean apara tu napogau’? Apa sama- sarrang-sarrangna metamba tu tau nakua: A’ta’I Ia tu!

¹⁵Belanna nasanga Pilatus la’bi’ ke naparundu’i tu lalan penaanna to buda, natassurammi tu Barabas, nabambaI ulang tu Yesu sia nasorong la dia’ta’.

¹⁶Denmi ba’tu pira-pira surodadu umbaaI tama sa’de banua, tu banua pangra’tasan kara-kara, narampun nasangi tu mintu’ surodadu sang- tuntunan.

¹⁷Napaluangimi sambu’ lango-lango tu Yesu sia naampinniran sa’pi’ duri, napasa’pi’I.

¹⁸Anna randuk umpekatabe’I, nakua: Tabe’, Datu to Yahudi!

¹⁹Nalonga’mi tallang tu ulunNa sia natittuduI, namalinguntu’ umpenombaI.

²⁰Iatonna mangka untelle-telleI, naalaimi lan mai Kalena tu sambu’ lango-lango napaluangi sule tu pakeanNa siamo, namale umbaaI lako salian, kumua anna a’ta’I.

²¹Lendu’mi dio misa’ tu to lu dio mai pa’lak, disanga Simon to Kirene, ambe’na Iskandar sola Rufus, naparukumi umpassanni tu kayu pea’ta’.

²²Nabaami tu Yesu lako to’ inan disanga Golgota, ke dipallemba’i battuananna: Inan ma’kararo ulu.

²³Napairu’mi uai anggoro’ dipasito’bo’ muru, apa manoka.

²⁴Naa’ta’mi, nataa-taai tu pakeanNa nasire’tekki kumua napada unnalai tu la napotaanna.

²⁵Te’te’ kasera melambi’ anna dia’ta’.

²⁶Iatu diparapasanni disura’ daona lu nakua: Datu to Yahudi.

²⁷Napasia’ta’mi pa’gora’ da’dua, misa’ dio kananNa na misa’ dio kairinNa.

²⁸Nasusi to, sundunmo tu kada lan Sura’ Madatu, tu nakua: Dipasangbilangammo to masua-sua.

²⁹Iatu to lendu’ inde to dio ullo’bo-lo’boI sia unniling-iling, nakua: Ai’! iti’ To urrondonni Banua Kabusungan natallung allori Napabendanmi suleo!

³⁰Lessuran kalenamika tu Kalemi, amMi mengkalao dao mai tu kayu pea’ta’!

³¹Ten dukato tu pangulu to minaa sia pandita Sura’ untelle-telleI, sia nakua sipa’kada-kada: Nalessurammo tu to senga’, anna Kalena tae’ Nabelai ullessuranNi!

³²E Kristus, Datu to Israel! mengkalaomoKomi dao mai kayu pea’ta’, angki kitai sia kipatonganni. Iatu to Nasisolan dia’ta’ untelle-telle dukaI.

³³Iatonna te’te’ sangpulo dua ma’tangnga allo, malillinmi tu mintu’ padang indeto dio sae lako te’te’ tallu makaroen.

³⁴Iatonna te’te’ tallumo, metambami tu Yesu umpemandui gamaranNa, Nakua: Eloi, Eloi, lama sabakhtani?, ke dipallemba’i battuananna: O PuangKu, o PuangKu ma’apari MitampemoRa’?

³⁵Iatonna rangii ba’tu pira-pira tau tu ke’de’ indeto dio, nakuami: Perangiimi, untambaimo Elia!

³⁶Ma’dondomi tu tau misa’ unnotonni tama sukka tu lumu’ batu, napadioi tallang napairu’I, nakua: Da’ito takitai ba’tu la saei tu Elia umpopengkalaoI.

³⁷Apa metamba tu Yesu umpemandui gamaranNa, naka’tu penaanNa.

³⁸Iatu kulambu Banua Kabusungan tipa’dua, tempon dao mai sae rokko.

³⁹Iatonna kitai tinde kamandang Nasitingoan tu kaka’tuanna penaanNa susito, nakuami: Tonganna tongan Anak Puang te tau iate!

⁴⁰Denmi ba’tu pira-pira baine dio untiro mambelai; indeto tau iato, den Maria Magdalena sia Maria indo’na Yakobus Bitti’ sia Yoses sia Salome.

⁴¹Tau undi nasang urrundu’ Yesu sia umparakai tonna diopa Galilea; sia buda dukapa baine senga’ to Nasisolammo male langngan Yerusalem.

⁴²Iatonna makaroenmo belanna allo iato allo dinii Ma’pasakka’, iamotu allo sidampi’ allo katorroan,

⁴³saemi tu Yusuf to Arimatea, iamo misa’ to diala Ada’ sia dikasiri’, ia dukamo umpeagi bang ParentaNa Puang Matua; iamo umpabatta’ penaanna tama mennolo lako Pilatus napalakui tu batang rabukna Yesu.

⁴⁴Apa mangnga tu Pilatus tu kumua matemo, natambai tu kamandang sia nakutanai kumua, ba’tu masaimi mateNa.

⁴⁵Iatonna issanmi dio mai kamandang, naeloranmi naala Yusuf tu batang rabukNa.

⁴⁶Naallimi Yusuf tu kasa, napopeng-kalaoi tu batang rabukna Yesu, na balunni sampin kasa napeliangi tama liang; namane ullentenni batu lako tu baba liang.

⁴⁷Iatu Maria Magdalena sia Maria indo’na Yoses, nakita tu dinii umpeliang Yesu.