Read Toraja-Sa'dan MARKUS 16 Bible Online

MARKUS 16 - Toraja-Sa'dan bible

MARKUS 16

¹Iatonna lendu’mo tu allo katorroan unnallimi pebangki’ tu Maria Magdalena sia Maria indo’na Yakobus na Salome, kumua naloo umbangki’I.

²Iatonna tibaan masiang tonna allo bunga’na lan minggu iato, saemi tinde tau lako to’ liang tonna dellekmo allo.

³Nakuami sipa’kada-kada: Mindamo la ullentenangki’ tu batu dio mai to’ baba liang?

⁴Iatonna umbangunan matanna, nakitami tu batu mangkamo dilentenni — , belanna iatu batu iato lendu’ kapuanna.

⁵Malemi tinde tau tama liang, nakitami tu to mangura misa’ unno’ko’ dio rampe kananna, ma’sambu’ mabusa; tirambanmi tinde baine.

⁶Nakuami tinde to mangura lako: Da mitiramban; undaka’komi Yesu to Nazaret, tu mangka dia’ta’. Malimbangunmo Ia, tae’mo Ia naindete; tiromi tu naninna tau umpatorroI.

⁷Apa laomokomi, mipokadai, lako mintu’ anak gurunNa sia lako Petrus, kumua Nadoloimokomi male lako Galilea; diomo la minii ungkitaI susitu kadanNa lako kalemi.

⁸Tikara-karami sun namale ma’dondo-dondo dio mai to’ liang, belanna ma’parondo sia soyang sumanga’; tae’ bang napokada lenni lako misa’ duka tau, belanna mataku’.

⁹Iatonna malimbangunmo tu Yesu tae’pa bongi tonna allo bunga’na lan minggu iato, bunga’na umpa’pekitanammi Kalena lako Maria Magdalena, tu mangkamo Nanii urrambai deata masussuk pitu lan mai kalena.

¹⁰Malemi tinde baine umpa’peissananni tu iannato lako mintu’ tu to unturu’mo Yesu, tu masussa bangmo sia tumangi’.

¹¹Iatonna rangimi kumua tuomo sule, sia nakitamo tinde baine, tae’mi napatonganni tinde tau.

¹²Undinnato umpa’pekitananomi Kalena, apa umpasenga’ rupanNa, lako da’duai tinde tau, tonna male sola duai lako tondok salian.

¹³Male dukami tinde tau sola duai umpa’peissananni tu iannato lako tu mintu’ to unturu’I, apa iatu tau iato tae’ duka napatonganni.

¹⁴Undinna pole’o to umpa’pekitanammi kaleNa lako anak gurunNa sangpulo misai, marassan unno’ko’ kumande, Nata’tanmi, belanna tangkan ma’patongan sia makarra’ penaanna, naurunganni tang umpatonganni tu to mangka ungkitaI tonna malimbangunmo.

¹⁵Nakuami ungkuanni tinde tau: Malemokomi lako mintu’na lino, mipa’peissananni tu Kareba-kaparannuan lako angganna issinna lino.

¹⁶Minda-minda tu umpatonganni sia didio’, iamo la dikarimmanni, apa minda-minda tu tang umpatonganni, iamo la diukung.

¹⁷Mintu’nate tanda iate la urrondongi tu to ma’patongan: diona sangangKu anna la urrambai deata masussuk sia la ma’kada-kada umpobasa basa ba’ru;

¹⁸tau iato untoe ula’, na moi unniru’ apa-apa dipomatena, tae’ nala umpatumbai; la urremme’ to masaki, anna maleke tu tau iato.

¹⁹Iatonna mangka ma’kada susito tu Puang Yesu lako tinde tau, tiangka’mi kendek langngan suruga, Naunno’ko’ dio kananNa Puang Matua.

²⁰Male nasangmi tinde tau sia ma’pangada’ umba-umba nii, Natundui Puang sia Napamatoto’ tu kada iato sisola tu mai tanda kalle-kallean unturu’i.