Read Toraja-Sa'dan MARKUS 2 Bible Online

MARKUS 2 - Toraja-Sa'dan bible

MARKUS 2

¹Ba’tu pirang-pirang allo undinna to, male pole’omi tu Yesu tama Kapernaum, nalele karebanNa kumua, lan sia banua.

²Budami tau sirampun, naurunganni tae’mo inan, moi dio to’ ba’ba, Napokadai tu kadanNa Puang Matua lako tau iato mai.

³Saemi tau umbaai lako oloNa tu to kupi’ misa’, nabulle tau a’pa’.

⁴Apa belanna tae’ nabelai urreke’ Yesu tu belanna to buda, narondonnimi tu papa sipatunna naninNa; iatonna mangkamo umbungka’i, narorro’mi rokko to ampa’ nanii tinde to kupi’ mamma’.

⁵Iatonna tiromi Yesu tu kapatongananna tinde tau, Nakuami lako to kupi’: E anakku! dipa’deimo tu kasalammu.

⁶Den dukami ba’tu pira-pira tu pandita Sura’ unno’ko’ dio tu ma’tangnga’-tangnga’ lan penaanna kumua:

⁷Apara patunna nama’kada susirato te tau iate? Ma’kada solang Ia! mindara ma’din umpa’dei kasalan, sangadinna Misa’ri ia, Ia manna tu Puang Matua.

⁸Ta’pa Natandai bangsiami Yesu lan penaanNa kumua ma’tangnga’-tangnga’ susito tu tau iato mai lan ba’tangna, Nakuami lako: Ma’apari mima’tangnga’-tangnga’ mangea buni lan penaammi?

⁹Umbannara maraa: dikuaraka lako te to kupi’: Dipa’deimo tu kasalammu, ba’tu dikuaraka: Millikmoko, alai tu ampa’mu, muma’lingka?

¹⁰Apa sangapaoi ammi issanni kumua kuasa tu Anak rampan dilino umpa’dei kasalan lan te lino — , Nakuami lako tinde to kupi’:

¹¹Iko te Kukuangko: millikko, alai tu ampa’mu, musule lako banuammu!

¹²Ta’pa millik bangsiami, naalai tu ampa’na, namale lako salian dio tingayona mintu’ tau, anna tiramban nasang tu tau sia umpangke’ Puang Matua, nakua: Aa, tae’ bangpa kibelai untiroi tu susinna te!

¹³Sun pole’omi tu Yesu urrundunan randan tasik, na sae lako Kalena tu to buda, Naada’i.

¹⁴Iatonna lendu’ indeto dio, Nakitami tu Lewi, anakna Alfeus, unno’ko’ dio to’ passiman, Nakuami lako: Undiko urrundu’Na’. Ke’de’mi naundi urrundu’I.

¹⁵Iatonna unno’ko’ kumande lan banuanna nabuda passima sia to kadake gau’na Nasolan Yesu unno’ko’ kumande sola anak gurunNa, belanna budamo tau undi urrundu’I.

¹⁶Iatonna kitami pandita Sura’ sia to Farisi tu Yesu kumande sola passima sia to kadake gau’na, nakuami lako anak gurunNa: Kumanderaka Ia sia mangiru’ sisola passima sia to kadake gau’na?

¹⁷Iatonna rangii Yesu te kada iate, Nakuami lako tu tau: Tae’ naanga’i to maleke tu to ma’dampi, sangadinna to masakiri. Tae’ra Kusae la untambai to malambu’, sangadinna to kasalan.

¹⁸Iatu anak gurunNa Yohanes sia to Farisi matangngamo ma’puasa; saemi tu tau nakuami lako Yesu: Ma’apai anna ma’puasa ia tu anak gurunna Yohanes sia to Farisi, anna tae’ Kamu tu anak gurumMi?

¹⁹Nakuami Yesu lako tau iato mai: Ma’dinraka tu to pasolan ma’puasa ke sisolapi tu to la diparampo? Iake sisolapi tu to la diparampo, tae’ nama’din ma’puasa.

²⁰Apa la sae tu allona, to ke dialami dio mai kalena tu to diparampo, iamo pole’ to namane ma’puasa.

²¹Tae’ ia tau misa’ umpa’tampiran sampin ba’ru sangserek lako pakean malusa, belanna inang la naserek pissan sampin ba’ru dipa’tampiran tu malusanna, anna sakalua’-lua’na pissan tu serekna.

²²Sia tae’ ia tau misa’ duka umpatama uai anggoro’ ba’ru tama kiriba’ malusa, belanna inang la napopema’tu anggoro’ ba’ru tu kiriba’ anna tibollo tu uai anggoro’ sia sanggang tu kiriba’. Sangadinna iatu uai anggoro’ ba’ru sipatu ia dipatama kiriba’ ba’ru.

²³Den pissan lan allo katorroan Namale tu Yesu ullendu’i to’ pa’lak gandung, anna ungkalette’ lolanan gandung tu anak gurunNa.

²⁴Nakuami to Farisi lako Yesu: Kitami, ma’apari tu mati’ tau napogau’i lan allo katorroan tu tang dipogau’na.

²⁵Nakuami lako tinde tau: Tae’paraka mibasa lenni tu apa napogau’ Daud tonna kapu’duran sia tangdia’ sola tu to nasiban?

²⁶Matumbari natama banuanNa Puang Matua tonna Abyatar Tominaa Kapua anna kandei tu roti dipennoloan, tu pemali ungkandei sangadinna to minaa manna ia, sia naben duka tu to nasiban?

²⁷Sia Nakua lako tinde tau: Iatu allo katorroan dipaden belanna tolino, tangia tolino den belanna allo katorroan.

²⁸Iamoto iatu Anak rampan dilino Puangna duka allo katorroan.