Read Toraja-Sa'dan MARKUS 3 Bible Online

MARKUS 3 - Toraja-Sa'dan bible

MARKUS 3

¹Male pole’omi tama banua pa’kombongan tu Yesu, denmi dio, misa’ to kope limanna sangbali;

²napenniroi bangmi tau, kumua ba’tu la Napamatoto’i tinde tau lan allo katorroan, anna nii umpasalaI.

³Nakuami Yesu lako tu to kope limanna sangbali: Ke’de’ko lan tangnga-tangnga.

⁴Nakuami lako tu tau: Sipaturaka lan allo katorroan, umpogau’ melona ba’tu umpogau’raka kadakena, ungkarimmanniraka tau ba’tu umpateiraka tau? Apa ma’loko-loko bang tinde tau.

⁵Mentiro tikumi tu Yesu lako tau iato mai situang kasengkeanNa sia Napomasussa tu kamakarrasanna penaanna tu tau, Nakuami lako tu to kope limanna: Angka’i tu limammu! Naangka’mi namatoto’ tu limanna.

⁶Ta’pa sunmi tu to Farisi nalao sipakulu-kulu to Herodiani diona Yesu, umba la nakua umpatei.

⁷Messarakmi tu Yesu sola anak gurunNa ma’palulako to’ tasik; na lendu’ budanna tau undi urrundu’I, to dio mai Galilea;

⁸sia dio duka mai Yudea sia dio mai Yerusalem sia dio mai Idumea sia dio mai lamban lianna salu Yordan sia dio mai lili’na Tirus na Sidon lendu’ budanna tau sae lako Kalena, tonna rangii tu mintu’ penggauran memangnganNa.

⁹Nasuami Yesu tu anak gurunNa kumua la dio bang tu lopi bitti’ nasikandappiran, belanna kabudanna tau, da nasisi’pinni tau.

¹⁰Belanna budamo tau Napamaleke, naurunganni padami tau narua saki padami sae umpessuangan kalena lako, la morai ungkaka’ bangI.

¹¹Mintu’na duka deata masussuk, tonna kitaI tu Yesu, lumbangmi rokko to’ tingayoNa namelalla-lalla, nakua: Kamumo tu AnakNa Puang Matua.

¹²Lendu’mi Napakare’na-re’nanNa kumua, da napalelei.

¹³Kendekmi langngan misa’ tanete, Natambai minda-minda tu Naporai, nasae tu tau lako Kalena.

¹⁴Naangka’mi tu tau sangpulo dua, kumua anNa sisolanni sia kumua anNa suai lao unnada’i tau,

¹⁵sia la unnampui kuasa urrambai deata masussuk.

¹⁶Iatu Simon Nagantimi Petrus,

¹⁷sia Yakobus, anakna Zebedeus sia Yohanes siulu’na Yakobus anNa gantii Boanerges tu tau iato, battuananna anak guntu’.

¹⁸Sia Andreas sia Filipus sia Bartolomeus sia Matius sia Tomas sia Yakobus, anakna Alfeus sia Tadeus sia Simon to Kanani,

¹⁹sia Yudas Iskariot, tu mangka umpa’peturoan Yesu.

²⁰Malemi Yesu tama misa’ banua: nasae pole’o sirampun tu to buda, naurunganni tae’ palambi’Na kumande.

²¹Iatonna rangimi sangdadianNa tu iannato, sunmi la unnalai, belanna nakua: katama-taman.

²²Nakuami tu pandita Sura’ tu saemo dio mai Yerusalem: Narondong Beelzebul sia pa’tunduanna pangulunna deata masussuk anNa rambai tu mintu’ deata.

²³Natambaimi Yesu tinde tau, Nama’kada lako umpokadanni pa’pasusian: Umba la nakua tu deata bulituk urrambai deata bulituk?

²⁴Iake denni misa’ parenta usseru-seru kalena, tae’ nama’din bendan tu parenta iato;

²⁵sia iake ia kalena sisala-sala tu to sangdapo’, tae’ namanda’ tu to lan tananan dapo’ iato.

²⁶Sia iake ia kalena ke’de’ siea sia sisarangnga’ tu deata bulituk, tae’ nama’din bendan, sangadinna ia bangsiamo katampakanna to.

²⁷Apa tae’ misa’ duka tau ma’din tama banuanna to mawatang la urrampai tu iananna, sangadi ke napungopi dolo tu to mawatang iato, namane ma’din umpangrampai tu banuanna.

²⁸Tonganna, Kukua lako kalemi: mintu’na rupa kasalan dio tarukna Adam la dipa’dei, ten dukato tu mintu’ rupa kada solang tu napa’kada solangan.

²⁹Apa minda-minda umpa’kada solangi Penaa Masallo’ tae’ naappa’ kadipa’deian kasalan sae lakona, sangadinna tontong bang tu kasalanna.

³⁰Susimoto tu kadanNa Yesu, belanna nakua tu mai tau: Narondong deata masussuk.

³¹Saemi tu indo’Na sia siulu’Na, ke’de’ dio salian sia ussua tau untambai.

³²Unno’ko’mo tu to buda untalimbungi, denmi tau ma’kada lako: Tiromi, indo’Mi sia siulu’Mi dio salian undaka’Komi!

³³Mebalimi lako tau iato mai, Nakua: Mindara tu indo’Ku, sia mindara tu mai siulu’Ku?

³⁴Mentiro tikumi lako tu mintu’ tau unno’ko’ untalimbungi sia Nakua: Kitami, iari indo’Ku sia siulu’Ku te mai!

³⁵Belanna minda-minda tu umpogau’ pa’poraianNa Puang Matua iamoto tu siulu’Ku muane sia anak darangKu sia indo’Ku.