Read Toraja-Sa'dan MARKUS 5 Bible Online

MARKUS 5 - Toraja-Sa'dan bible

MARKUS 5

¹Rampomi lako lamban lianna tasik lako padang to Gerasa.

²Iatonna mengkalaomo tu Yesu dao mai lembang simpolo napessitammuimi misa’ tau lu dio mai to’ liang to natamai deata masussuk.

³Torro dio bang ia lu to’ liangna tau na moi misa’ tau tae’ umbelai umpungoi, moi dirante tae’ duka.

⁴Belanna pembudamo disangkala sia dirante, apa naka’tu-ka’tu tu rante sia narebong-rebong tu sangkala, na moi misa’ tau tae’ duka la ussau’i.

⁵Tontong bang keallo kebongi dio lu to’ liang sia dao lu tanete melalla-lalla sia untumbui batu kalena.

⁶Apa iatonna tiro mambelami tu Yesu, ma’dondo-dondomi sae tukku, mennolo,

⁷sia mukkun melalla-lalla umpemandui gamaranna nakua: La siapariki’, e Yesu, Anakna Puang Patodoranna! Massumpana’ ussa’bu’ sanganNa Puang Matua umpalakui lako Kalemi da’ amMi pakario-riona’.

⁸Belanna Nakuamo Yesu lako: E deata masussuk, mallaiko lan mai tau iate.

⁹Nakutanaimi Nakua: Minda sangammu? Nakuami mebali: Iatu sangangku Legiun (Sakotik), belanna budakanni.

¹⁰Mengkamoya-moya tonganmi lako Yesu, kumua da Nasuai sun lan mai tondok iato.

¹¹Denmi dio tu bai dao tanete sangtuntunan undaka’ kande.

¹²Napalakumi deata masussuk nakua: Suakanni lako to mintu’ bai dao, na ia kinii tama.

¹³Naelorammi. Sangsunammi tu mintu’ deata masussuk anna tamai tu bai sangtuntunan, na sipettu’mu’-tu’muran tinde bai sangtuntunan dao mai aya’ mi’lan rokko tasik, agi-agi duangsa’bu, anna mate malammu’ diong tasik.

¹⁴Sipa’dondo-dondoammi mallai tu to mangkambi’na, napa’peissananni tu iannato lan lu kota sia dio lu kampong. Sangsunammi tu tau lao untiroi tu apa mangka dadi.

¹⁵Sangsaeammi lako Yesu sia nakita tu to nataba deata masussuk unno’ko’mo ma’tamangkalemo sia matanamo, ia bangsiamo tu to nataba sakotik; saemi kamatakuranna tu tau.

¹⁶Napa’peissanammi to untiroi tu iannato lako tau diona tinde to natamai deata masussuk, sia ia duka tu diona bai.

¹⁷Randukmi tinde tau umpalakui lako Yesu kumua anna soro’ lan mai lili’na tondokna.

¹⁸Iatonna kendek pole’mo langngan lembang, napalakumi tinde to mangka natamai deata masussuk lako kumua anna sikaloli’ Yesu.

¹⁹Apa tae’ Natangga’i tinde tau, sangadinna Nakua lako: Malemoko ria sule lako banuammu lako sangdadiammu, mupa’peissananni tumba kapuana tu apa Napogau’ Puang lako kalemu sia tumba Nakamaseimmu.

²⁰Malemi, naparandukki umpa’peissananni dio tondok Dekapolis, kumua tumba kapuana tu apa mangka Napogau’ Yesu lako kalena, anna mangnga nasang tu tau.

²¹Tonna malemo sule tu Yesu ma’lembang lian, saemi tau buda sirampun untikui, tonna dio to’ randan tasik.

²²Saemi misa’ kapala banua pa’kombongan, disanga Yairus, tonna tiromi tu Yesu tukkumi malinguntu’ rokko to’ lentekNa,

²³sia mengkamoya-moya tongan lako nakua: Iatu anak bitti’ku tu baine la mate mannamo, maipoKomi dikka’ Miremme’i limamMi anna maleke sia tuo.

²⁴Malemi sola, nabuda tau undi urrundu’I sia ussisi’pinni.

²⁵Denmi misa’ baine nakasunni nenne’ bang rara, sangpulo duamo taunna.

²⁶Budamo to ma’dampi nanii umperasai buda kamaparrisan, ia dukamo umpepurai mintu’ apanna to, tang den lenni gai’na, sangadinna samasai-sainna samandu-mandunna tu sakinna.

²⁷Inang mangkamo narangi tu diona Yesu, namale tama to’ to buda tama lu dio mai boko’, nakaka’i tu sambu’Na,

²⁸belanna nakua: Moi anna pakeanNa manna kukaka’, manassa malekena’.

²⁹Ta’pa radanmi tu rarana sia nasa’ding lan kalena kumua mondomo tu sakinna.

³⁰Ta’pa Nasa’dingmi Yesu lan Kalena tu kamatotoran iato sun lan mai, namessaile lan tangngana to buda, Nakua: Mindara ungkaka’ pakeangKu?

³¹Nakuami tu anak gurunNa lako: Mitiro sia te to buda ussisi’pinniKomi, Mikuami: mindara ungkaka’Na’?

³²Mentiro tikumi lao tu Yesu, la untiroi tu baine umpogau’i tu iannato.

³³Mataku’mi tinde baine sia ma’parondo, belanna naissan tu apa mangka dadi lako kalena nasae tukku malinguntu’ dio oloNa sia umpokada tonganni tu mintu’nato.

³⁴Nakuami Yesu lako: E anakKu! pa’patonganmumo umpatuoko; male marampa’moko sia malekemoko dio mai sakimmu.

³⁵Marassanmo ma’kada-kada, saemi tau dio mai banuanna kapala banua pa’kombongan, nakua: Ru’du’mo tu anakmi; apapa bua’na mira’ta’i tu Guru?

³⁶Apa tae’ Napalan ara’i Yesu tu kada iato, Nakuami lako kapala banua pa’kombongan: Da mimataku’, patongan bangmi.

³⁷Tae’ bangmi Natangga’i tu tau misa’ duka undi urrundu’I sangadinna Petrus na Yakobus na Yohanes, siulu’na Yakobus.

³⁸Rampomi lako banuanna kapala pa’kombongan, Natiroi Yesu tu tau mamak siurrukan tongan sia umbating.

³⁹Iatonna tamamo, Nakuami lako tau iato mai: Ma’apai ammi mamak sia siurrukan? Tae’ ia namate te pia te, sangadinna mamma’ri.

⁴⁰Napetaaimi tau. Apa iatonna popallai nasangmi tu tau rokko padang, Nasolammi tu ambe’na sia indo’na tinde pia sia iatu to Nasisolan Namale tama to’ inanna tinde pia.

⁴¹Natoemi tu limanna tinde pia sia Nakua lako: Talita kumi! ke dipallemba’i battuananna: E Lai’, Kukua mati’: malimbangunko!

⁴²Ta’pa malimbangunmi tinde pia nama’lingka belanna sangpulo duamo taunna dadinna. Ta’pa tibaliang nasangmi ara’na tu tau, lendu’ tirambanna.

⁴³Lendu’mi Napakare’na-re’nanna Yesu, kumua da’ nakaissanan tu iannato lako misa’ duka tau, sia mesua umbenni kande tinde pia.