Read Toraja-Sa'dan MARKUS 6 Bible Online

MARKUS 6 - Toraja-Sa'dan bible

MARKUS 6

¹Malemi tu Yesu dio mai, Narampo lako tondok Nanii lobo’; na iatu anak gurunNa undi urrundu’I.

²Iatonna allo katorroammo Naparandukmi mangada’i lan banua pa’kombongan; mangnga nasangmi tu mintu’ to buda tonna rangi sia nakua: Umbara Nanii unnalai te tau iate tu iannato sia tumba ia tu kamatarrusan dikamaseanNi? Anna paden duka tanda mangnga susito, tu limanNa?

³Tang pande kayuraka te Tau iate, anakna Maria sia siulu’na Yakobus sia Yoses sia Yudas sia Simon? Sia tang inde siaraka te mai tasisolan tu anak daranNa? Napomatana’mi tinde tau tu diona Yesu.

⁴Apa Nakua Yesu lako tu tau: Misa’ nabi tae’ natang dibilang, sangadinna lan tondokna sia lan alla’na sangdadianna sia lan tananan dapo’na.

⁵Tae’ra Nabelai umpaden len misa’ duka tanda mangnga indeto dio, sangadinna sidi’ri tu to masaki Naremme’i limanNa Napamalekei.

⁶Mangngami belanna tae’ napatonganni tinde tau. Malemi sumalong umpasilamban-lambanni tu tondok untikui lao sia unnada’i tau.

⁷Natambaimi tu anak gurunNa sangpulo dua, Naparandukki ussua sida’dua-duai male sia Naben kamatotoran la ungkuasai deata masussuk.

⁸Napepasanammi lako tau iato mai, kumua da nabaa apa-apa lako lalan, sangadinna tekken manna misa’; iatu kinallo da, iatu kandu’ da, doi’ lan salipi’ da duka;

⁹ma’din sia umpake lapik lentek, apa da napaduang papa’ bayu lanna lu.

¹⁰Nakuami lako: Umba-umba banua minii kendek, iamo minii torro dio to sae lako malemi pole’o indeto dio mai.

¹¹Umba-umba tu inan tang untarimakomi sia tang umperangiikomi, iammi sun dio mai, pentambakanni tu barra’-barra’ dio pala’ lentekmi, tanda sa’bi salana tu tau.

¹²Sunmi namale mangada’i, kumua sipatu tau mengkagarri’.

¹³Urrambaimi buda deata masussuk sia buda to masaki nabolloi minna’ sia napamaleke.

¹⁴Napelelemi datu Herodes tu diona Yesu, belanna kaleleammo sanganNa, nakua tu tau: Malimbangunmo tu Yohanes Pa’dio’ diong mai to’ to mate, iamoto nakedo tu mintu’ kamatotoran lan Kalena.

¹⁵Den tau kumua: Elia iate; den pole’o tu kumua: Iamo misa’ nabi te tu susi ba’tu umbanna misa’ tu mintu’ nabi.

¹⁶Apa iatonna rangii Herodes tu iannato, nakuami: Iamotu Yohanes kuta’takki ulunna to, dipatuomo sule.

¹⁷Belanna Herodes kalena mangka ussua tau untingkanni tu Yohanes, napungoi lan pa’tarungkuan tu belanna Herodias, bainena Filipus siulu’na, pa napobainemo Herodes.

¹⁸Belanna mangka tu Yohanes ma’kada lako Herodes: Pemali ke unnalakomi bainena siulu’mi.

¹⁹Natambukan essun Herodias tu Yohanes la morai umpatei, apa tae’ nakullei.

²⁰Belanna mataku’ tu Herodes lako Yohanes, apa naissan: iamo misa’ to malambu’ sia masallo’, napangeai bangmi; sia pembuda ke urrangii pangadaranna Yohanes, pussakmi penaanna, apa moi susito naporai duka umperangii.

²¹Nalambi’mi allo melo, tonna allo kadadianna Herodes napadenanni pa’maruasan tu to untoe parea kapua sia pangulu pa’baraninna sia to kapua dio Galilea.

²²Iatonna iato, tamami tu anakna baine tinde Herodias nama’gellu, naposendemi penaanna Herodes sola mintu’ to nasolan ma’talimbungan kumande. Nakuami datu lako tinde pia baine: Palakui lako kaleku tu muporainna, angku benko.

²³Massumpami umpokadai lako nakua: Apa-apa mupalaku lako kaleku, la kubenko, moi na sangsesena te parentaku.

²⁴Sunmi tinde pia nakua lako indo’na: Apara tu la kupalaku? Nakuami indo’na: Palakui tu ulunna Yohanes Pa’dio’.

²⁵Simpolo malemi tama sasa-sasa mennolo lako datu sia umpalakui, nakua: Iatu kukamorainna, la taben bangsiamo’ totemo tu ulunna Yohanes Pa’dio’ diong misa’ pindan.

²⁶Lendu’mi massena penaanna tu datu, apa belanna iamotu sumpana sia belanna iamotu to nasolan ma’talimbungan kumande, tae’mi namorai untumpui tu palakunna.

²⁷Ta’pa nasuami datu tu to ma’peulu kumua la nabaa sae tu ulunna Yohanes. Maleni tinde tau umpoloi ulunna Yohanes lan pa’tarungkuan.

²⁸Nabaami tu ulunna diong pindan, napennoloanni lako tinde pia baine, napennoloan pole’oi tinde pia lako indo’na.

²⁹Iatonna rangimi anak gurunna Yohanes tu iannato, saemi unnalai tu batang rabukna, napeliangi.

³⁰Sirampunmi tu rasulu’ lako Yesu narundunanni lako tu mintu’ apa napogau’na sia iatu mintu’ apa napa’pangadaranna.

³¹Nakuami lako: Ta male messarak lako to’ kasalanna ammi pamondo ta’ka’mi sidi’ dio. Belanna buda tau sisula’ sirrin bang sae, naurunganni moi kumande tae’ duka palambi’na.

³²Malemi ma’lembang messarak lako to’ kasalanna.

³³Apa iatu tau ungkitai male, buda untandai, napada sun lan mai mintu’ tondok nasangmalean lumingka sirampun lako sia undoloi tinde to ma’lembang.

³⁴Iatonna mengkalao Yesu dao mai lembang, Nakitami tu tau lendu’ budanna tilaomi massena lako tinde tau, belanna ia tinde tau sola nasangi butung domba tae’ panglaana, Naparandukmi unnada’i buda pangadaran tu tau iato mai.

³⁵Iatonna la makaroenmo saemi tu anak gurunNa lako Kalena, nakua: Iate inan iate kasalan sia la bongi dukamo.

³⁶Melo ke Misuami te mai tau male nalao lan lu to’ banua salian sia iate tondok tiku lao unnalli kande nakandei, belanna tae’ bang apa dio lu la nakande.

³⁷Apa mebali Nakua: Kamumo umpakandei. Nakuami tu anak gurunNa lako: La laorakannika unnalli kande dua ratu’ dinar la dipakandeanni te tau?

³⁸Nakuami lako: Pirapara roti iti’? Tiroikae. Iatonna tiromi, nakuami: Limamora na da’dua bale.

³⁹Nakuammi tu anak gurunNa kumua anna suai tu tau mintu’ unno’ko’ ma’ta- limbung-limbungan dio to’ riu maluna.

⁴⁰Unno’ko’mi tu tau ma’rampun-rampun, den sisaratu’, den silimangpulo.

⁴¹Naalami Yesu to roti lima na bale da’dua, Namentingara langngan langi’ sia massambayang, Namane untepu-tepui tu roti, Nabenni anak gurunNa, kumua napatorroi dio tingayona tau; susi duka tu bale da’dua Nataa-taa lako tu tau mintu’.

⁴²Kumandemi sola nasangi sadia’na.

⁴³Naalami tau tu mintu’ sesanna sangpulo dua karandang ponno, naden dukapa tu bale.

⁴⁴Iatu to ungkandei tu roti limangsa’bu tu muane.

⁴⁵Ta’pa Napasasami tu anak gurunNa kendek langngan lembang la lamban lako tondok Betsaida, tonna marassan ussuai sule tu to buda.

⁴⁶Tonna mangkamo umpopessimanni tu tau, tuka’mi langngan misa’ tanete la massambayang.

⁴⁷Iatonna makaroenmo ma’tangnga tasikmi tu lembang, na Yesu mannamo misa-misa dao gantananna.

⁴⁸Natiromi urra’takki tonganmo kalena ma’bose, belanna angin ma’sissang; tonna agi-agi dannarimo, saemi umpellambi’i untete uai tasik, la ullendu’i

⁴⁹Iatonna kitami untete uai tasik, nasangami bombo, nasikarrakan,

⁵⁰belanna nakita sola nasangi tu Yesu, anna tiramban. Apa ta’pa Napa’kadai, Nakua: Parapa’i tu penaammi, Akumote anna, da mimataku’.

⁵¹Kendekmi langngan lembang umpellambi’i, naradan tu angin, iamoto anna li’pang bang sola nasang, lendu’ tongan tirambanna,

⁵²belanna tae’pa namasiang lan penaanna sia tae’ napalan penaai tu diona roti, sangadinna makarra’pa penaanna.

⁵³Malemi ma’lembang lian gantananna, rampo lako Genesaret, natadang dio.

⁵⁴Iatonna mengkalaomo dao mai lembang, ta’pa natandaimi tau tu Yesu,

⁵⁵pada malemi sasa-sasa tu tau lan mintu’ tondok untikui, sia randuk pada sae umbullei diong inanna tu mintu’ to masaki lako tu inan naranginna Nanii Yesu dio.

⁵⁶Sia umba-umba Nanii tama, nala tondok nala kota ba’tu to’ banua, pada napatorro tau tu mintu’ to masaki dio pasa’ sia napalaku lako Yesu, kumua ke ma’din siai anna kaka’ bangi tu rombe sambu’Na; padami tau ungkaka’I padami maleke.