Read Toraja-Sa'dan MARKUS 7 Bible Online

MARKUS 7 - Toraja-Sa'dan bible

MARKUS 7

¹Sirampunmi lako tu to Farisi sia ba’tu pira-pira pandita Sura’ tu lu dio mai Yerusalem.

²Iatonna tiroi ba’tu pira-pira tu anak gurunNa ungkande roti anna tae’ namasero limanna, iamotu tae’ namembase dolo,

³belanna iatu to Farisi sia mintu’ to Yahudi tae’ nakumande, ke tang napemabassengipi tu limanna, umpeolai aluk panganna to dolo.

⁴Ten dukato ke sulei dio mai pasa’, tae’ nakumande, ke tae’i napemabasei dolo tu kalena; sia budapa senga’na tu diannanni la naturu’, susinna umbasei irusan sia suke tutu’ sia sere’ gallang.

⁵Mekutanami tu to Farisi sia pandita Sura’ lako: Ma’apari tu anak gurumMi natae’ra napeolai tu aluk panganna to dolo, apa ungkande roti natae’ namasero limanna?

⁶Nakuami Yesu lako: Tonganna bang tu apa mangka napoparunde nabi Yesaya pirambongi’ tu diona kamu, to belo puduk, susitu disura’, kumua: Manassa iate tau iate pudukna manna ungkasiri’Na’ apa iatu penaanna tae’ nalattu’ lako Kaleku.

⁷Tae’ bua’na tu tau iato umpenombaiNa’, belanna umpa’pangadaran panganna napondok tolino.

⁸Mirampanan tu ParentaNa Puang Matua, anna pangalukan tolino mitoe.

⁹Sia Nakua lako tu tau: Tangpada manarangmi misuale tu ParentaNa Puang Matua, kumua ammi toe aluk panganna to dolomi.

¹⁰Belanna nakua Musa: Kasiri’i tu ambe’mu sia indo’mu sia: Minda-minda tu unggatai ambe’na ba’tu indo’na, iamo la mate dipongko.

¹¹Apa mikua kamu: Sipatumo, ke nakua tau lako ambe’na ba’tu indo’na: Iatu la mipotuona tu lu diona mai kaleku, iamotu kuruban battuananna apa dipenomban,

¹²mipopa’elo’namo tang ungkaritutui tu ambe’na ba’tu indo’na moi sidi’ duka.

¹³Susimoto tu kaumpa’deimmi bisaranNa Puang Matua diona aluk to dolomi tu mangka misipaleleanni. Sia buda tu susinna to mipogau’.

¹⁴Natambai pole’mi tu to buda, nama’kada lako Nakua: Perangiina’ sola nasangkomi ammi tandai tonganni!

¹⁵Tae’ ia tu apa salian ke tamai kale, ma’din urruttakki kalena tau, sangadiri iatu apa lu lan mai kale, tu urruttakki tau.

¹⁶(Minda-minda tu ketalinga la ma’perangi, nama’perangi).

¹⁷Iatonna tampemi Yesu tu to buda Namale tama banua, napekutanammi anak gurunNa lako tu diona pa’pasusian iate.

¹⁸Nakuami lako tu tau: Susi dukarokomika to, tangkan miissan melo? Tae’raka miissanni kumua iatu apa salian lu tama kalena tau, tae’ naparuttakan?

¹⁹Belanna iatu iannato tae’ nalu tama penaanna, sangadinna lu tama tambukna, na sun rokko pekkueran. Susimoto Nasanga masero ia tu mintu’ kande.

²⁰Nakuami: Iatu apa sun lan mai kalena tau, iamo iato tu urruttakki.

²¹Belanna lan mai, iamotu lan mai penaanna tau, sun tangnga’ kadake, gau’ sala, kabokoan, kapapatean,

²²pasandak salu lako rampanan kapa’, kamanengkengan, kabulitukan, patangnga’, barak, mailu mata, kada solang, kamatampoan, kabagan.

²³Mintu’nate kadakena tu sun lu lan mai ba’teng sia urruttakki tau.

²⁴Ke’de’mi tu Yesu indeto dio mai, Namale lako lili’na Tirus na Sidon. Malemi tama misa’ banua, la morai kumua da naissanni misa’ duka tau, apa inang nakita bang sia.

²⁵Belanna ta’pa napekareba bang misa’ baine nataba deata masussuk tu anakna baine, nasae tukku malinguntu’ diong to’ lentekNa.

²⁶Iato baine iato to Yunani to ma’rapu Siro-Puniki. Napalakumi lako Yesu urrambai tu deata masussuk lan mai anakna.

²⁷Apa Nakua lako tinde baine: Da’ito nadipedia’i dolo tu pia, belanna tae’ napato’ dialai tu kande dio mai pia nadibuangan asu.

²⁸Mebalimi tinde baine nakua lako: Tonganna Puang, apa iatu asu diong sulluk meda ungkande duka kande mara’na pia.

²⁹Nakuami Yesu lako: Belanna iate kadammu, dadi malemoko; mallaimo tu deata masussuk lan mai anakmu.

³⁰Iatonna rampomo lako banuanna, nakarampoimi tinde pia mamma’ dao inan mamma’ na iatu deata masussuk mallaimo.

³¹Iatonna sun pole’omo lan mai lili’na Tirus, Nalendu’i tu Sidon rampomi lako tasik Galilea lan tangnga-tangngana lili’na Dekapolis.

³²Nabaami tau lako tu to taru tilu’ misa’, napalakui lako Yesu la urremmei’ limanNa.

³³Nasarakkimi tu tau iato dio mai to buda, Naului tu rakka’Na tama talinganna; mettuduMi Nakaka’i tu lilana.

³⁴Sia mentingara langngan langi’ Naumbussanan penaanNa sia Nakua lako tu tau: Effata, battuananna: Tibungka’ko.

³⁵Tibungka’mi tu talinganna nata’pa malutte’ tu lilana anna malolo tu kadanna.

³⁶Napepasanammi lako tau iato mai, kumua da napokadai te ianna te lako misa’ duka tau; apa sia Napepasan-pasananna sanasarra’-sarra’ina tau umpalelei tu iannato.

³⁷Lendu’ tonganmi tirambanna tu tau nakua: Melo nasang tu Napogau’na Napaparangi tu to taru sia to mamang Napopa’kada-kada.