Read Toraja-Sa'dan MARKUS 8 Bible Online

MARKUS 8 - Toraja-Sa'dan bible

MARKUS 8

¹Iatonna attu iato lendu’ pole’omi budanna tau sirampun, natae’ bang apa dio lu la nakande. Natambaimi tu anak gurunNa sia nakua lako:

²MamassengNa’ untiroi te to buda, belanna tallung allomo Kusisolan natae’ bang apa la nakande.

³Na iake la Kusua bangi sule lako banuanna te mai tau natangdia’mo, inang la limpu lako lalan, belanna den tu mambela nanii sae.

⁴Nakuami anak gurunNa mebali lako: Umbara la dinii unnala roti indete padang pangallaran la dipediaranni te mintu’ tau?

⁵Mekutanami lako Nakua: Pirara roti iti’? Nakuami: Pitu.

⁶Nasuami tu to buda unno’ko’ diong padang. Naalami tu roti pitu, Nama’kurre sumanga’, Natepu-tepui sia Naben anak gurunNa kumua nabaai lako tingayona tau, napatorromi dio tingayona to buda.

⁷Den duka siapa bale’-bale’ sidi’ dio. Iatonna mangka ussambayangi, Napesuammi umpatorroi dio tingayona tau.

⁸Kumandemi sola nasangi sadia’na; naalaimi tu roti sesanna tu mangkanna ditepu-tepu, pitung baka.

⁹Iatu to kumande agi-agi patangsa’bu. Nasuami Yesu male.

¹⁰Ta’pa kendekmi sola anak gurunNa langngan lembang, Narampo lako lili’na tondok Dalmanuta.

¹¹Sunmi tu to Farisi sia naparanduk sitamben kada Yesu, iamotu la untuntun tanda kakuasan dao mai langi’ la untobai.

¹²Lendu’mi tu’pena lan penaanNa, Nakua: Ma’apari te tau iate mai natuntun bangra tanda? Tonganna, nakua kadangKu mati’: Ma’apa-apari nala diben lenra tanda te tau iate mai!

¹³Naboko’imi tu tau iato mai, Nakendek sule langngan lembang Namale lian rampe sambalinna lu.

¹⁴Tang nakilalaimi tu anak gurunNa umbaa roti, natae’ bang senga’na lan tu lembang, pakari roti misa’.

¹⁵Ma’pakainga’mi Yesu lako Nakua: Pengkilalai tongan-tonganni, penandaikomi kalemi dio mai raginna to Farisi sia dio mai raginna Herodes.

¹⁶Sipa’kada-kada kalenami, nakua: Ia sia Nama’kada susito, belanna tae’ roti dio kaleta.

¹⁷Iatonna issanmi Yesu tu diongna penaanna, Nakuami ungkuanni: Ma’apai na ia mibisara tu kataeranna roti dio kalemi? Tae’paraka miissanni sia tae’paraka namasiang lan penaammi? Makarra’paraka tu penaammi?

¹⁸Kematakomi natae’raka mipakita? Ketalingakomi natae’raka miparangi?

¹⁹Sia tae’raka mikilalai, tongKu tepu-tepuanni roti lima tu tau limangsa’bu, pirang karandangra sesanna mialai? Nakuami lako: Sangpulo dua karan- dang.

²⁰Sia iatonna pitu anna patangsa’bu tau, pirang bakara sesanna mialai? Nakuami: Pitung baka.

²¹Nakuami Yesu ungkuanni: tae’paraka namasiang lan penaammi?

²²Saemi lako tondok Betsaida. Nabaami tau lako Kalena tu to buta misa’ sia napalaku anNa sapui.

²³Natoemi Yesu tu limanna tinde tau, Narendenni sun lan mai tondok. Sia iatonna mangka untudui tu matanna tinde tau, Napalakomi to’ matanna tu limanNa, nakutanai: Denraka apa-apa mupebaang?

²⁴Umbangunammi matanna anna kua: Den tau kupebaang, belanna kupebaang susi kayu lumingka.

²⁵Napalako pole’omi to’ matanna tu limanNa namano’ra pentirona sia mondo sia napemanassa nakita tu mintu’na.

²⁶Nasuami sule lako banuanna, Nakua: Da mupokadanni tau senga’ lan lu tondok.

²⁷Sunmi Yesu sola anak gurunNa ma’palulako tondok dio lu sikandappi’ Kaisarea Filipi. Mekutana lolanammi lako anak gurunNa, Nakua: NasangaRa’ tau minda?

²⁸Mebalimi tu anak gurunNa, nakua: Den kumua: Yohanes Pa’dio’, sia den kumua: Elia, den pole’o kumua: ba’tu umbannamo misa’ tu mintu’ nabi.

²⁹Mekutanami lako Nakua: Apa iake kamu, misangaRa’ minda? Mebalimi Petrus nakua lako: Kamumo Kristus.

³⁰Napa’pakare’nammi kumua da napokadai tu iannato lako misa’ duka tau.

³¹Naparandukmi unnada’i anak gurunNa, kumua sipatu tu Anak rampan dilino la umperasai buda parri’ sia naali’ mintu’ pekaamberan sia pangulu to minaa sia pandita Sura’, naurunganni napatei tau iato mai anna tallung allo undinna Namalimbangun sule diong mai to’ to mate.

³²Mintu’nate kada iate Napasombo pissan bangmo. Natambai misami Petrus tu Yesu naparandukki unta’tanNi.

³³Apa menggirik anNa mentiro lako anak gurunNa sia Nasarabai tu Petrus, Nakua: Mallaiko lako boko’Ku deata bulituk!, belanna tangia diona Puang Matua muinaa-naa, sangadinna diona tolino.

³⁴Natambaimi tu mintu’ to buda sola anak gurunNa, anNa ma’kada lako Nakua: Minda-minda la morai urrundu’Na’, la ussa’biangan kalena sia unnendekan kayu pea’ta’na naundi urrundu’Na’.

³⁵Belanna minda-minda la morai ungkatirinnai katuoanna, iamo la kapa’dean katuoan, apa minda-minda tu kapa’dean katuoanna tu belanna Aku sia belanna Kareba-kaparannuan, iamo la ungkatirinnai katuoan.

³⁶Belanna apara la napomaupa’ tau, moi naassang nasangi te lino, apa karugian deatanna?

³⁷Ba’tu apara tu sipatu la nasorong tau la nasondan deatanna?

³⁸Belanna minda-minda ungkasirisanNa’ sia ungkasirisan kadangKu lako te to ma’gau’ sala sia kasalan, masiri’ duka Anak rampan dilino la unnakui, ke saeI situang kamala’biranNa Ambe’Na naturu’ mintu’ malaeka’ madatu.