Read Toraja-Sa'dan MARKUS 9 Bible Online

MARKUS 9 - Toraja-Sa'dan bible

MARKUS 9

¹Nakuami Yesu lako tu tau iato mai: Tonganna nakua kadangKu mati’: ba’tu pira-pira tu to ke’de’ inde te tu tae’ nala sikita kamatean, ke tae’pi nakitai tu ParentaNa Puang Matua sae situru’ kamatotoran.

²Annan allona lendu’nato Nabaami Yesu tu Petrus na Yakobus na Yohanes, Nasolanni langngan misa’ buntu malangka’ male messarak. Pakalan membalimi tu rupanNa dio tingayona tinde tau.

³Iatu pakeanNa pandillak-dillak lendu’ mabussangna; moi misa’ to mamusuk lan lino tae’ duka umbelai umpemabussangi susito.

⁴Nakitami tinde tau tu Elia sia Musa marassan sipa’kada-kada Yesu.

⁵Ma’kadami tu Petrus lako Yesu nakua: O Guru, melo ke indemoki’ te; kigaragamora lantang tallu, misa’ Kamu, na misa’ Musa na misa’ Elia.

⁶Belanna tae’ naissanni tu la napokadanna, apa lendu’mo matakkukna tinde tau.

⁷Denmi sangleon gaun unnonganni anna rangii tu gamara lan mai tu gaun, nakua: Iamote tu Anak Pa’kaboro’Ku, perangiI.

⁸Tonna mentiro tiku lao tinde tau tiramban natae’ bangmo misa’ tau nakita lako, Yesu mannamo Nasisolan.

⁹Iatonna solo’mo dao mai buntu iato ma’pakare’nami tu Yesu lako tinde tau kumua, da napokada lenni lako misa’ duka tau tu apa mangka nakita, ke tae’pi Namalimbangun tu Anak rampan dilino dio mai to’ to mate.

¹⁰Napalan penaami te kada iate sia sikutana-tana la morai unnissanni, apara battuananna tu kada: malimbangun dio mai to’ to mate?

¹¹Mekutanami lako Yesu, nakua: Tang nakuaraka mintu’ pandita Sura’ kumua, tae’ nasalai tang sae dolo tu Elia?

¹²Nakuami lako: Inang la sae ia dolo tu Elia sia umpasirundunan mintu’ sakka’ saeanna. Apa tumbai tu mangkanna disura’ tu diona Anak rampan dilino, kumua la umperasai buda kamaparrisan sia la nasassai tau?

¹³Apa Kukua mati’ kumua iatu Elia inang sae dukamo, anna pogau’i tau lako tu pa’poraianna, susitu disura’ diona kadia’ga-a’ganna.

¹⁴Iatonna rampomo lako anak gurunNa Nakitami lendu’ budanna tau untalimbungi sisola duka pandita Sura’ nasite’geran.

¹⁵Ta’pa tirambanmi tu mintu’ to buda tonna kitai, nama’dondo loo umpekatabe’I.

¹⁶Nakutanaimi Nakua: Apara tu misite’ge’i te tau iate?

¹⁷Mebalimi misa’ lan mai tu to buda nakua: O Guru, kubaamo lako Kalemi tu anakku muane natamai deata namamang.

¹⁸Umba-umba nanii unnalai, napessambakanni, anna pambura pudukna sia singgarigi’ isinna, sia matoro kalena. Namangkamo kupokadan anak gurumMi, kumua narambai sun, apa tae’ nabelai.

¹⁹Mebalimi Yesu lako tinde tau, Nakua: E bati’ to tang ma’patongan! sangapaPa’ la ussisolangkomi? sia sangapaPa’ la umpama’tanangkomi penaa? Solanni mai!

²⁰Nasolammi tinde pia lako. Iatonna kitami deata tu Yesu, ta’pa napopa’parondo-rondomi tu pia, anna songka rokko padang sia ma’lisu sarong pambura-bura pudukna.

²¹Nakutanaimi Yesu tu ambe’na Nakua: Sangapamira napasusi to? Nakuami: Tempon bitti’na.

²²Sia pembudamo napessambakan moi tama to’ api sia rokko to’ uai, la morai ussanggangi. Apa iake la den siai Miola lako, kamaseikanni dikka’ Mitulungkan.

²³Apa Nakua Yesu mebali lako: Umba nakua: Ke la den siai Miola lako? Mintu’na apa naola nasang, ke to ma’patongan.

²⁴Ta’pa melallakmi tu ambe’na tinde pia tumangi’, nakua: O Puang, kupatongan, tundui tu kapatonganan malamma’ku!

²⁵Tonna tiroi Yesu tu to buda sirampun dio to’ inan iato, Nasarabaimi tu deata masussuk sia Nakua lako: E deata mamang sia taru, Kusuako mallai dio mai kalena, sia da’mo mutama pole’ sule.

²⁶Sunmi tu deata melalla-lalla sia napopa’parondo-rondo tongan, anna susi bangmo to mate ditiro tu pia, naurunganni buda tau kumua: matemo.

²⁷Apa Natoe Yesu tu limanna Nabangunanni, anna millik.

²⁸Tonna malemo tu Yesu tama banua, mekutana misami tu anak gurunNa, nakua: Ma’apai kami natae’ kibelai urrambai tu deata?

²⁹Nakuami ungkuanni: Iatu iannato tae’ nama’din sun moi umba dipakuanni, sangadi massambayangpiki’.

³⁰Ke’de’mi inde to dio mai naullendu’i Galilea, apa manoka Yesu ke la denni tau unnissanni, moi misa’ duka;

³¹belanna Naada’i tu anak gurunNa, sia Nakua ungkuanni: Iatu Anak rampan dilino la disorong lako tau, anna patei; ma’tallung allo mangkanna dipatei Namalimbangun sule.

³²Apa tae’ naissanni tinde tau tu kada iato, sia mataku’ duka umpeku- tananNi.

³³Rampomi lako Kapernaum. Na iatonna saemo lako banua, Nakutanaimi tu anak gurunNa, Nakua: Apara tu misipa’kadai lolanan?

³⁴Apa sipa’loko-lokoan belanna mangkamo sipakka dio lu lalan kumua, ba’tu mindannai tu kapuanna.

³⁵Unno’ko’mi tu Yesu, Natambai tu anak gurunNa sangpulo dua sia Nakua ungkuanni: Iake la morai dolo tu tau, sipatu iamo la undinna sia mendadi to ma’parakanna mintu’ tau.

³⁶Naalami tu pia’-pia’ misa’, Napalanni tangnga-tangngana tinde tau, Naraka’i sia Nakua ungkuanni tu tau:

³⁷Minda-minda untammui misa’ pia’-pia’ susite diona sangangKu, ia dukamo untammuiNa’; na minda-minda duka untammuiNa’, tae’ kumua Aku natammui, sangadinna iatu To mangka ussuaNa’.

³⁸Nakuami Yohanes lako: O, Guru, denmo tau kikita misa’, tu tae’ naundi urrundu’ki’, anna urrambai deata masussuk ussa’bu’ sangamMi; kigagaimi, tu belanna tae’ naundi urrundu’ki’.

³⁹Apa Nakua Yesu: Da migagai, belanna tae’ misa’ tu to umpogau’ tanda mangnga ussa’bu sangangKu, anna madomi’ la umpalele bekoNa’.

⁴⁰Belanna minda-minda tu tang unneaki’, iamo solata.

⁴¹Belanna minda-minda tu umpairu’komi uai sangirusan diona sangangKu, tu belanna kamu te passolannakomi Kristus, tonganna Kukua mati’, inang tae’ nala pa’de len tu poleanna.

⁴²Minda-minda untumangi moi misa’i te to bitti’ umpatonganNa’, la’bi’ sia ia lako kalena, ke ditoke’i batu parandangan tu barokona, nadipembuangan rokko tasik.

⁴³Sia iake limammu untumangko, ta’takki; belanna la’bi’ sia ia, ke popponko tama katuoan sae lako, na iake dio patomalii tu limammu ammu tama naraka, tama to’ api tang pa’de-pa’de;

⁴⁴tu inan tang mate ulli’na sia tang pa’de duka apinna.

⁴⁵Sia iake lentekmu untumangko, ta’takki;

⁴⁶belanna la’bi’ sia ia, ke sondo’ko tama katuoan sae lako, na iake dio patomalii tu lentekmu mudipembuangan tama naraka.

⁴⁷Sia iake matammu untumangko, su’be’i mutibei, belanna la’bi’ sia ia, ke sangbaliri matammu tama ParentaNa Puang Matua, na iake dio patomalii tu matammu ammu dipembuangan tama naraka,

⁴⁸tu inan tang mate ulli’na sia tang pa’de duka apinna.

⁴⁹Belanna pantan la disiai api.

⁵⁰Iatu sia inang apa melo, apa iake pa’denmi mapi’danna tu sia, la dipatumba pole’pi anna mapi’da sule? Sipatu la den sia lan kalemi, sia karitutui tu kasikaeloan.