Read Toraja-Sa'dan LUKAS 1 Bible Online

LUKAS 1 - Toraja-Sa'dan bible

LUKAS 1

¹Tonganna budamo tu tau umparanduk-randukki untonoranni uleleanna mintu’na tu sundunnamo manassana lako kaleki,

²susitu mangka naossorangkan tu to untiro kalenai dio mai randukna sia umpa’pangadaranni tu kada iato.

³Iamoto iatongku mangka umparessai, kutono’-tonoranni lan penaangku tu mintu’nato tempon dio mai mulanna, kusangami melo ke kupasirundunan dukakomi lan sura’, e Teofilus, tau la’bi’,

⁴anna maleso lako kalemi tu manassana mintu’na apa mangka diadarangkomi.

⁵Iatonna Herodes datu Yudea denmi misa’ tominaa, disanga Zakharia, untamai atoranna allona Abia, na iatu bainena disanga Elisabet, tarukna Harun.

⁶Iatu tau sola duai malambu’ penaanna langngan Puang Matua, napengkaolai bang tu pepasanNa sia Sukaran alukNa Puang, tae’ napasalai penaa.

⁷Iatu tau iato tae’ nakianak, belanna tamanang tu Elisabet namatuamo sola duai, lendu’mo kakianakanna.

⁸Den pissan tonna marassan umpogau’ pangalukan kapemalaran langngan Puang Matua sirupang allu’na la untoe pangalukan to allo iato, —

⁹susitu biasanna tu gau’ pentoen to minaa, — dibiangammi nakitananni la tama lan Banua KabusunganNa Puang, la mangrambu tagari.

¹⁰Iatu mintu’nato sirampun marassan massambayang dio salian, tonna pogau’i tu pemala’ mangrambu tagari.

¹¹Payanmi lako kalena tu malaeka’Na Puang Matua misa’ bendan dio kanan meda dinii memala’ mangrambu tagari.

¹²Iatonna ta’paimi matanna, tirambanmi tu Zakharia sia sae tu kamatakuranna.

¹³Apa nakua tu malaeka’ lako: Da mumataku’, Zakharia, belanna ditarimamo tu palakummu; iatu bainemu Elisabet la napadadiangko misa’ pia muane, la musangai Yohanes.

¹⁴Dadi la mulambi’ tonganmo tu kaparannuan sia kasende-sendean sia buda tau la umpopaimanni tu kadadianna.

¹⁵Belanna ia la kapua dio oloNa Puang sia tae’ nala unniru’ uai anggoro’ ba’tu apa palangona ke diiru’i sia iamo la Naponnoi Penaa Masallo’ tempon dio mai natambukna indo’na.

¹⁶Sia buda tongan tu to Israel la napasule lako Puang Kapenombanna.

¹⁷Ia duka bangsiamo la dolo dio oloNa umpopenaa penaanna Elia sola kamatororanna Elia, la umpapatui penaa mintu’ ambe’ lako anakna sia la umpabalik mintu’ to tang sopati lako kakinaanna to ma’bulo sanglampa, la umparandanan Puang Matua sangrapu to maparea tongan.

¹⁸Nakuami Zakharia lako malaeka’: Umba la kukua ungkatappa’i manassana? Namatuamo’ sia iatu baineku nalendu’i tonganmo tu kakianakanna.

¹⁹Mebalimi malaeka’ lako nakua: Akumote tu Gabriel, biasana’ bendan dio oloNa Puang Matua, nasuamo’ sae ussipa’kadangko umparampoi te kamauparan iate lako kalemu.

²⁰Dadi la mamang todako, tang la muissan ma’kada sae lako dadinna nasang tu mintu’na te, tu belanna tae’ mupatonganni te kadangku, natae’ nasalai ke allu’namo.

²¹Ma’peagi bangmi tu to buda ungkampai Zakharia sia mangnga tu tau, belanna lan bangpa Banua Kabusungan.

²²Iatonna sunmo, tang naissanmo umpa’kadai; lanmi penaanna tau kumua: mangkamo untiro patiro mendeata lan Banua Kabusungan. Nako’bi’-ko’bi’ bangmi tu tau tandana mamangmo tae’ nabattu kada.

²³Iatonna sundunmo allo pentoeanna, sulemi lako banuanna.

²⁴Tae’ namasai alla’na ma’tambukmi tu Elisabet namembuni bang limang bulan, nakua:

²⁵Susimo Nagauranna’ Puang to, tonna tontongina’ Nasamboanna’ tu siri’ku lako mintu’tau.

²⁶Iatonna bulan ma’pennannanmo Nasuami Puang Matua tu malaeka’ Gabriel lako misa’tondok dio Galilea, disanga tondok Nazaret,

²⁷umpellambi’i misa’ anak dara, dipasikampamo misa’ muane, disanga Yusuf, bati’na Daud; iatu anak dara disanga Maria.

²⁸Tonna tamamo tu malaeka’, nakuami lako: Kurre sumanga’mu, e to dikamasei la Narondongmoko Puang Matua.

²⁹Napotirambanmi Maria tu kada susito sia nakua lan penaanna: ba’tu la apa nakitanan tu kurre sumanga’ iato.

³⁰Nakuami tu malaeka’ lako: Da’ mumataku’, e Maria, belanna mulambi’mo tu kamamasean dio mai Puang Matua.

³¹Manassa la ma’tambukko mudadian misa’ pia muane, la musangai Yesu.

³²Iamo la kapuanna sia la digente’ Anak Puang Patodoranna sia la Nasorong Puang Kapenombanta lako Kalena tu isungan kapayunganna Daud nene’Na.

³³Iamo la undatui rapunna Yakub tontong sae lakona na iatu kadatuanNa tae’ upu’na.

³⁴Ma’kadami tu Maria lako malaeka’: Umba nakua la dadi te, natae’ kukemuane?

³⁵Mebalimi tu malaeka’ lako nakua: Iamotu Penaa Masallo’ la songlo’ lako kalemu sia kamatotoranNa Puang Patodoranna unnonganniko, iamoto dadi iatu Pia la mudadian la disangai Pia masallo’ sia AnakNa Puang Matua.

³⁶Ia duka tu Elisabet, sangdadiammu, tonganna matuamo, disanga bangmo la tamanang, apa totemo annanmo bulanna untambuk misa’ pia muane.

³⁷Belanna denraka tang dadi ke Napokadami Puang Matua?

³⁸Nakuami Maria: Tonganna tongan aku tu taunNa Puang Matua, podo nadadi lako kaleku susitu kadammi. Ta’kala nasoro’mo dio mai tingayona tu malaeka’.

³⁹Iato allo iato ke’de’ bangsiami tu Maria namale tikara-kara lako misa’ tondok mentanete dio Yehuda.

⁴⁰Tamami banuanna Zakharia namassalama’ lako Elisabet.

⁴¹Iatonna rangimi Elisabet tu passalama’na Maria, pandiumi tu pia’-pia’ lan pa’tambukanna sia Naponnoi Penaa Masallo’ tu Elisabet.

⁴²Napemandui metamba, nakua: Sundunmo rongko’mu dio mintu’na baine sia sundunmo rongko’na tu pangluang inan taummu.

⁴³Matumbara’ na iatu indo’na Puangku sae umpellambi’ina’?

⁴⁴Apa tonganna iatonna tilanta’mo lan talingangku tu passalama’mu, pandiumi tu pia’-pia’ lan inan taungku, belanna parannu penaanna.

⁴⁵Maupa’mo ia tu baine umpatonganni te iannate, belanna iatu dipokadanni lu dio mai Puang Matua, manassa la dipasundun.

⁴⁶Nakuami tu Maria: Deatangku umpekalangka’I Puang Matua

⁴⁷sia umpomarannumo Puang Matua tu penaangku, To patutungan bia’ku,

⁴⁸belanna Napemarangamo tu kamadionganna taunNa. Anna randuk pole te totemo nasiosso’i tau umpotule’-tuleranni umpokada rongko’na’,

⁴⁹belanna penggauran kapua Napabu’tumo dio kaleku tu To umpoissan angge maritik. Dadi madatu todamo tu sanganNa,

⁵⁰manassa iatu kamamaseanNa tontong nasiosso’i mintu’nato ungkataku’I.

⁵¹Pura naolamo limanNa tu pentoean matoto’, Napasisarak-sarakmo tu mintu’ to matampo nasanga lan penaanna;

⁵²iatu to kapua Napasule rokko tu pangka’na na iatu to barinni’ Napamadoan,

⁵³Iatu to tangdia’ Napedia’i ianan, na iatu to sugi’ Nasua sule lo’bang.

⁵⁴Nasande’mo tu Israel taunNa, la ungkilalai pole’ kamamaseanNa, —

⁵⁵susitu mangka Naallu’ lako nene’ to dolota — iamotu kamamaseanNa lako Abraham na mintu’ tarukna tontong sae lakona.

⁵⁶Torromi tu Maria sola Elisabet umbai agi-agi tallung bulan namane sule lako banuanna.

⁵⁷Iatu Elisabet nalambi’mo bulan kakianakanna, nadadiammi tu misa’ pia’-pia’ muane.

⁵⁸Mintu’na to sikandappi’na tiku lao sia mintu’na sangdadianna urrangii, kumua Napakapuamo Puang Matua tu kamamaseanNa lako, dadi menturu’ duka tu tau parannu penaanna.

⁵⁹Iatonna ma’karuamo allona dadinna tu pia, saemi tu tau la umpogau’i tu sunna’ lako kalena tu pia, la nasangaimi Zakharia sikona ambe’na.

⁶⁰Mebalimi indo’na nakua: Tae’, la disangai ia Yohanes.

⁶¹Nakuami tu tau lako: Mintu’na sangdadiammu tae’ ia misa’ disangai te sanga iate!

⁶²Nabenmi tau tanda lako tu ambe’ na, kumua ba’tu la umba sanga naporai disanganni tu pia.

⁶³Napalakumi tu papa’-papa’ passurasan, nasura’i lako, nakua: Yohanes la disanganni. Mangnga nasangmi tu tau.

⁶⁴Ta’pa tiku’bi’mi tu pudukna natiba’tik tu lilana Zakharia nama’kada-kada umpudi-pudi Puang Matua.

⁶⁵Saemi kamatakuranna tu mintu’ to sikandappi’na tiku lao sia budamo kadanna tau lan mintu’ buntu Yudea tu iannato.

⁶⁶Iatu mintu’nato urrangii tu iannato napalan penaanna, nakua: Ba’tu apa la dadi dio undinna te pia iate? Apa Narande pala’ tongan Puang!

⁶⁷Iatu Zakharia, ambe’na naponnoi Penaa Masallo’, nama’parunde, nakua:

⁶⁸Mintu’na kadipangkeran lu lako nasang Puang Kapenombanna to Israel, belanna denmo mamaseNa umpemaranga to Napilei, Napadenanni kadila’bakan.

⁶⁹Sia Napabendanammiki’ tanda kamarendengan lan banuanna Daud, taunna,

⁷⁰susitu kadanNa mangka napasun mintu’ nabi maseroNa tempon dio mai —

⁷¹kumua anta lessu’ dio mai mintu’ ualinta sia dio mai limanna mintu’ to ungkabiri’ki’;

⁷²kumua Nasundunni tu mamaseNa lako nene’ to dolota sia Nakilalai pole’ tu pangallu’ madatunNa;

⁷³sia iatu kada mangka Nasibassei nene’ to dolota, Abraham, la Napa’kamasean lako kaleta;

⁷⁴iake lessu’miki’ dio mai mintu’ ualinta, tae’mo tala mataku’ mengkaorong lako alukNa;

⁷⁵sikambi’miki’ kamaseroan sia kamaloloan, dio oloNa lan mintu’ allo katuoanta!

⁷⁶Na iatu iko, e anakku, ikomo la disanga nabinNa Puang Patodoranna, belanna la doloko dio oloNa Puang umpasakkaranni lalanNa,

⁷⁷la umpa’peissanan kamakarimmanan lako to Napilei tu diona kadipa’deian kasalanna,

⁷⁸belanna penaa mamaseNa Puang Matua, iamotu Parrang bu’tu dao madona saemo la umpellambi’iki’,

⁷⁹anna kaanan lako to lan kamalillinan sia naonganni bayo-bayo kamatean, sia la umpate’teki’ mata kalambanan lako lalan kasalamaran.

⁸⁰Sakapua-puanami tinde pia, saponno-ponnona Penaa Masallo’ lan ba’tengna; dio bangmi lu padang pangallaran sae lako umpa’pekitananna kalena lako to Israel.