Read Toraja-Sa'dan LUKAS 11 Bible Online

LUKAS 11 - Toraja-Sa'dan bible

LUKAS 11

¹Den pissan Namassambayang tu Yesu dio misa’ inan. Iatonna mangkamo, ma’kadami misa’ tu anak gurunNa lako: O Puang! ada’ikanni massambayang, susitu napangadaran Yohanes lako anak gurunna.

²Nakuami Yesu lako: Iake massambayangkomi, la mikua: O Ambe’ki, kipalaku anna dipakala’bi’ tu sangamMi, anna patalo tu ParentaMi,

³Benkanni tu silasanna kikande keallo-keallo.

⁴Sia pa’dei tu sala-budangki, belanna kami duka umpagarri’ salana mintu’ to kasalan lako kaleki. Sia da Mielorangkan diroso.

⁵Nakuami Yesu lako sola nasangi: Mindara kamu ke denni sangmanena, naloo tangnga bongi umpellambi’i, nakua lako: E sangmane, pasuka’pa’ rotimmu tallu,

⁶belanna den misa’ sangmaneku loo lumio’ nalendu’ dio banuangku, natae’ bang apa dio kaleku la kutadoanni.

⁷La mebali tu tau dao mai banua nakua: Da muroyaina’, totemo mangkamo disalli’ tu ba’ba sia indemo’ sumbung sola anakku, tae’mo kula millik umbenko.

⁸Kukua mati’, iake tae’i namillik umbenni anna sangmanena ia, apa belanna kalindo-batuanna, anna millik sia umbenni pada tu silasanna la natadoanni.

⁹Iamoto Kukua lako kalemi: Palakui ammi diben; daka’i ammi appa’i, tumbekki tu ba’ba ammi dibungkaran.

¹⁰Belanna minda-minda tu malaku, la ditadoi, sia iatu mandaka’na, la naappa’, sia iatu untumbekna ba’ba, la dibungkaran.

¹¹Na kamu umbara kamu tu ambe’, ke umpalakui roti tu anakna, la nabenraka batu lako?, ba’tu, ke umpalakui bale, la nabenraka ula’ sondana bale?

¹²Ba’tu iake umpalakui tallu manuk misa’, la nabenraka sando misa’?

¹³Iamoto ia duka tu kamu to kadake, miissan duka umbengan pamengan melo lako anakmi, ontong pissan tu Ambe’mi dao suruga la umpa’bengan Penaa Masallo’ lako to umpalakui lako Kalena.

¹⁴Urrambaimi deata masussuk tu Yesu lan mai kalena misa’ tau: iatu deata masussuk iato mamang. Dadi iatonna sunmo lan mai kalena tu deata, ma’kada-kadami tinde to mamang. Sia mangnga bang tu to buda;

¹⁵apa nakua tu tau pira: Iari Narambai deata masussuk, pa’tunduannari Beelzebul, pangulunna mintu’ deata.

¹⁶Sia den pole’o tu to senga’, untoba Yesu sia umpalakui lako tu tanda kakuasan dao mai langi’.

¹⁷Apa belanna Nadoloi Yesu tu tangnga’na, Nakuami lako: Umba-umba tu parenta usseru-seru kalena, manassa la ussanggangi kalena ba’tu to sangdapo’ ia kalena sisala-sala, la robok.

¹⁸Susi dukamoto, iake ia kalena sisarangnga’ tu deata bulituk, naumba nakua la bendan tu parentana? — belanna mikua kumua: iari Kurambai deata, pa’tunduannari Beelzebul.

¹⁹Iake la pa’tunduannari Beelzebul, angKu rambai deata, mindao pa’tunduan, anna rambai anak gurummi? Apa iamo la umpasalakomi.

²⁰Apa iake pa’tunduanna siamo Puang Matua, angKu rambai deata, inang manassa nalambi’mokomi tu ParentaNa Puang Matua.

²¹Iake to mawatang nama’pa’buno pole’opa, ungkampai sa’de banuanna la torro mana’pa tu iananna;

²²apa iake mawatang pole’oi tu to urrukka’i anna taloi, manassa narampa tu mintu’ pa’bunona, tu naparannuanna, sia nasitaa-taai tu pangrampana.

²³Minda-minda tu tang mirring lako Kaleku, iamo unneaNa’ sia minda-minda to tang Kusisolan mangrampun, iamo ma’pasisarak-sarak.

²⁴Ianna sunmo tu deata masussuk lan mai tau, sumayomi dio lu padang rangke undaka’ pelayoan, apa belanna tae’ naappa’, nakuami: La sulemo’ lako banuangku, tu kunii sun lan mai.

²⁵Ianna saemo, nakarampoimi mangkamo disapui sia dikassa’i.

²⁶Undinna lao pole’omi untambai deata senga’ pitu nasisolan, tu masussukna pissan na ia, natama namembanua lan; dadi ma’katampakanna ondong pissanmi kadakena gau’na tu to natamai na iatonna dolona.

²⁷Marassanmo tu Yesu umpokadai tu mintu’na te, denmi misa’ baine lan mai tu to buda umpemandui metamba, nakua lako: Maupa’mo ia tu inan tau mangka untambukKomi sia iatu susu Misusu.

²⁸Apa Nakua Yesu: Ia ria maupa’ tongan tu mintu’nato umperangii kadanNa Puang Matua sia ungkaritutuinnai.

²⁹Iatonna sangsirampunammo tu to buda, naparandukmi Yesu ma’kada, Nakua: Iate tau totemo te iamoto kadake. Untuntun bang tanda kakuasan, apa tae’ bang misa’ tanda la dibenni, sangadinna tanda kalle-kallean diona nabi Yunus.

³⁰Belanna susi Yunus mendadi misa’ tanda lako to Niniwe, la susi dukato tu Anak rampan dilino lako tau totemo te.

³¹Iatu datu baine lo’ mai pollo’na uai la ke’de’ ke allo kadiparessan sisola te tau totemo te anna pasalai. Belanna iamo sae lo’ mai engkokna padang umperangii kakinaanna Salomo anna tiromi, inde Ia tu ondongna na Salomo.

³²Iake allo kadiparessan, la ke’de’ tu to Niniwe sola te mintu’na tau totemo te, anna pasalai, belanna mengkatoba’ untarimai tu pangadaranna Yunus na inde Ia tu ondongna na Yunus.

³³Tae’ ia misa’ tau ke umpadukkui palita, la umpadiongi sulluk ba’tu diongna lu baka, sangadinna dao siamo tongkonanna, anna tiroi tau tama tu dukkunna.

³⁴Iatu palitanna kalemu, iamotu matammu. Iamoto iake maseroi tu matammu, tae’ natang masero duka tu mintu’ kalemu, apa iake kadakei, malillin duka tu kalemu.

³⁵Iamoto kanana’i tonganni, da namalillin tu maserona lanmu lu.

³⁶Dadi iake mintu’i kalemu masero, natae’ bangmo sangmata malillin, manassa la masero nasang: susi ke naarrangko dukkunna palita.

³⁷Iatonna marassanmo tu Yesu ma’kada, saemi misa’ to Farisi untambai tama banuanna kumande, Namale tama Naunno’ko’ kumande.

³⁸Mangngami tu to Farisi, tonna tiroi, tae’ Namembase dolo, Namane kumande.

³⁹Nakuami Puang lako: E, kamu to Farisi, manassa umbaseikomi salianna irusan, sia kandian, apa lanmi lu ponno kabasisi-inaan sia kakadakean.

⁴⁰E, to baga, tae’raka na Ia tu To umpadadi salianna umpadadi dukai tu lanna lu?

⁴¹Apa pa’kamaseammi tu apa lanna lu, ke la tang masero nasangi mitiro.

⁴²Apa upu’ allomi, e to Farisi, belanna iake sangpuloi tu salasi na kamangi sia mintu’ utan, misa’ mipennoloan, mipasalai penaa tu pa’paressan sia kamamaliran lako Puang Matua. Iari te tu sipatu la dipogau’, sia iatu senga’na da miboko’i.

⁴³Upu’ allomi, e to Farisi, belanna urrurui bangkomi kao’koran mala’bi’ lan banua pa’kombongan sia dipekatabe’i dio lu pasa’.

⁴⁴Upu’ allomi, belanna susikomi lamunan tae’ tandana, dadi tae’ natandai, ke den tau lendu’ dio.

⁴⁵Pakalan namebali misa’ pandita Sukaran aluk, nakua: O Guru, tae’ bangmo Milapinan lenkan puduk diona kada iate.

⁴⁶Nakuami Yesu: Upu’ duka allomi, e pandita Sukaran aluk! apa mipatangka’i bang tang dibelanna tu tau, anna kamu kalena tae’ mirumbu lenni moi misa’ duka rakka’mi.

⁴⁷Upu’ allomi, belanna kamu unggaragai lamunanna mintu’ nabi, anna nene’ to dolomi kalena mangka umpatei to.

⁴⁸Susimoto, misa’bii, kumua miporai tu pa’pogau’na nene’ to dolomi, belanna ia umpatei na kamu unggaragai lamunanna.

⁴⁹Iamoto nakua pole’ kada kinaanNa Puang Matua: La ussuaNa’ nabi sia rasulu’ lako tau iato, anna patei pira sia naula’ pira;

⁵⁰kumua nadipassosoan tu rarana mintu’ nabi lako te tau totemo, tu dipato’do tempon dio mai mulanna lino;

⁵¹tempon dio mai rarana Habel rampo lako rarana Zakharia, tu dipatei dio to’ kasiallaranna pemalaran na banuanNa Puang Matua. Manassa nakua kadangKu lako kalemi, kumua mintu’nato, la dipassosoan lako te tau totemo.

⁵²Upu’ allomi, e pandita Sukaran aluk, belanna mibaa bang tu gonting kamanarangan; kamu kalena kamu tang tama, ammi ampangi lenni tu to la morai tama.

⁵³Tonna sunmo tu Yesu lan mai, randukmi pandita Sura’ sia to Farisi umpa’pekitananNi tu kare’dekanna ara’na, naparessa-ressa tonganNi tu diona buda aluk;

⁵⁴napatama leko’i lenni kada, la morai umpentoei sangbuku tu kada sun dio pudukNa tu ma’dinna la nanii umpasalaI.