Read Toraja-Sa'dan LUKAS 12 Bible Online

LUKAS 12 - Toraja-Sa'dan bible

LUKAS 12

¹Iatonna iato sirampunmo ba’tu pirang-pirang sa’bu tau, nasilessak-lessak bangmo, pakalan Naparandukmi Yesu ma’kada dolo lako anak gurunNa: Kanandaikomi kalemi dio mai raginna to Farisi, iamotu belo puduk.

²Manassa moi misa’ duka apa disamboi, tae’ tang la dipasombona sia iatu membuninna, tae’ tang la kaissanan duka.

³Iamoto mintu’na tu mangka dipokada lan malillinna, la dirangi dio maserona, sia mintu’na tu mangka dipa’bisikan dio to’ talinga lan inan, iamo la dipetamban dao mai bubungan banua.

⁴Nakua kadangKu lako kalemi, e mintu’ sangmaneKu, da mikataku’i tu to umpatei kale, mangkanna to, la naapaoporokomi;

⁵la Kupamanassa lako kalemi, minda tu sipatu la mikataku’: Iamo la mikataku’ tu To, ianna mangkamo umpatei, Napembuangammi tama naraka; Kukua tongan lako kalemi: kataku’I.

⁶Tae’raka nasilima tu dena’ nabalukanni tau misa’ ruppia? Namoi misa’ tae’ duka Nakalupai Puang Matua.

⁷Namoi duka iatu mintu’ beluak dao ulummi Natoe nasang iaranna. Iamoto da mimataku’, belanna iatu kamu mandukomi losong na iatu dena’ buda.

⁸Sia Kukua lako kalemi: Minda-minda tu unnakuNa’ dio tingayona tau, ia dukamo la Naaku Anak rampan dilino dio tingayona mintu’ malaeka’Na Puang Matua;

⁹apa minda-minda tu umpeonganniNa’ dio tingayona tau, ia dukamo la dipeonganni dio tingayona malaeka’Na Puang Matua.

¹⁰Minda-minda tu umpokada kadake Anak rampan dilino, la dipa’dei kasalanna, apa iatu to umpa’kada solangi Penaa Masallo’, iamo tang la dipa’dei kasalanna.

¹¹Iake nabaakomi tau lako olona to ma’kombongan tama banua pa’kombongan, ba’tu lako olona to ma’parenta, ba’tu lako to paa, da miposelangi kumua umba nakua ba’tu apa tu la mipebalian sia apa tu la mipokada;

¹²belanna na iapa to, Namane Penaa Masallo’ unnada’ikomi tu sipatunna la mipokada.

¹³Denmi misa’ lan mai mintu’nato buda ma’kada lako susite: O Guru, suai tu siulu’ku napaketaana’ tu mana’ki!

¹⁴Apa nakua Yesu lako: E sola, mindara unnalaNa’ to mangra’ta’ kara-karami ba’tu to ma’tallangmi?

¹⁵Nakuami lako tau iato: Kanandai sia kanannangi tu kalemi dio mai kabasisi-inaan, belanna tae’ na ia napotuo tau tu kala’bian ianan.

¹⁶Napokadammi misa’ pa’pasusian lako tu tau, Nakua: Den padangna misa’ to sugi’ buda tongan burana.

¹⁷Ma’tangnga’mi lan penaanna, nakua: Umbara la kukua ma’tangnga’? belanna tae’ inan la kunii umpalangnganni tu mintu’ bura padangku.

¹⁸Nakuami: Indemo la kupogau’; la kurondonni nasang tu alangku, kupabendanni tu kapuanna pole, kunii umpalangan mintu’ bura padangku sia mintu’ iananku;

¹⁹angku ma’kada lako deatangku susite: E deatangku, budamo ianan dio kalemu ma’toppo’-toppo’, moi pirang-pirang taun silasa duka, popelayomoko kalemu, kumandeko sia mangiru’-iru’ko sia parannu-rannuko.

²⁰Apa Nakua Puang Matua lako: E to baga, ia bangsiamote bongi iate nadituntun tu penaammu dio mai kalemu, namindamo la umpoapai tu mintu’na apa-apa mangka mupasakka’ to?

²¹Susimoto tu diona to umpakombongan ianan kalena, sia tae’ nasugi’ dio oloNa Puang Matua.

²²Nakuami Yesu lako anak gurunNa: Iamoto Kukua lako kalemi: da miposelangi tu katuoammi, to kumua apa tu la mikande, ba’tu diona kalemi kumua apara tu la mipake.

²³Belanna iatu penaa losong ia na iatu kande, sia iatu kale losong ia na iatu tamangkale.

²⁴Tiro-tiroi tu diona kadoya, tae’ namantanan len sia mepare, sia tae’ duka naampui palipu’ ba’tu alang, apa Napatuo duka ia Puang Matua; nasangapa losongmi na iatu manuk-manuk!

²⁵Mindarokomi kamu ke miposelangi ma’din umpamalambe’ sunga’mi sidi’ duka?

²⁶Sala duka bitti’na tang mikulle umpogau’i, ma’apai miinaa-naa bangi tu senga’na?

²⁷Tangnga’-tangnga’ri tu diona danga-danga, umbara nakua tuona; tang la mangunu’ sia tang la ma’tannun sia, na Kukua lako kalemi: Moi Salomo nakabu’ mintu’ kamala’biranna tae’ nadipakei susitu danga-danga sangtangke.

²⁸Iake susito tu Puang Matua umbeloi tu riu dio lu padang, tu tuo siapa te allo iate, anna manikale’ dibuangmo tama api dapo’, ondong pissan tu kamu, e to tangkan ma’patongan!

²⁹Iamoto da miposelangi tu la mikandena ba’tu la miiru’na sia da nasitaa penaammi;

³⁰belanna iatu mintu’nato, napengkali-kalii to kapere’; apa Naissan Ambe’mi, kumua mipotuona tu mintu’nato.

³¹Sangadinna daka’i tu ParentaNa Puang Matua na iatu mintu’na to la dipangranganan duka lako kalemi.

³²Da mimataku’ e to tang pira, belanna mangkamo Napondok Ambe’mi umbengan ParentaNa lako kalemi.

³³Balukanni tu apa dio kalemi, ammi pa’kamaseanni; garagangkomi poro’-poro’ tang malusa kalemi, ianan dao suruga tae’ napura, tang nalambi’na to boko, sia tang nabala’-bala’na busung.

³⁴Belanna umba-umba nii ianammi, dio duka nanii penaammi.

³⁵Ma’tambeke’komi, sia popa’lulu-lului tu palitammi.

³⁶Sia la susikomi to untayan kasaeanna puangna, ke sulei dio mai pa’maruasan to ma’kapa’, kumua ianna sae natumbek ba’ba, tikarami umbungkaranni.

³⁷Maupa’ tu kaunan iato, ke sulei tu puangna, natae’ namamma’ nakarampoi. Manassa nakua kadangKu lako kalemi, ia kalena la ma’tambeke’, nasuai unno’ko’ kumande na ia sae umparakai.

³⁸Na iake penduammi tau pana’ding ba’tu pentallummi nasae nakarampoi susi dukato, maupa’ tu mintu’na kaunan iato.

³⁹Apa miissan sia te iannate, kumua iake susinna naissanni ampu banua, kumua te’te’ iato nala sae tu to boko, manassa nakampai sia tae’ napopa’elo’nai tu banuanna nalu’bakki.

⁴⁰Iamoto la ma’parandan dukakomi, belanna iatu Anak rampan dilino la sae to ke attu tang mikapang-kapang.

⁴¹Iatonna iato nakuami Petrus lako: O Puang, iate pa’pasusian iate, kamiraka Mipokadan, ba’tu mintu’raka tau?

⁴²Nakuami Puang: Mindara tu to ma’kampa banua maruru’ sia kinaa, tu naangka’ puangna la ungkapalai mintu’ kaunanna, la umpapantanni kande, ke allu’naomi?

⁴³Maupa’ tu tau iato, ke saei puangna, nakarampoi umpogau’i susito.

⁴⁴Tonganna tongan Kukua mati’, inang la ia la naangka’ puangna ungkapalai mintu’ iananna.

⁴⁵Apa iake ia lan penaanna tu tau iato, kumua: masai siapa namane sae puangku; naparandukki ungkambei tu mintu’ kaunan, nala muane, nala baine, sia kumande sia mangiru’ samalangona;

⁴⁶saemi tu puangna tonna allo nasanga tae’pa nala sae sia attu tang natandai: nata’tak-ta’takki la’bo’ sia napakitai kataananna susito matekkok.

⁴⁷Iatu kaunan unnissanmo pa’poraianna puangna, natae’ nama’parandan ba’tu tae’ napogau’i susitu pa’poraianna puangna, iamo la dipemalongkanni.

⁴⁸Apa iatu tau tae’pa naissanni, napogau’i tu penggauran sipatu la dinii umbambai, iamo la disandan dibamba. Minda-minda tu buda dibenni, buda duka la dituntun lako kalena, sia minda-minda buda dipakambiranni, ondong pole budanna dituntun lako kalena.

⁴⁹Ia sia angKu sae te la umpellebaranNa’ api tama lino; la Kuapamira ke ma’lulu-lulumi?

⁵⁰Apa tae’ nasalai tang didio’Na’ lan misa’ kadidioran sia tang pada kamakario-rioangKu sae lako disundunninna tu iannato.

⁵¹MisangaRa’ka saeMo’ umbaa karapasan lan lino? Kukua lako kalemi, tae’, sangadinna kasisalan.

⁵²Belanna randuk totemo te, iake lima tau lan misa’ banua, manassa la sisala tu tallunna na iatu da’duanna sia da’duanna anna tallunna;

⁵³tonganna ambe’ la sisala anakna muane sia pia muane anna ambe’na, sia indo’na sisala anakna baine sia pia baine na indo’na, sia matusanna baine anna manintunna baine sia manintunna baine anna matusanna baine.

⁵⁴Nakua pole’omi Yesu lako to buda: Iake mitiroi tu gaun kendek dio rampe matampu’, mikua bangsiami: la ma’paliu bara’; ta’kala sae tonganmi.

⁵⁵Sia iake mitiroi tu angin mangiri’ lu lo’ mai, mikuami: la manta’mo allo; dadi tonganmi susito.

⁵⁶E to belo puduk! manarangkomi untiro lilinganna langi’ sola lino, umba nakua natae’ miissanni untiroi tandana tu allo totemo?

⁵⁷Ma’apai mitang untangnga’ kalenai kamu tu tonganna?

⁵⁸Iake maleko nabaa balimmu umpellambi’i kapala, ke diopoko lu lalan mukkunko ma’tangnga’, sangapaoi ke lessu’ko dio mai, ke da duka narendenko lako to mangra’ta’ kara-kara, da nasorongoko lako sapiri anna patamako pa’tarungkuan.

⁵⁹Nakua kadangKu mati’: dennoraka mula tassu’ lan mai, ke tae’pi mubaya’i tu utangmu moi misa’ de’pen tae’ nama’din kurang.