Read Toraja-Sa'dan LUKAS 13 Bible Online

LUKAS 13 - Toraja-Sa'dan bible

LUKAS 13

¹Iatonna iato rampomi ba’tu pira-pira tau umpokadai lako Yesu tu diona rarana to Galilea napasirau Pilatus pemala’na.

²Mebalimi tu Yesu, Nakua lako tinde tau: Misangaraka ondong ia kapuana kasalanna tu to Galilea iato na iatu mintu’ to Galilea senga’, belanna susi kadipakario-rioanna to?

³Kukua mati’: tae’, apa ianna tae’ mimengkatoba’, la sanggang dukakomi sola nasang susito.

⁴Na iatu sangpulo karua tau nasongkai menara dio Siloam namate, misangaraka ondong ia kapuana salana na mintu’ to torro dio Yerusalem?

⁵Kukua mati’: tae’, apa iake tae’i mimengkatoba’ kamu duka sola nasang la sanggang susito.

⁶Napokadami tu pa’pasusian iate, Nakua: Den misa’ tu tau nanii ara sangto’ lan pa’lak anggoro’na; saemi la unnalai buanna, apa moi misa’ tae’ duka naappa’ dio.

⁷Nakuami lako to ma’kampa pa’lak: Tiromi, totemo tallung taunmo’ sidanu’-danu’, sae undaka’i buanna te ara, tae’ bang kuala; lellengi, apara bua’na umbalumbun indete?

⁸Mebalimi tu to ma’kampa pa’lak, nakua lako: O Puang, palan bangpi te taun iate, kumangkapa ungkalii, kupalilingi pangangku’.

⁹Iake membuai keallo, melo, iake tae’i, na iapa to mimane umpopelellengi.

¹⁰Iatonna allo katorroan, mangada’imi tu Yesu lan misa’ banua pa’kombongan.

¹¹Denmi misa’ baine dio nataba deata, namasaki sangpulo karuamo taunna, mandumo tibungku tu boko’na, tang naissan liumo umpakalolo kalena.

¹²Iatonna tiromi Yesu, Natambaimi sae lako Kalena, Namane kumua: E, baine, la dirampanammoko dio mai te sakimmu.

¹³Naremme’mi limanNa tu baine iato, nata’pa malolo, naumpudi-pudi Puang Matua.

¹⁴Sengkemi penaanna tu pangulu banua pa’kombongan, belanna umpamatana tau tu Yesu lan allo katorroan, iamoto namebali nakua lako to buda: Siannan allona tu la nanii tau sipatu mengkarang: iamoto allo iato la minii sae ammi dipamaleke, apa da ia ke allo katorroan.

¹⁵Apa Nabali Puang, Nakua: E to belo puduk, tae’raka mipantan umpasun tedongmi ba’tu darangmi lan mai barungna, ammi lao umpairu’i ke allo katorroan?

¹⁶Na iate baine iate anakna Abraham, nasangkin bang deata bulituk, aa sangpulo karuamo taunna, tang sipaturaka dirampanan dio mai sangkinna te allo katorroan iate?

¹⁷Iatonna ma’kadamo susito, masiri’mi tu mintu’ tau umbalii, apa iatu to buda sende-sende belanna mintu’ gau’ mala’bi’, Napogau’ Yesu.

¹⁸Iatonna iato Nakuami Yesu: Apara la dipapadanni tu ParentaNa Puang Matua sia apara la Kupasusianni?

¹⁹Susito lise’ sawi sanglise’, naala tau, natananni lan pa’lakna, natuo namendadi misa’ kayu kapua, anna nii manuk-manuk messerang tu mai tangkena.

²⁰Sia Nakuapa: Apara la Kupasusianni tu ParentaNa Puang Matua?

²¹Susi ragi naala misa’ baine napatamai to’ ta’pung tallung bakku’, anna silele messu’ sia lobo’.

²²Napasilamban-lambanmi Yesu tu kota sia kampong unnada’i tau. Iatu kalingkan iannato ma’palulako Yerusalem.

²³Denmi misa’ tau ungkutanai, nakua: O Puang, inang sidi’raka tu to makarimman? Nakuami Yesu lako:

²⁴Parukui tu kalemi unnola ba’ba sukku’, belanna Kukua lako kalemi: Buda tau undaka’ lalan la morai tama, apa pangkun.

²⁵Iamoto ke ke’de’mi tu ampu banua nasalli’i tu ba’ba, ammi randukmo bendan bang dio salian undedek ba’ba, mikua: O Puang, bungkarangkan kami, anNa mebalimo Nakua: Tae’ Aku kutandaikomi, lu umbarokomi nii sae?

²⁶Mane iari to miranduk ma’kada susite: Mangkamokan Mitiro kumande sia mangiru’ dio oloMi sia Miada’imokan dio lu lalan lan tondokki.

²⁷Apa la ma’kada lako kalemi kumua: Tae’ Aku kutandaikomi, lu umbarokomi nii sae? Pallaikomi dio mai Kaleku, e mintu’ to ma’gau’ kadake.

²⁸Indemoto la minii tumangi’ sia sisange’ isimmi, ke mitiromi tu Abraham na Ishak na Yakub sia mintu’ nabi lan ParentaNa Puang Matua, apa dipembuangangkomi kamu lako salian.

²⁹Manassa la den tu diona mai rampe matallo sia rampe matampu’, daa mai ulunna salu sia lo’ mai pollo’na uai nasangunno’koran lan ParentaNa Puang Matua.

³⁰Pa inang la den tu undi’-undi’na la mendadi dolo’-dolo’na, sia den tu dolo’-dolo’na la mendadi undi’-undi’na.

³¹Iatonna allo iato saemi ba’tu pira to Farisi umpellambi’i Yesu, nakua: Ke’de’moKomi, mallaimoKomi indete, belanna la morai Herodes umpateiKomi.

³²Nakuami Yesu lako: Malemokomi, pokadanni tu sindallung iato, kumua: Manassa la unnalaiNa’ deata sia umpamaleke tau te allo iate sia masiang duka, na allo ma’pentullannari namane upu’.

³³Apa tae’ nama’din tang malePa’ te allo iate sia duang bongi, belanna tae’ nama’din nabi la disanggang dio salianna Yerusalem.

³⁴E Yerusalem, Yerusalem, tu umpatei tu mai nabi sia untumbui batu tau disua lako kalemu, ba’tu pempiranMo’ la morai urrampun anakmu susi indo’ manuk urrampun anakna lan to’ pani’na, apa manokakomi.

³⁵Tiromi midisa’bianganan tu banuammi, apa Kupokada lako kalemi, kumua: Tae’mo mila untiroNa’ sae lako nalambi’na tu attu la minii ma’kada kumua: Maupa’mo Ia tu saena umpotete sanganNa Puang.