Read Toraja-Sa'dan LUKAS 14 Bible Online

LUKAS 14 - Toraja-Sa'dan bible

LUKAS 14

¹Den pissan tonna tama Yesu lan banuanna misa’ pangulu to Farisi la ungkande roti siappa’ allo katorroan, napenniroi bangmi tau.

²Denmi tau dio misa’ dibaa dio tingayoNa, masaki innak-innakan.

³Mebalimi tu Yesu, Nakua lako mintu’ pandita Sukaran aluk sia to Farisi: Ma’dinraka la dipamaleke tu tau ke allo katorroanni?

⁴Ma’loko-loko bangmi tinde tau. Naalai Yesu tinde to masaki, Napamalekei, Nasuai male.

⁵Nakuami lako tinde tau: Mindarokomi kamu ke denni misa’ keledaimmi ba’tu tedongmi natobang rokko garuang lan allo katorroan, tae’raka namadomi’ urriu’i diong mai?

⁶Tae’ pole’omi naissanni tinde tau umpebalii.

⁷Napokadammi Yesu misa’ pa’pasusian lako tinde mintu’ to ditambai, belanna Natiromo, kumua umba nakua tinde tau umpilei kao’koran mala’bi’, Nakuami lako tinde tau:

⁸Iake natambaiko tau lako pa’maruasan to ma’kapa’, da munii unno’ko’ tu kao’koran mala’bi’; den manii natambai tu mala’bi’na na iko.

⁹Anna sae tu to untambaiko sola tau iato, kumua: Lo’banganni te tau iate tu inan iatu, masiri’moko male unnala inan madiongan pissan.

¹⁰Sangadinna iake natambaiko tau, ia pissan tu madionganna munii unno’ko’, anna sae to tu to untambaiko nakuami lako kalemu: E sangmuane, iatu melo-melona munii unno’ko’. Dadi iato attu iato, dibilangmoko dio tingayona mintu’ tau tu musolanna unno’ko’ kumande.

¹¹Belanna minda-minda umpamadoan kalena, iamo la dipamadiongan, na minda-minda umpamadiongan kalena, iamo la dipamadoan.

¹²Sia Nakua Yesu lako tu to untambai: Iake umpogau’komi pa’maruasan ba’tu allona ba’tu bonginna, da mitambai tu mintu’ sangmanemi, ba’tu siulu’mi, ba’tu sangdadiammi, ba’tu sangtondokmi tu sugi’na, kumua natambaiokomi napabala’i lako kalemi.

¹³Sangadinna iake la untoratukomi tau, iari tu to kalala’ tambai sia to sala’ dadi, sia to sondo’ sia to buta.

¹⁴Dadi la salama’komi, belanna iatu tau iato tae’ nabelai umpabala’i lako kalemi, sangadinna la dipabala’i lako kalemi ke dipatuoi sule tu mintu’ to ma’bulo sanglampa.

¹⁵Iatonna rangimi tau misa’ lan mai mintu’na to unno’ko’ kumande sola Yesu te kada iate, nakuami mebali: La maupa’mo tu to ungkande roti lan ParentaNa Puang Matua.

¹⁶Apa Nakua Yesu lako tu tau: Dikua denmo tau misa’ umpogau’ pa’maruasan kapua sia buda tau natambai.

¹⁷Iatonna la kumandemo tau, nasuami tu kaunanna umpokadai lako tu to ditambai, kumua: Maimokomi, belanna sakka’ nasangmo.

¹⁸Susi nasang bangmi tu tau pada undaka’ bang posanga. Den nakua: Mane mangkana’ unnalli uma sanginan, dadi tae’ nama’din tang loo kutiro; iamoto dadi la messimanna’.

¹⁹Nakuaomi tu senga’na: Mane mangkana’ unnalli tedong limang ayoka, la loo kupakana-kana, iamoto dadi la messimanna’.

²⁰Nakua pole’omi tu senga’na: Mane mangkana’ mendapo’, iamoto dadi tae’ kula mati’.

²¹Nasusito sule bangmi tinde kaunan lako puangna umpokadanni tu mintu’nato. Sengkemi tu ampu banua, nakua lako kaunanna: Maleko madomi’ lan lu tondok, mubaai dio mai tu mintu’ to kalala’ sia to sala’ dadi, sia to buta sia to sondo’.

²²Ma’kadami tu kaunan nakua: O Puang, dadimo susitu mipokada, apa denpa tu inan lo’bang.

²³Nakuami tu Puangna lako kaunanna: Maleko lako batatta lompo sia dio lu to’ lalan, ammu parukui tama tu tau, naponnoi te banuangku;

²⁴belanna kukua lako kalemi: mintu’na tu to mangkamo ditambai dolo tae’ la ullepa’i te apa lan pa’maruasangku.

²⁵Pakalan denmi buda tau undi unturu’ Yesu, Namessaile Nama’kada lako tu tau Nakua:

²⁶Iake to la sae lako Kaleku natae’ nakabiri’ indo’ ambe’na sia bainena sia anakna sia siulu’na muane na baine, ontongrika katuoanna, iato tau iato tae’ nama’din dadi anak gurungKu.

²⁷Sia minda-minda tu tang umbaa melako kayu pea’ta’na undi urrundu’Na’, iato tau iato tae’ nama’din mendadi anak gurungKu.

²⁸Belanna mindarokomi kamu ke la umbangunkomi misa’ menara tang unno’ko’rokomika dolo unnagi-agianni tu langgoso’na, kumua ba’tu la siagi siai ummangkai tu pengkarangan iato?

²⁹Kumua da anna parandanganna manna mangka diparokko, anna tang dibelamo undanunni tu pengkarangan iato, anna randuk tu mintu’ to untiroi untelle-tellei,

³⁰nakua: Naparanduk lenmo te tau te umbangun menara, natae’ nabelai undanunni tu pengkaranganna.

³¹Ba’tu datu umbara, ke la sirarii datu senga’, natae’ na unno’ko’ dolo untimbang-timbangi, kumua iake sangpuloi sa’bunna la natanan siaraka la unneai tu uali sae urrarii, ke duangpuloi sa’bunna?

³²Iake tang natananni, nasua tu pesuanna loo umpokada kasitaman su’ding mambelapi tu uali.

³³Susi dukamo kamu to, minda-minda tu tang umpasalai penaa tu mintu’na apa dio kalena, iamo tae’ nama’din dadi anak gurungKu.

³⁴Iatu sia inang misa’ apa melo, apa iake memmatammakki tu sia, la dipatumba pole’pi anna mapi’da sule?

³⁵Tang la denpa gai’na lako padang sia moi dipopangangku’, sangadinna natibe bangmo tau. Minda-minda tu ketalinga la ma’perangi, naperangii.