Read Toraja-Sa'dan LUKAS 15 Bible Online

LUKAS 15 - Toraja-Sa'dan bible

LUKAS 15

¹Iatonna iato iatu mintu’ passima sia to kadake gau’na dio sisola Yesu la umperangii kadanNa.

²Sipa’nuku-nukuammi tu mintu’ pandita Sura’ sia to Farisi, nakua: Na iate Tau te untarima to kadake gau’na, sia kumande sola.

³Napokadami Yesu lako te pa’pasusian iate, Nakua:

⁴Mindarokomi kamu tu unnampui domba saratu’, ke pa’dei misa’, tang untampei tu kaseranna pulona ngkasera dio lu padang, namale undaka’i tu misa’, tu pa’dena sanaalanna?

⁵Iake nakabu’tui, parannumi penaanna male ungkolongi.

⁶Sia ianna rampomo lako banuanna, natambaimi tu mintu’ sangmanena sia sangbanuanna sirampun, nama’kada lako, nakua: La parannu-rannuki’ sola, belanna kukabu’tuimo sule tu domba pa’deku.

⁷Kukua lako kalemi: La susimoto tu kaparannuan lan suruga, belanna misa’ to kasalan mengkatoba’ losong ia na kasera pulona ngkasera to maruru’ penaanna tu tau ussanga kalena tae’mo namanggi’ la mengkatoba’.

⁸Ba’tu baine umbara, ke unnampui suku sangpulo napa’de misa’, tang untutungi palita nasapui tu banua sia mukkun undaka’i sanaalanna?

⁹Iake naalami, natambaimi tu mintu’ sangbainena sia sangbanuanna sirampun nama’kada lako nakua: La parannu-rannuki’ sola, belanna kualamo tu sukungku misa’ pa’de.

¹⁰Iamoto nakua kadangKu mati’: Susimoto tu kaparannuanna mintu’ malaeka’Na Puang Matua tu belanna misa’ to kasalan mengkatoba’.

¹¹Nakuami Yesu: Den misa’ tau da’dua anakna muane.

¹²Nakuami tu adinna lako ambe’na: O ambe’, benmo’ aku tu la kupoba’ginna tu iananmi.

¹³Nataammi tu iananna lako. Tae’ napirang allo to, naparandan nasangmi, namale lako misa’ tondok mambela, natabu-tabu bangi tu iananna dio lu, belanna solle’-solle’ bangmo.

¹⁴Pakalan tonna puramo umpamalei tu apanna, saemi karorian pannang lan lu tondok iato, randukmi kapu’duran.

¹⁵Malemi ussaro mase lako misa’ tau lan tondok iato, nasuami tinde tau lako pa’lakna ungkampai bai.

¹⁶La moraimi ungkande bangi tu pa’parran, tu nakande bai, apa moi misa’ tau tae’ duka umbenni.

¹⁷Tonna kilalaimo kalena, nakuami: Ba’tu pira-pira sia tu to ussaro kande dio ambe’ku tang umpura-pura kande, na ratomo’ aku dikka’ te mangelo.

¹⁸La ke’de’na’ kuloo umpellambi’i ambe’ku, kukuamora lako: O ambe’, kasalammo’ lako Puang Matua sia lako kalemi.

¹⁹Tang sipatumo’ la misanga anakmi, papada bangmo’ misa’ to sumaro kande lako kalemi.

²⁰Pakalan ke’de’mi narampo lako to’ ambe’na, apa mambela bangsiapa natiromi ambe’na, natibaliang ara’na sia mamasseng namale ma’dondo-dondo umpessitammui, naraka’i sia naudung.

²¹Apa nakua tu anakna lako: O ambe’ kasalammo’ lako Puang Matua sia lako kalemi; dadi tang sipatumo’ la misanga anakmi.

²²Apa nakua tu ambe’na lako kaunanna: Madomi’komi baai mai tu sambu’ me’lok, ammi papakei sia patamanni sissin tu limanna sia paluangi sepatu tu lentekna;

²³sia baai mai tu anak tedong maloppok misa’, mitunuanni, la ma’marua’-rua’ki’.

²⁴Belanna matemo tu anakku anna tuo sule, pa’demo anna bu’tumo sule. Pakalan naparandukmi ma’marua’-rua’.

²⁵Iatu anak pa’bunga’na dio lu pa’lak; tonna saemo mandappi’mo lako to’ banua narangii tu to ma’gandang sia to manimbong;

²⁶natambai misa’ tu kaunanna nakutanai: To ma’aparaka ia te?

²⁷Nakuami lako: Napa tu adimmi sulemo, natunuanni ambe’mi anak tedong maloppok, belanna nakabu’tui marampa’mo sule.

²⁸Sengkemi, manoka loo tama; iamoto dadi sunmi tu ambe’na loo unnaran-naranni.

²⁹Apa nakua mebali lako ambe’na: Timbang-timbangi; sama-samamo’ taunna matutu dio kalemi; tae’ bangra kupasalai, ke mikuanna’, natae’ bangpa aku miben lenna’ anak bembe’ misa’, angku ma’marua’-rua’ sola sangmaneku.

³⁰Namane sae ia te anak mangkammi umbala’-bala’ iananmi sola baine bualang, ammi tunuammi anak tedong maloppok!

³¹Nakuami ambe’na lako: E anakku, iatu iko tontong siaki’ sisola, na iatu mintu’ apa dio kaleku apammu nasang.

³²Sipatuki’ ma’marua’-rua’ sia parannu-rannu, belanna iate adimmu matemo anna tuomo sule, pa’demo anna dikabu’tuimo sule.