Read Toraja-Sa'dan LUKAS 19 Bible Online

LUKAS 19 - Toraja-Sa'dan bible

LUKAS 19

¹Lu tamami tondok Yerikho tu Yesu, tarru’ liu bang male.

²Denmi tau dio misa’ disanga Zakheus, iato tau iato kapala passima sia sugi’ duka.

³Undaka’mi lalan la morai untiro Yesu, kumua mindara tu disanga Yesu, apa tae’ nabelai untiroI, belanna to buda, na iatu Zakheus to kondi’.

⁴Dolomi ma’dondo-dondo unteka’ kayu ara pangala’ la morai untiroI, belanna iamo la Nanii lendu’ to.

⁵Iatonna rampomo Yesu lako to’ inan iato, mentingarami, Nakuami ungkuanni: E Zakheus, mengkalaoko madomi’, belanna iate allo iate inang la lempangKu dio to’ banuammu.

⁶Tikara-karami mengkalao untammui Yesu, parannu tongan penaanna.

⁷Sipa’nuku-nukuammi tu mintu’ to untiroi tu iannato, nakua: Naloo Ia lempang lako to’ banuanna to kadake gau’na.

⁸Ke’de’mi tu Zakheus nama’kada lako Puang, nakua: O Puang, sangsesena tongan bang tu iananku kuben to kalala’ sia iake denni apa-apanna tau kutangnga’ kualai, kupopellokkon penna’pa’ kupasuleanni lako.

⁹Nakuami Yesu lako: Ia duka bangsiamote allo iate narampoi kamakarimmanan te banua iate, belanna iate anakna duka Abraham;

¹⁰belanna saemo Anak rampan dilino la undaka’i sia ungkarimmanni tu pa’dena.

¹¹Iatonna marassanmo tu tau umperangiI, Natarru’imi Yesu tu kadanNa, umpokada misa’ pa’pasusian, belanna mandappi’mo lako Yerusalem sia nasanga tinde tau, la madomi’mo bu’tu tu ParentaNa Puang Matua.

¹²Iamoto nakuami Yesu: Den misa’ Puang male lako misa’ tondok mambela, la loo ditappu dadi datu, namane sule.

¹³Untambaimi kaunanna sangpulo, nabenni sangpulo mina lako, nakua ungkuanni: Palolo’-lolo’i te sae lako suleku.

¹⁴Apa nakabiri’ sangtondokna tinde tau, namesua undi urrundu’i, nakua: Nokakan kami la nadatui te tau iate.

¹⁵Iatonna sulemo ditappu datu, mesuami untambai mintu’ kaunanna, tu mangka naben doi’, la sae mennolo lako kalena, kumua anna issanni, ba’tu sipiramo nasaro ma’balili.

¹⁶Saemi tu bunga’na, nakua: O puang, iatu minami kesaro pole’omo sangpulo mina.

¹⁷Nakuami tu puangna lako: Iamo melona to, e kaunan masokan, belanna kamarurusammu lan penggauran bitti’, dadi ma’dinmoko la umparenta sangpulo tondok.

¹⁸Saeomi tu ma’penduanna, nakua: O puang, iatu minami kesaromo lima.

¹⁹Nakua dukami tu puangna lako tinde tau: Ma’din dukamoko umparenta lima tondok.

²⁰Sae pole’omi tu senga’na nakua: O puang, indemo tu minami, tu kuanna diong pantarekan;

²¹belanna mataku’na’ lako kalemi, apa inang to matorokomi, unnala bangkomi tang pangannami, umpeburai bangkomi tang pantananmi.

²²Nakuami tu puangna lako: E kaunan kadake, la kuparundu’i ukungammu tu sunna dio pudukmu! Muissanmo kumua aku te to makarra’ penaangku, unnala bangna’ tang pangannaku, umpeburai bangna’ tang pantananku.

²³Anna ma’apai ammu tang umpatamai tu doi’ku tama naninna tau umpa’pedenneran doi’? Kumua kasulepa kupalakui sola tu uainna.

²⁴Nakuami lako to bendan dio: Alai dio mai tu minanna, mibenni lako tu to sangpulo mina dio.

²⁵Nakuami tinde tau: O Puang diomo ia sangpulo mina!

²⁶Kukua lako kalemi: Minda-minda tu unnampuimi, la diben dukapa lako, apa iatu tae’na dio, moi iatu apa dionamo kalena, la dialai pissan dio mai.

²⁷Apa iatu mintu’na ualingku, tu manokana umpodatuna’, solanni mai ammi patei dio tingayoku.

²⁸Iatonna mangkamo Yesu ma’kada susito, dolomi dio tingayona tau Namale langngan Yerusalem.

²⁹Iatonna reke’mi tu Betfage sia Betania dio buntu disanga Zaitun, Nasuami tu anak gurunNa da’dua,

³⁰Nakua: Malekomi lako tu tondok misipatuan; iake malekomi tama, la unnappa’komi misa’ anak keledai disangkin, tae’ bangpa nasakei tau, bukai mibaai dio mai.

³¹Iake denni tau ungkutanaikomi, kumua: Ma’apai ammi bukai? kuakomi lako: Den la Napapatuanni Puang.

³²Malemi tinde to disua, naappa’i susitu Napokadanni lako.

³³Marassanmo nabukai tu ulang anak keledai, nakuami tu puangna: Ma’apai mirampananni te anak keledai te?

³⁴Nakuami tinde tau: Den la Napapatuanni Puang.

³⁵Nabaami lako Yesu, naampa’i sambu’na dao tu anak keledai, napanno’ko’i tu Yesu dao.

³⁶Tonna malemo mukkun bangmi tu tau umballa’ pakeanna lako lalan.

³⁷Iatonna rampomo lako aa’ buntu Zaitun, randukmi parannu-rannu penaanna tu mintu’ anak gurunNa sia unnarak-arrak umpudi-pudi Puang Matua, belanna mintu’ kamatotoran mangka natiro,

³⁸nakua: Kurre sumanga’na tu Datu, sae umpotete sanganNa Puang; Kamarampasan dao suruga, Kamala’biran lan inan madona!

³⁹Nakuami ba’tu pira-pira to Farisi lan mai tu to buda lako Yesu: O Guru, gagai tu anak gurumMi.

⁴⁰Mebalimi nakua: Kukua lako kalemi: Iake la ma’loko-lokoi tinde mai, inang la kumalasi-lasi tu batu.

⁴¹Pakalan tonna mandappi’mo Natiromi tu tondok iato, Natangi’imi,

⁴²Nakua: Iakemmu la unnissanni tu apa la ma’din umpadenangko kamarampasan, moi na iate allo iate! Apa totemo te mintu’nato nasala matammu.

⁴³Belanna la sae tu allo kamatilakammu sia la natambakukuko mintu’ ualimmu sia natalimbung tamako, sia nasikemunni tikuko sae,

⁴⁴sia napemparrakangko rokko padang nasilullu’iko sola mintu’ anakmu lan lili’mu sia tae’mo batu la mettodo’ dao batu natampeangko lan lili’mu, belanna tae’ mupalan ara’i tu attunna kasaeanna pa’kamaseanNa Puang Matua lako kalemu.

⁴⁵Pakalan iatonNa tamamo Yesu tama to’ Banua Kabusungan, Naparandukmi urrambai sun tu mintu’ to ma’baluk sia to mangalli lan.

⁴⁶Nakua ungkuanni tu tau: Den lan Sura’Na Puang Matua susite; Iatu BanuangKu banua passambayangan ia, apa mipadadimo lo’ko’pa’gora’.

⁴⁷Kiallo-kiallo mangada’i bang tu Yesu lan Banua Kabusungan; undaka’ toda bangmi ia lalan tu pangulu to minaa sia pandita Sura’ sia ia duka tu kapala, la morai ussanggangi;

⁴⁸apa tae’ naappa’i tu la napogau’na belanna iatu to buda la’ka nasang penaanna lako Yesu, sia naperangii tu pangadaranNa.