Read Toraja-Sa'dan LUKAS 2 Bible Online

LUKAS 2 - Toraja-Sa'dan bible

LUKAS 2

¹Den pissan tonna iato, sunmi parenta dio mai datu Agustus mesua ussura’ sanganna mintu’ tau lan parentana.

²Iate bunga’na kapassurasan iate iamo na Kirenius to maraa dio parenta Siria.

³Dadi mintu’na tau pantan male umpeloloi tongkonanna, la disura’ sanganna.

⁴Male dukami tu Yusuf dio mai Galilea, lan mai tondok Nazaret, lako tondok Yudea, tondokna Daud, disanga Betlehem, belanna bati’na sia tarukna Daud,

⁵kumua nadisura’ sanganna sola Maria, sikampana, tu mabanda’mo ma’tambuk.

⁶Iatonna dio bangsiapa lu sola duai, ta’kala nalambi’mi allo kakianakanna tu Maria.

⁷Kianakmi, undadian misa’ Pia muane, iamo pa’bunga’na, naammu’Imi sambu’, napamamma’I rokko palungan, belanna tae’mo inan la nanii sola duai lan banua pa’bongian.

⁸Lan lili’na tondok iato den ba’tu pira-pira to manglaa torro bang dio lu tangnga padang ungkampai sangtuntunan pangkambi’na kebongi.

⁹Tiramban denmi misa’ malaeka’Na Puang Matua bendan dio tingayona tu to manglaa sia natikui arrang maseroNa Puang Matua, dadi lendu’mi mataku’na sola nasang.

¹⁰Nakuami tu malaeka’ lako: Da mimataku’, belanna la kupokadangkomi kaparannuan kapua tu dipadenan angganna tolino,

¹¹kumua iate bongi totemo dipadadiammokomi To patutungan bia’ lan tondokna Daud, iamo Kristus, tu Puang iato.

¹²Inde sia tu tandana lako kalemi: la ungkabu’tuikomi misa’ Pia diammu’I sambu’, dipamamma’ lan palungan.

¹³Pakalan denmi budai sangtuntunan lan mai tu mintu’na malaeka’ ma’baanan dao suruga nasolan tinde malaeka’ umpudi-pudi Puang Matua, nakua:

¹⁴Mintu’na kadipangkeran lu langngan nasang Puang Matua dao madona, sia kamarampasan lan lino lako to Nakaelo.

¹⁵Iatonna memboko’mo tu malaeka’ sule langngan langi’, nakuami tinde to mangkambi’ sipa’kada-kada: Maikomika duka talao lako Betlehem, untiroi tu apa dadimo dio, tu mangka dipokada, Napa’peissanan Puang lako kaleta.

¹⁶Nasarra’i sae, nakabu’tui tu Maria sola Yusuf na iatu Pia’-Pia’ mamma’ lan palungan.

¹⁷Iatonna tiromi, narundunammi tu kada dipokadanni diona tinde Pia’-Pia’.

¹⁸Iatu mintu’nato urrangii, nakamangngai nasang tu apa napokada to manglaa lako.

¹⁹Apa iatu Maria nananna inaa nasang bang tu kada iato, natangnga’- tangnga’i.

²⁰Sangsulean nasangmi tu to manglaa umpakaraya sia umpudi-pudi Puang Matua, belanna mintu’na tu apa mangka narangi sia natiro sipatu tu mangka dipokadanni lako.

²¹Iatonna ganna’mo karua allona tinde Pia, la disunna’mi, disangai dukami Yesu, susitu nasanganni malaeka’, tonna tae’pa natambukki indo’na.

²²Iatonna lambi’mi allo kamaseroanna tu indo’Na, susitu atoranna Musa, nabaami tu anakna lako Yerusalem, la lao napopennolo lako oloNa Puang Matua;

²³susitu disura’ lan Sukaran alukNa Puang, kumua: Mintu’na pia’-pia’ muane tu bunga’na urrubak pa’tambukanna indo’na, iamoto tu disanga marimbangan lako Puang Matua,

²⁴sia la umpemalaran pemala’, susitu dipokada lan Sukaran alukNa Puang: tu bu’ku’ da’dua ba’tu da’dua anak bu’ku’ ala’.

²⁵Den todami tau lan Yerusalem misa’, disanga Simeon, iamo misa’ to malambu’ sia umpatongan Puang Matua, umpeagi bangmo pa’pakatana lako to Israel sia den Penaa Masallo’ lan kalena.

²⁶Mangkamo napokada Penaa Masallo’Na Puang Matua lako kalena, kumua tae’pa nala sitiro kamatean, ke tae’pi natiroi tu Kristus dolo.

²⁷Belanna pa’patudu-tudunNa PenaanNa Puang Matua saemi tama Banua Kabusungan; tonna baaI indo’Na sola ambe’Na tinde Pia, iamotu Yesu, tama, la dipogau’ lako, susitu atoranna Sukaran alukNa Puang Matua,

²⁸naala dukami Simeon, nakayunNi, namane umpudi-pudi Puang Matua nakua:

²⁹O! Puang, elo’namo Misarakki mana’pana’ lan mai te lino, susitu kadamMi,

³⁰belanna natiromo matangku tu kamarendengan lu dio mai Kalemi,

³¹tu Miparandanan angganna tolino.

³²Iamotu parrang unnarrang to kalillinan sia misa’ kamala’biran lako taumMi to Israel.

³³Napomangngami ambe’Na sola indo’Na tu dipokadanna diona tinde Pia.

³⁴Napalakuammi kamauparan Simeon, nama’kada lako Maria, indo’Na: Manassa iate Pia te la napotallan sia napobangun buda tau dio tondok Israel sia la mendadi tanda disisakkai;

³⁵ondongpa butung misa’ la’bo’ la ungkandeko tarru’ sae tama inan penaammu kumua, anna buda tau tibungka’ penaanna.

³⁶Den misa’ tau, disanga Hana, nabi baine, anakna Fanuel, bati’na Asyer, masaimo tau; anak darapa nakemuane napitung taunri sisola muanena;

³⁷balumo na umbai karuamo pulona nna’pa’ taunna; tae’ bang namemboko’ lan mai banuanNa Puang Matua umpenombai Puang Matua, ma’puasa bang sia massambayang keallo kebongi.

³⁸Iatonna iato saemi, naparandukki umpudi-pudi Puang Matua sia unnuleleanni tinde Pia lako mintu’ to untayan kadila’bakanna Yerusalem.

³⁹Iatonna mangkamo umpogau’i tu mintu’na tu natuntunna Sukaran alukNa Puang Matua, sulemi lako Galilea, lako tondokna siamo dio Nazaret.

⁴⁰Sakapua-puanami tinde Pia samatoto’-toto’Na sia Naponnoi kakinaan sia tae’ natore pa’kamaseanNa Puang Matua lako.

⁴¹Dilambi’oi taun maleoi tu indo’ ambe’Na lako Yerusalem, ke allo Pasa.

⁴²Iatonna sangpulo duamo taunna dadinNa tu Yesu, ke’de’mi male sola tallui lako Yerusalem, susitu biasanna alukna allo kapua;

⁴³iatonna mangkamo umpalendu’ nasangi dio tu alukna allo iato, tonna matangnga lalanmo sule, tinampemi tu Yesu dio Yerusalem, apa tae’ naissanni to matuanNa.

⁴⁴Apa belanna sae lan penaanna, kumua umbai malemo situru’ to nasiban, male bangmi ma’angge lingkan sangallo, nadaka’i lan lu alla’na sangmanena sia sitanda-tandanna.

⁴⁵Iatonna tae’mo natiro, sulemi lako Yerusalem, la lao undaka’I.

⁴⁶Iatonna ma’tallung allomo, pakalan nakabu’tuI lan banuanNa Puang Matua unno’ko’ lan tangnga-tangngana mintu’ pandita, marassan umperangii kadanna sia mekutana-tana lako.

⁴⁷Mintu’na tu tau urrangii tu kadanNa Puang Yesu, nakamangngai nasang tu kamanaranganNa sia mintu’ pebalinNa.

⁴⁸Iatonna tiromi indo’Na sola ambe’Na, tibaliangmi ara’na, nakuami tu indo’Na lako: E anakku, ma’apari Mupasusirakan to? Selang tongan penaangku sola ambe’Mu undaka’Ko.

⁴⁹Nakuami Yesu lako: Ma’apari ammi daka’Ra’? Tae’raka miisan, kumua iatu Aku tae’ Kutang lan banuanNa Ambe’Ku?

⁵⁰Tae’mi natandai Maria sola Yusuf battuananna to kada mangka Napokada lako.

⁵¹Malemi sule sola, Nasae lako Nazaret, mengkaola bang lako indo’Na sia ambe’Na. Apa iatu indo’Na napalan bang penaanna tu mintu’na kada iato.

⁵²Sakerangngan-rangngannami kamanaranganNa tu Puang Yesu sia kakapuanNa situru’ pa’poraianNa Puang Matua sia tolino.