Read Toraja-Sa'dan LUKAS 20 Bible Online

LUKAS 20 - Toraja-Sa'dan bible

LUKAS 20

¹Den sangallo tonna iato, marassanmo Yesu unnada’i mintu’ to lan Banua Kabusungan sia umpa’peissanan Kareba-kaparannuan, saemi pangulu to minaa sia pandita Sura’ sola pekaamberan umpellambi’I,

²sia ma’kada tinde tau lako nakua: Pokadangkanni kuasa apara Mipokuasa umpogau’i te mintu’na te, ba’tu mindaraka umpakuasaKomi?

³Mebalimi Nakua lako tinde tau: Den duka misa’ la Kupekutanan lako kalemi, pokadan todaNa’ mai:

⁴Iato pa’dio’na Yohanes, lu daoraka mai suruga, ba’tu lu dioraka mai tolino.

⁵Nasitangnga’-tangnga’i kalenami tinde tau: Iake la takua: lu dao mai suruga, inang la Nakua: Nama’apai anna tae’ mipatonganni?

⁶Apa iake la takua: lu dio mai tolino, inang la natumbuiki’ batu to buda, belanna napatongan sola nasangi, kumua iatu Yohanes, nabi.

⁷Mebalimi tinde tau, nakua: Tae’ kami kiissanni, kumua, umba ia nanii sae.

⁸Nakuami Yesu lako tinde tau: Iamoto natae’ duka Kumorai umpokadangkomi, kuasa apara Kupokuasa, umpogau’i te mintu’na te.

⁹Namangkato Naparandukmi umpokadai te pa’pasusian iate lako to buda: Den misa’ to anu mantanan anggoro’ lan misa’ pa’lak, napa’petesananni lako to ma’tesan, namale lako tondok senga’ natorro masai dio lu.

¹⁰Iatonna la peanggorosammo, nasuami tu kaunanna misa’ lako tu to ma’tesan, kumua anna benni tu taana tu bura pa’lakna lako. Apa iatinde to ma’tesan nalonga’ora sia narambai lo’bang lan mai.

¹¹Nasua pole’omi tu kaunan senga’na, apa nalonga’ siao sia napakario-rio sia narambai lo’bang lan mai.

¹²Nasua pole’omi tu ma’pentallunna, apa nabangkei siao napembuanganni lako salian.

¹³Mangkato, nakuami tu puangna tinde pa’lak: Apa siapa la kupogau’? La kusua tu anak kaboro’ku, umbai la nakasiri’ sia ke ia.

¹⁴Apa iatonna tiromi tinde to ma’tesan, nasipada-padaimi, nakua: Indemo tu la umpoapai, maikomi tapatei, anna kita umpoapai tu apanna.

¹⁵Napembuangammi lan mai pa’lak anggoro’ lako salian, napatei. La napatumbai puangna pa’lak anggoro’ tinde tau?

¹⁶La sae ussanggangi tu mintu’nato ma’tesan iato sia iatu pa’lak anggoro’ naben to senga’. Iatonna rangimi tu kada iato, nakuami: Napatoyang-toyang ia Puang Matua dio mai kaleki tu iannato!

¹⁷Apa mentiro Yesu lako tinde tau, Nakua: Na apa battuananna te kada iate disura’: Iatu batu natibe mintu’ pande, mendadi batu petau?

¹⁸Minda-minda tobang rokko tu batu iato, inang la ru’puk-ru’puk tu tau iato, sia minda-minda nai’pinni tu batu iato, manassa la nanisak-nisak.

¹⁹Iatonna iato undaka’mi lalan tu mintu’na pandita Sura’ sia pangulu to minaa la undammakki tu Yesu, belanna natandai tu pa’pasusian iato, kumua gau’na narua, apa mataku’i lako to buda.

²⁰NatuntunNi bangmi tau iato, iamoto nasuai ba’tu pira-pira tu tau loo ummata-matai sia unna’ga to malolo kalena, kumua anna pentoei sangbuku tu kadanNa, tu la naninna umpa’peturoanNi lako to paa sia lako parentana to maraya.

²¹Mekutanami tinde tau lako, nakua: O Guru! kiissan tongan tu kadamMi sia pangadaramMi, kumua malolo sia tae’ tau Milaenan, sangadinna umpa’pangadaran tongan bangKomi lalanNa Puang Matua;

²²sipaturakannika la ussorong sima lako datu kapua, tae’raka?

²³Apa Naissan Yesu tu tanga’na tinde tau, dadi Nakuami ungkuanni:

²⁴PakitanNa’ tu dinara[1] misa’! Mindara rupa sia passura’ te lan! Nakuami tinde tau: Datu kapua.

²⁵Nakuami Yesu mebali lako tinde tau: Iamoto dadi pennoloanni lako datu kapua tu apanna datu kapua sia lako Puang Matua tu apanNa Puang Matua.

²⁶Tae’ nabelai tau iato mai untingkanni misa’ tu kadanNa dio tingayona to buda, nakappa tinde tau, umpomangnga pebalinNa Yesu.

²⁷Saemi ba’tu pira-pira to Saduki lako Kalena tu ussangai, kumua tae’ tu katuoan sule,

²⁸namekutana susite: O Guru! susite nasurasangkan Musa: Iake denni siulu’na tau kebainemo, namate, apa tae’ anak natampe tonna mate, siulu’na la umpobainei tu bainena, anna pabu’tuanni bati’ tu siulu’na.

²⁹Naden tau pitu siulu’ naumpobaine baine misa’ tu pa’bunga’na, namate natae’ anak natampe.

³⁰Iami tu ma’penduanna,

³¹sia ma’pentalunna umpobainei tinde baine; susi nasang bangi sola pitui mate natae’ anak natampe.

³²Undinna tonna mate nasangmo, mate dukami tinde baine.

³³Dadi iake allo katuoan sule to, umbannamo tinde tau sola nasang la umpobainei? Belanna mangkamo sola pitui umpobainei.

³⁴Napokadammi Yesu lako tinde tau, Nakua: Iatu tau untorroi te lino kebaine sia dipakemuane,

³⁵apa iatu to disanga sipatu la umpomana’ lino undi sia katuoan sule, tae’mo nala kebaine sia dipakemuane,

³⁶belanna tae’mo nama’din mate len, apa susimo malaeka’ sia anakNa Puang Matua, belanna iatu tau iato to dipatuo sule.

³⁷Sia iatu kadipatuoanna to mate sule napamanassa duka Musa lan to’ duri, tonna sa’bu’ Puang Matua Puangna Abraham sia Ishak sia Yakub.

³⁸Iatu Puang Matua inang tae’ Napuangna to mate, sangadinna Puangna to tuo, belanna la lu lako nasang tu katuoanna mintu’ tau.

³⁹Mebalimi pira tu pandita Sura’, nakua: O Guru, tonganna tu kadamMi!

⁴⁰Belanna tae’mo nasarai umpekutanan apa-apa.

⁴¹Nakuami Yesu lako tinde tau: Ma’apari nadikuara Anakna Daud tu Mesias?

⁴²Apa lan sura’ Pa’pudian Daud kalena ma’kada, kumua: Nakuami Puang lako Puangku: Unno’ko’Komi dio kananKu.

⁴³Sae lako kupadiongna nasang to’ lentekMi tu ualimMi.

⁴⁴Daud kalenamo umpekapuangi, umba nakua nala Ia pole’o napoanak?

⁴⁵Tonna ma’perangi tu mintu’ to buda, Nakuami tu Yesu lako anak gurunNa:

⁴⁶Kanandaikomi kalemi dio mai pandita Sura’, tu naporai bang male sumalong ma’bayu lamba’ sia morai bang dipekatabe’i dio lu pasa’ sia naporai unno’ko’ dio kao’koran mala’bi’ lan banua pa’kombongan sia inan madaoan lan pa’maruasan,

⁴⁷sia iatu unnimbakan iananna baine balu sia naangga’-angga’i umpamalambe’ passambayangna; iatu tau susito mandu la narua tampak ropu.