Read Toraja-Sa'dan LUKAS 21 Bible Online

LUKAS 21 - Toraja-Sa'dan bible

LUKAS 21

¹Umbangunammi matanNa tu Yesu, Natiroi tu to sugi’ umpatama pamenganna tama patti doi’ pa’kamasean.

²Natiro dukami tu baine kalala’ umpatama misa’ doi’ bittik.

³Nakuami: Kukua lako kalemi: tonganna losong ia napatama te baine balu kalala’ iate na iatu tau mintu’.

⁴Belanna iatu tau sola nasang la’binnapi nanii unnalai narangngananni sidi’ tu doi’ pa’kamasean, apa iate baine iate tu kataerannamira dikka’ napatama nasangi tu apa napotuona.

⁵Pakalan iatonna pokada-kadai ba’tu pira-pira tau tu diona Banua Kabusungan melo tongan ditiro tu mai batunna sia dikassa’i apa melo, iamotu mai apa napa’kamasean tau, Nakuami Yesu:

⁶Iate mintu’na mitirona te, la sae tu allona, ke tae’ bangmi torro tu batu mettodo’ dao batu senga’, tu tang la diseranna.

⁷Mekutanami tinde tau lako, nakua: O Guru, piranra nala dadi tu mintu’nato? Sia apara tandana to ke la dadi tu mintu’nato?

⁸Nakuami: Kanandai tonganni, da napapusakomi tau, belanna buda tau la sae umposanga sangangKu, nakua: Aku bangsiamote! sia: mandappi’mo tu allu’na! Apa da mirundu’i tu tau iato.

⁹Iammi rangi diona kasirarian sia ba’tu pira-pira kamaramban, da mitiramban, belanna tae’ nasalai tang sae dolo tu iannato, apa tae’pa nasimpolo la katappuranna to.

¹⁰Pakalan Nakuami lako tinde tau: Bangsa la siea pada bangsa sia to sangkadatuan la siea to sangkadatuan,

¹¹sia la den pembuda ra’ba biang sia lino’ kapua dio lu ba’tu pira-pira tondok sia karorian sia penggauran dikataku’ sia tanda kalle-kallean kapua dao mai langi’.

¹²Apa dolona na iate mintu’na te, la napata’paikomi lima sia la nalolaikomi sae lako napatamammi banua pa’kombongan sia tama pa’tarungkuan sia la napakendekkomi lako olona datu sia to maraya tu belanna sangangKu.

¹³La naruakomi mintu’nato, ammi mendadi to sa’bi.

¹⁴Iamoto sipatu la mipemanassai lan penaammi, da mitangnga’i dolo tu la mipebalianna,

¹⁵belanna la Kubenkomi kada sia kamanarangan, tu tang nalambi’na nabali ba’tu nagaga mintu’ to unnea- komi.

¹⁶Moi to matuammi sia siulu’mi sia sangdadiammi sia sangmanemi la naparapa’ dukakomi sia iatu kamu denkomi la napatei;

¹⁷sia la nakabiri’komi mintu’ tau tu belanna sangangKu.

¹⁸Apa moi sanglamba’ beluakmi tae’ nala matumba;

¹⁹ke umpatontong bangkomi penaammi, ungkarimmanni katuoammi.

²⁰Iammi tiromi tu Yerusalem natalimbung tama to parari, iato attu iato la miissan, kumua mandappi’mo kasangganganna.

²¹Iato attu iato, la mallai langngan tanete tu to dio Yudea, sia lanna tondok la sun sia iatu diona to’ uma da natama.

²²Belanna iamo allo dinii umpabala’i, kumua anna sundun tu mintu’na disura’na.

²³Apa upu’ allona tu to ma’tambuk sia to sumusupa anakna to attu iato, belanna kamaparrisan kapua la dadi lan lino,

²⁴sia kasengkean lako te tau sia la mate nakande pa’dang mataran sia dirampa nadibaa lako mintu’ rapunna tau sia iatu Yerusalem la nasilullu’i to kapere’ sae lako kasundunanna allona tu to kapere’.

²⁵Sia la den tanda kalle-kallean bu’tu dao allo sia bulan sia bintoen sia lan lino kasumpuan mintu’ tau sia putta penaanna, ke mongo’mi tu tasik sia bombang;

²⁶sia mintu’na tau kadangkeng nasa’ding lan penaanna, belanna mataku’ sia umpeagii tu la urruannai te lino, belanna mintu’ kamatotoran dao langi’, la kedo.

²⁷Sia iato attu iato la natiro tu Anak rampan dilino sae lan gaun sisola kamatotoran kapua sia kamala’biran kapua.

²⁸Ianna randukmo dadi tu mintu’nato, mentingarakomi sia bangunangkomi ulummi, belanna mandappi’mo tu kalessurammi.

²⁹Napokadammi misa’ pa’pasusian lako tu tau, Nakua: Tiroi-tiroi tu kayu ara sia mintu’ kayu.

³⁰Iake mitiroi mellolo, miissan kalenamo, kumua la madomi’mo pealloan.

³¹Susi dukamoto tu kamu, iake mitiroi dadi tu mintu’nato, mitandaimo to, kumua la madomi’mo sae tu ParentaNa Puang Matua.

³²Tonganna tongan Kukua lako kalemi: Bangsa iate tae’ nala pa’de, ke tae’pi nadadi tu mintu’nato.

³³Iatu langi’ sola lino la pa’de, apa iatu kadangKu tae’ nala pa’de.

³⁴Kanandai tonganni, da namalilu tu penaammi napobua’ kamasalung-salungan sia kamalangoan sia umpengkaolai katuoan lan te lino, naurunganni tae’ bang nadikapang-kapang naalamokomi to allo iato susi misa’ poya.

³⁵Belanna la narua tu angganna to untorroi tana kalua’.

³⁶Iamoto ma’penandakomi sia tontongkomi massambayang, sangapaoi ammi ma’din lessu’ dio mai mintu’na te tu la dadi undinna sia ammi mennolo lako Anak rampan dilino.

³⁷Iake allona mangada’imi tu Yesu lan Banua Kabusungan, apa iake bonginna sun Nama’bongi dao tanete, disanga buntu Zaitun.

³⁸Iatu mintu’na to buda, sitae’pa bongi nasaemo umpellambi’I tama Banua Kabusungan la umperangii pangadaranNa.