Read Toraja-Sa'dan LUKAS 22 Bible Online

LUKAS 22 - Toraja-Sa'dan bible

LUKAS 22

¹Pakalan namandappi’mo tu allo dinii ungkande roti tang diragii tu disanga allo Pasa.

²Undaka’mi lalan tu mintu’ pangulu to minaa sia pandita Sura’ la umpatei Yesu, apa mataku’ lako to buda.

³Iatonna iato natamaimi deata bulituk tu Yudas, tu diganti Iskariot, siposangpulo duanna tu anak gurunNa Yesu.

⁴Malemi sipa’kada mintu’ pangulu to minaa sia kapala, kumua umbara la nakua ussorongI lako tu Yesu.

⁵Parannumi penaanna tinde tau naallu’i, la ussaroi doi’.

⁶Nakadoimi nadaka’i tu attu melo la nanii ussorong kamama’I lako tu Yesu.

⁷Pakalan nalambi’mi tu allo roti tang diragii, tonna sipatunnamo tu Pa’pasa la ditunu.

⁸Nasuami Yesu tu Petrus na Yohanes, Nakua: Loomokomi umpasakkarangki’ tu Pa’pasa, anta kandei.

⁹Nakuami sola duai lako: Umbara nii tu Miporainna, la kinii umpasakka’i?

¹⁰Nakuami lako: Manassa iammi tama tondok, la sitammukomi misa’ tau umbaa busso nanii uai, undikomi urrundu’i, ammi tama tu banua nanii

¹¹tama, ammi kua lako tu ampu banua: Nakua kadanNa Guru lako kalemi: Umbara tu inan la Kunii sola anak gurungKu ungkande Pa’pasa?

¹²Anna pakitangkomi misa’ tu inan mengkadoan sia malona’, sakka’ nasangmo tu pengkarangan dio, iamo minii umposara’i.

¹³Malemi sola duai anna kabu’tui tu Napokadanna Yesu, napasakka’i tu Pa’pasa.

¹⁴Iatonna lambi’mi attunna unno’ko’mi kumande sola tu rasulu’ sangpulo dua.

¹⁵Nakuami lako: Kukabarii tongan ungkandei dolo te Pa’pasa sola kamu, Kumane dipakario-rio,

¹⁶belanna Kukua lako kalemi kumua: tae’mo Kula ungkande lenni, sae lako disundunninna lan ParentaNa Puang Matua.

¹⁷Iatonna alami Yesu tu irusan misa’, ma’kurre sumanga’Mi, sia Nakua: Alai te mitaataai sola nasangkomi.

¹⁸Belanna Kukua lako kalemi: Tae’mo Kula unniru’ uai anggoro’ sae lako saena tu ParentaNa Puang Matua.

¹⁹Naalami tu roti Nama’kurre sumanga’, Natepu-tepui anNa benni, Nakua: Iamote tu batang kaleKu, tu dipa’bengan belanna kamu: Pogau’mi susite minii umpengkilalaiNa’.

²⁰Susi dukato tonna mangkamo kumande, Naalami tu irusan, Nakua: Iate irusan iate iamo irusan titanan basse ba’ru lan raraKu tu dipato’do belanna kamu.

²¹Apa tiromi iatu limanna to ussorongNa’ sisola sia limangKu dao te meda.

²²Inang la maleNa tu Anak rampan dilino, susitu mangka dilampakanNi, apa upu’ allona tu to ussorongI.

²³Randukmi sikutana-tana kalena sola nasangi tinde anak gurunNa, kumua mindannari ia la umpogau’i susito?

²⁴Randuk dukami anak gurunNa siterrek kumua, mindannara sola nasangi tu disanganna madaoan?

²⁵Nakuami Yesu ungkuanni: Iatu mai datunna bangsana tau umparenta taunna sia iatu to ungkuasai naporai disa’bu’ to masokan.

²⁶Apa iatu kamu da misusi to, sangadinna iatu manakkana tu kamu sola nasang, melo ke pada bangi tu tang manakkana sia iatu mesuanna, melo ke pada bangi ma’parakana.

²⁷Belanna umbannara madaoan, iaraka tu unno’ko’na kumande, iaraka tu ma’parakana? Tang iaraku tu unno’ko’na kumande? Apa iate Aku te butungNa’ to ma’paraka.

²⁸Apa tontongkomi Kusisolan lan mintu’ kadipakario-rioangKu.

²⁹Iamoto angKu pa’tekkenanni lako kalemi tu Parenta susi Ambe’ku mangka umpa’tekkenanni lako Kaleku,

³⁰anta misa’ kao’koran sola ma’talimbungan kumande sia mangiru’ lan ParentaKu sia unnisungi isungan kapayungan umparessai tu sangpulo dua sukunna to Israel.

³¹Nakuami Puang: E Simon, Simon, lendu’ nakabarinna deata bulituk la unta’piikomi susi barra’,

³²apa mangkamoko Kupassambayangan, da napinda tu kapatonganammu, dadi iammu mangkamo mengkatoba’, pabatta’i tu penaanna mintu’ siulu’mu.

³³Nakuami Petrus lako: O Puang, inang kupatutumo tu penaangku, la ussisolangKomi moi tama pa’tarungkuan moi lako dipomatena.

³⁴Apa Nakua lako: E Petrus! Kukua mati’, ia bangsiamote bongi iate, tae’pa naunnoni manuk, ke tae’pi mupentallun meongan kumua, tae’ mutandaiNa’.

³⁵Nakuami Yesu lako: IatongKu suakomi tang umbaa poro’-poro’, kandu’ na lapik lentek, denraka apa kurang dio kalemi?

³⁶Nakuami: Tae’ bangra. Nakuami lako tinde tau sola nasangi: Apa totemo iatu to unnampui poro’-poro’ la naala, susi dukato tu kandu’, sia iatu to tang unnampui pa’dang, nabalukanni tu sambu’na napangallianni pa’dang misa’.

³⁷Belanna Kukua lako kalemi: Iapa te ianate tu disura’, tae’ nasalai tang disundunninna lako Kaleku, kumua: Dipasisangbilangan to kadake. Belanna mintu’na tu disura’ diona Aku, disundunnimo.

³⁸Nakuami tinde tau: O Puang, inde sia tu pa’dang da’dua. Nakuami Yesu lako: Da’imi to.

³⁹Sunmi Namale lako buntu Zaitun, susitu biasanna, nasangundian tu anak gurunNa urrundu’I.

⁴⁰Iatonna rampomo lako inan iato, Nakuami lako anak gurunNa: Massambayangkomi, da naruakomi peroso!

⁴¹Umpamambela-belami Kalena dio mai anak gurunNa agi-agi nalambi’ pa’piring Namane malinguntu’ Namassambayang,

⁴²Nakua: O Ambe’, iake morai siaKomi, palendu’iNa’ te irusan, apa iatu iannato tangia pa’poraiangKu, sangadinna pa’poraiamMi.

⁴³Payanmi lako Kalena tu malaeka’ misa’ dao mai suruga umpabatta’I.

⁴⁴Lanmo kamaparrisan kapua na samukkun-mukkunNa massambayang. Sia iatu ma’pu’Na, susito rara pantan to’do rokko padang.

⁴⁵Iatonna malimbangunmo tonna mangkamo massambayang, saemi lako anak gurunNa, Naappa’i mamma’ bangmo, belanna masussa penaanna.

⁴⁶Nakuami lako: Ma’apari mimamma’ bangra? Millikkomi ammi massambayang, da naruakomi peroso.

⁴⁷Marassan bangsiapa ma’kada-kada pakalan nasaemo sangtuntunan tau sola tu anak gurunNa misa’ disanga Yudas, dolo undoloanni tu tau, nasae umpentireke’i Yesu, la unnudungI.

⁴⁸Apa Nakua Yesu lako: E Yudas, iaraka la munii umpa’peturoan Anak rampan dilino tu pangudung?

⁴⁹Tonna tiromi to untalimbungi tu apa la dadi, nakuami: O Puang, la kiba’tamiraka pa’dang?

⁵⁰Denmi misa’i umba’tai tu kaunanna Tominaa Kapua, natantang tu talinga kananna.

⁵¹Apa mebali Yesu nakua: Da’imi to. Sia Nasapu tu talinganna tinde tau Napamondoi.

⁵²Nakuami Yesu lako mintu’ pangulu to minaa sia kapala Banua Kabusungan sia mintu’ pekaamberan tu sae urrukka’i: Susikomi to la urrukka’ pa’gora’ ammi sae ma’takin sia ma’tarasulu’?

⁵³Kiallo-kiallo misisolanNa’ lan Banua Kabusungan, tae’ra mipata’paiNa’ limammi, apa iamote tu allu’mi sia parenta kamalillinan!

⁵⁴Tonna mangkamo untingkanNi tu Yesu, malemi nasolan, nabaaI lako banuanna Tominaa Kapua, naundi tu Petrus unturu’ mambela bangi.

⁵⁵Iatonna dipadukkumo api lan tangnga-tangnga paladan, unno’ko’mi sola nasangi, anna iatu Petrus unno’ko’ duka lan alla’na.

⁵⁶Natiromi misa’ kaunan baine tonna unno’ko’ sikandappi’ api naarrangi api, napemaranga-rangai lako, namane kumua: Ia dukapa te tau iate tu Nasisolan!

⁵⁷Apa napeonganni, nakua: E baine, tae’ aku kutandai tu Tau iatu!

⁵⁸Sattu’-sattu’ to natiroomi misa’ to senga’, nakuami: Manassa ikopa tu solaNa! Apa nakua Petrus: Na iate tau te! Tae’ aku na aku!

⁵⁹Mangkato agi-agi sangkapuran pangan nakua pole’omi misa’ to senga’ ungkanassai: Manassa tongan ia dukapa te tau iate tu Nasisolan, belanna iate tau iate to Galilea duka!

⁶⁰Nakuami Petrus: Na iate tau te! tae’ aku kuissanni tu kadammu! Iatonna iato, marassan bangsia ma’kada-kada naunnonimo manuk.

⁶¹Messailemi Puang namentiro lako Petrus, nakilalaimi Petrus tu kadanNa Puang, tu Napokadanna lako, kumua: Tae’pa naunnoni manuk te bongi iate, ammu peonganniMo’ pentallun.

⁶²Sunmi tu Petrus naunnade-ade tumangi’.

⁶³Iatu mintu’ to ungkampai natelle-telle tu Yesu sia nakambei;

⁶⁴sia tonna mangkamo umbungku’I tu Yesu, nakutanaimi, nakua: Tandaikae mindara tu mangka ungkambeiKomi!

⁶⁵Budapa tu kada patelle napokada tinde tau lako.

⁶⁶Iatonna masiangmo ma’kombongammi tu mintu’ to matua-tua pa’tondokan sia pangulu to minaa sia pandita Sura’, nabaaI napopennolo tama pa’kombonganna,

⁶⁷nakuami tu tau: Iake Kamumo Mesias, pokadangkanni mai. Nakuami Yesu lako: La mipatonganrika, ke Kupokadangkomi

⁶⁸sia iake mekutanaNa’, la mipebaliirika?

⁶⁹Apa randuk te totemo, la unno’ko’ tu Anak rampan dilino dio kanan kuasanNa Puang Matua.

⁷⁰Nakuami tu tau sola nasang: Dadi Kamumoraka tu AnakNa Puang Matua? Nakuami lako: Susimo tu mipokadanna, Akumote.

⁷¹Nakuami tu tau: Apaopa gai’na tu sa’bi lako kaleta? Na kita kalenamo urrangii sun dio pudukNa.