Read Toraja-Sa'dan LUKAS 23 Bible Online

LUKAS 23 - Toraja-Sa'dan bible

LUKAS 23

¹Sangke’derammi tu tau, nabaaI tu Yesu lako olona Pilatus.

²Randukmi umparapa’I, nakua: Kilambiran te tau iate unnada’i sala solaki, Nagagai massima lako datu kapua, Nakua Ia kalena Ia Kristus sia datu.

³Nakutanaimi Pilatus nakua: Kamumoraka datu to Yahudi? Mebalimi Yesu lako, Nakua: Susimo tu mipokadanna.

⁴Mangkato nakuami Pilatus lako mintu’ pangulu to minaa sia lako to buda: Tae’ra kuappa’ tu la Naposalana te tau iate.

⁵Napamakarra’ pissanorami tu kadanna, nakua: Umpatigega’ to buda te tau iate, lao ullilingi tondok Yudea unnada’i tau tempon dio mai Galilea sae inde te mai.

⁶Iatonna rangimi Pilatus tu iannato napekutanammi kumua: to Galilearaka te tau iate;

⁷tonna kanassami kumua lan parentana Herodes nasuami umbaaI lako, belanna iatonna iato dio Yerusalem tu Herodes.

⁸Iatonna tiromi Herodes tu Yesu, lendu’mi parannunna penaanna, belanna masaimo la morai bang untiroI, belanna pembudamo narangi datu tu kadanna tau diona Yesu sia la morai untiroi misa’ tu tanda mangnga Napogau’.

⁹Ma’rupa-rupa tonganmi kada napekutanan datu, apa moi misa’ tae’ duka Napebalii Yesu.

¹⁰Bendan bangmi tu pangulu to minaa sia pandita Sura’ umparapa’ Yesu, lendu’ maparrangna.

¹¹Nalo’bo-lo’bomi Herodes sola mintu’ surodadunna tu Yesu sia natelle-telle, napakei sambu’ pandillak-dillak, nasuai umbaaI sule lako Pilatus.

¹²Iatonna iato sisangmuanemo tu Pilatus na Herodes, belanna sisarangnga’ pirambongi’.

¹³Narampunmi Pilatus tu mintu’ pangulu to minaa sia kapala sia to buda, nakuami, lako:

¹⁴Iate tau iate mibaa lako kaleku susito umpatipero’ senga’ to buda, na kuparessamo dio tingayomi natae’ bang kuappa’ tu la Naposalana, tu minii umparapa’I.

¹⁵Susi dukato tu Herodes, tae’, belanna nasua diomo mai sule, natae’ bang apa Napogau’ te tau iate tu sipatunna la dinii umpatei.

¹⁶Iamoto dadi la kubamba bangmo, kurampananNi.

¹⁷(Belanna tae’ nasalai tu Pilatus tang umpatassuranni misa’ tau tu to buda, ke allo kapua.)

¹⁸Rambanmi tu tau metamba takua bang to misa’ri, nakua: Tombonni lao tu tau iatu, iamo kami tu Barabas tassurangkan.

¹⁹Iatu Barabas dikurung lan pa’tarungkan, belanna mangkamo umpamaramba tau lan tondok sia umpatei tau.

²⁰Belanna la morai tu Pilatus urrampanan Yesu, ma’kada pole’omi lako tau.

²¹Apa metamba pole’o tu tau, nakua: A’ta’I Ia tu! A’ta’I Ia tu!

²²Ma’pentallunna ma’kadami Pilatus lako tu tau, nakua: Kakadakean apara Napogau’? Tae’ bang kuappa’ tu la Naposalana tu sipatunna la dinii umpatei. Iamoto dadi la kubamba bangmo, kurampananNi!

²³Apa tae’ napaka’tui metamba umpekapuai gamaranna, natuntunni bang tu Yesu la dia’ta’ na samasarrang-sarrangna bang tu petambana tau.

²⁴Namane urra’ta’i Pilatus, kumua la susimo tu natuntunna bang tau.

²⁵Natassurammi tu to ditarungku ma’pamaramba sia umpatei tau tu napalakunna, apa iatu Yesu nasorong sia naeloran tu tau umpogau’i lako tu pa’poraianna.

²⁶Iatonna malemo umbaaI tu Yesu, nala’ka’imi tu to Kirene misa’ disanga Simon lu dio mai pa’lak, napapassanni tu kayu pea’ta’, kumua anna undi umpassanni dio boko’Na Yesu.

²⁷Nabuda tongan tau undi urrundu’I sia den ba’tu pira-pira baine ussa’pa-sa’pa ara’na sia untangi’i.

²⁸Messailemi Yesu lako tinde tau, Nakua: E pia to Yerusalem, da mitangi’iNa’, sangadinna tangi’ikomi ria kalemi sia anakmi.

²⁹Belanna tae’ nasalai tang sae tu allo, tu la nanii tau ma’kada kumua: Maupa’ ia tu to tamanang sia iatu tau tang narubak anak sia iatu susu tang nasusu pia’-pia’.

³⁰Iato ke attu iato mane la randukri ma’kada tu tau lako mintu’ tanete susite: I’pinnikanni mai! sia lako mintu’ buntu: Samboikanni mai!

³¹Belanna iake susii penggauranna lako kayu mamata to, la ma’patumbaoi dadinna tu kayu marangke?

³²Nabaa dukami tau tu to senga’ da’dua, to kadake, la napasipatei Yesu.

³³Iatonna rampomo lako to’ inan disanga Kararo ulu, naa’ta’mi tu Yesu dio sia iatu to kadake da’dua, misa’ dio kananNa na misa’ dio kairinNa.

³⁴Massambayangmi Yesu, Nakua: O Ambe’, pagarri’i te mai tau, belanna tae’ naissanni tu apa napogau’. Nasire’tekkimi tu pakeanNa kumua ba’tu umbannai umpotaai.

³⁵Sangke’derammi tinde to buda untiroi. Ia duka tu mai kapala-kapala ussitelle-tellei, nakua: Narampanammo tu to senga’, Narampanan todai tu Kalena totemo, ke Iamo Kristus, To Natonno’ Puang Matua!

³⁶Sangsaean dukami tu surodadu untelle-telleI, napairu’I sukka anggoro’, nakua:

³⁷Iake datunnaKomi to Yahudi, lessuran kalenaKomi Kalemi!

³⁸Sia den duka tandana disura’ dao nakua: Iamote tu datunna to Yahudi.

³⁹Iatu to kadake ditoke’ den misa’ untelle-telleI, nakua: Tang KristusroKomika? Lessuran kalenamoKomi Kalemi Milessuran dukakan!

⁴⁰Apa mebali tu misa’ sia nata’tan, nakua: Tae’ bangraka iko mumataku’ lako Puang Matua, anna pada muperasaimo tu kamaparrisan?

⁴¹Ia kita tu kitanna sipatuki’, belanna natumangki’ penggauranta anta dipakario-rio, apa iate Tau iate moi misa’ duka tu penggauranNa tae’ sala.

⁴²Nakuami lako Yesu: O Puang, kilalaina’ dikka’, ke tamaKomi ParentaMi!

⁴³Nakuami Yesu lako: Nakua kadangKu mati’: Manassa ia bangsiamote allo iate, anta sisola lan inan kamanamanan.

⁴⁴Umbai agi-agi te’te’ sangpulo dua ma’tangnga allo, malillinmi tu mintu’ padang inde to dio sae lako te’te’ tallu makaroen,

⁴⁵belanna malillin tu allo sia iatu kulambu Banua Kabusungan tipa’dua.

⁴⁶Metambami tu Yesu umpemandui gamaranNa, nakua: O Ambe’, Kusorong lako Kalemi tu penaangKu. Iatonna mangkamo ma’kada susito, sinoemi penaa.

⁴⁷Iatonna tiromi tinde kamandang ungkapalai surodadu saratu’ tu apa mangka dadi, umpakarayami Puang Matua, nakua: Manassa Iamo misa’ To ma’bulo sanglampa te!

⁴⁸Mintu’na to sae sirampun umpengkitai, tonna tiromi tu apa mangka dadi, pantan sulemi ussa’pa-sa’pa ara’na.

⁴⁹Iatu mintu’na to Nasitandan sia iatu baine undi unturu’I dio mai Galilea bendan mambela-bela bang untiroi tu iannato.

⁵⁰Denmi misa’ tau disanga Yusuf, to diala ada’,

⁵¹iamo misa’ to melo penaanna sia malolo — iato tau iato tae’ naturu’i tu pa’tangngaranna sia penggauranna tau; — iato tau iato, to dio mai Arimatea, misa’ tondok to Yahudi, sia ia dukamo umpeagi bang parentaNa Puang Matua.

⁵²Malemi to tau iato mennolo lako Pilatus, napalakui tu batang rabukNa Yesu.

⁵³Iatonna alaimi dao mai, nabalunmi sampin kasa me’lok, napatamai liang, tae’ bangpa tau dipeliang tama.

⁵⁴Iamoto allo iato dinii ma’pasakka’ sia mandappi’mo tu allo katorroan.

⁵⁵Iatu mintu’na baine, tu Nasolanna sae dio mai Galilea, sangundian urrundu’i sia untiroi tu liang, sia kumua ba’tumba dikua umpatamai tu batang rabukNa.

⁵⁶Iatonna sulemo tinde tau, napassakka’mi tu pebangki’ sia iatu dipa’busarungngusanna. Iatonna allo katorroan natorroimi, unturu’ atoran Sukaran aluk.