Read Toraja-Sa'dan LUKAS 24 Bible Online

LUKAS 24 - Toraja-Sa'dan bible

LUKAS 24

¹Apa iatonna tibaan masiang, tonna allo bunga’na lan minggu iato, tae’pa bongi, nasaemo tinde tau lako to’ liang umbaai tu pebangki’ tu mangka napasakka’.

²Nakarampoimi tu batu mangkamo dilentenni dio mai to’ liangNa,

³sia iatonna malemo tama, tae’mo naappa’ tu batang rabukNa Puang Yesu.

⁴Iatonna bangngo bangmo ara’na tinde tau tu diona to, denmi tau da’dua bendan nasikandappiran, ma’pakean pandillak-dillak.

⁵Tonna mataku’ tonganmo tinde tau natukku rokko padang, nakuami tinde tau lako: Ma’apai midaka’I tu To tuo dio to’ to mate?

⁶Tae’ Ia Naindete, sangadinna malimbangunmo dio mai to’ to mate. Pengkilalai umbara nakua kadanNa lako kalemi tonna diopa Galilea,

⁷kumua: Tae’ nasalai tang disorong lako to kasalan tu Anak rampan dilino anna a’ta’I naallo ma’pentallun Namalimbangun sule.

⁸Pakalan nakilalaimi tinde tau tu kadanNa;

⁹sia iatonna sulemo dio mai to’ liang, napokadami tu mintu’na to lako tu sangpulo misa anak gurunNa sia lako duka mintu’ to senga’.

¹⁰Iamotu Maria Magdalena na Yohana na Maria indo’na Yakobus; ia duka tu baine senga’, tu nasolanna, umpa’peissananni lako mintu’ rasulu’ te ianna te.

¹¹Nasangami mintu’ rasulu’ tu kadanna kada pa’patia’bak punala bang, dadi tae’mi napatonganni.

¹²Apa iatu Petrus ke’de’ namale sasa-sasa lako to’ liang; iatonna messurruk mentiro tama, natiromi pebalunNa mannamo lan, malemi sule, namangngai tongan tu apa mangka dadi.

¹³Sirupang dukato allo iato denni da’duai male lako misa’ tondok disanga Emaus, agi-agi kalingkan duang diang sangtangnga mambelanna dio mai Yerusalem.

¹⁴Sipa’kada-kadami sola duai umpokadai tu diona tu mintu’na apa mangka dadi.

¹⁵Iatonna marassanmo sipa’kada-kada sia sikutana-tana, pakalan Nasae kaleNamo tu Yesu urreke’i, Namale sola,

¹⁶apa takua to ditampun tu matanna tinde tau sola duai, natae’ pole’ natandai.

¹⁷Nakuami Yesu lako: Apara kamu tu miulelean lolanan? Tadangmi tinde tau, lendu’ masussanna Natiro Yesu lako.

¹⁸Namebali tu misa’ disanga Kleopas, nakua: To saeroKomika Kamu duka dio Yerusalem, na Kamu manna Kamu tang unnissanni tu apa mangka dadi dio te totemo?

¹⁹Nakuami lako: Apamo ia? Mebalimi nakua: Napa tu apa dadi lako Yesu to Nazaret, misa’ nabi matoto’Na Puang Matua nala diona penggauranNa, nala diona kada dio oloNa Puang Matua sia dio tingayona mintu’ tau;

²⁰ba’tumba nakua pangulu to minaa sia kapalaki umpa’peturoanNi, anna dira’ta’ kumua la dipatei, anna a’ta’I!

²¹Kiparannuan bangmo kami, kumua Iamo la ulla’bak to Israel, — apa moi susito, totemo ma’tallung allomo mangkanna dadi tu mintu’nato.

²²Apa napatirambanokanni ba’tu pira-pira baine solaki, tu sae dio to’liangNa ina’ makale’;

²³na iatonna tae’ naappa’i tu batang rabukNa, saemi nakua: untiro pole’omo malaeka’ payan lako kalena umpokadai, kumua tuomo.

²⁴Malemi tu solaki pira lako to’ liangNa, nakabu’tui tonganna susitu kadanNa tinde baine, apa iatu Yesu tae’ natiroI.

²⁵Nakuami Yesu lako: E to baga sia to banda’ inaa umpatonganni tu mintu’na apa mangka napokada nabi!

²⁶Tang sipaturaka Mesias umperasai tu iannato, Namane tama kamala’biranNa?

²⁷Naparanduk diomi mai Musa sia mintu’ nabi Nabattuananni lako tu dipokadanna lan mintu’na sura’ diona Ia.

²⁸Mareke’mi tinde tau lako tu tondok napatu, Naangga’-angga’i bangmi Yesu susito la tarru’ bang male.

²⁹Apa nana’ran-na’ran tinde tau sola duai, nakua: Tatorromo sola, belanna la bongimo, lambunmo allo. Malemi tama tu Yesu la torro dio sola.

³⁰Pakalan iatonna unno’ko’mo kumande sola tinde tau sola duai, Naalami tu roti, Napalakuanni kamatotoran, Natepu-tepui, Natadoanni.

³¹Pakalan namaseromo tu matanna tinde tau sola duai, natandai tu Yesu; pa’de bangsiami natiro lako.

³²Sipa’kada-kadami, nakua: Tang mamali’raka penaanta, tonNa pa’kadaiki’ dio lu lalan sia tonna pokadan nasangki’ tu lanna mai Sura’ Madatu?

³³Ke’de’ bangsiami tonna attu iato, namale sule lako Yerusalem, nakarampoi tu sangpulo misa anak gurunNa sirampun sola tu to nasolan nenne’;

³⁴nakuami sola nasangi: Tongannamo malimbangunmo tu Puang sule sia umpa’pekitanammo Kalena lako Simon.

³⁵Naulelean dukami tinde tau da’dua tu mangkanna dadi dio lalan sia umba nakua katandanna Yesu lako kalena, tonna untepu-tepu roti.

³⁶Marassanmo tinde tau umpokada-kadai tu iannato, pakalan Nasaemo tu Yesu bendan lan tangnga-tangngana sia Nakua lako: Siriakomi kamarampasan.

³⁷Tirambanmi sia lendu’ mataku’na, belanna nasanga bombo tu natiro.

³⁸Nakuami Yesu lako: Ma’apari mibata-batara sia sala tangnga’?

³⁹Tiromi tu limangKu sia lentekKu, manassa Aku bangsiamote! Sapumi tu Kaleku, sia tiromi, pa tae’ ia nakeduku’ tu bombo sia kebuku, tae’ nasusi te Aku mitiro mai.

⁴⁰Iatonna ma’kada susito, Napakitammi tu limanNa sia lentekNa.

⁴¹Apa tae’pa napatonganni, belanna parannu penaanna tinde tau sia mangnga, Nakuami Yesu lako: Denraka kandemi indete?

⁴²Nabenmi tau bale digoreng sangti’- pek.

⁴³Naalami Nakandei dio tingayona tinde tau sola nasang.

⁴⁴Nakuami lako tinde tau: Iamote tu kada KupokadangKomi tonta sisolapa, kumua tae’ nasalai tang disundunninna te mintu’nate, tu disura’na lan sura’ Sukaran alukna Musa sia lan sura’na mintu’ nabi sia lan sura’ nanian pa’pudian diona Aku.

⁴⁵Tonna iato Napatibungka’mi tu penaanna tinde tau, kumua anna issanni tu Sura’ Madatu.

⁴⁶Sia Nakua lako: susite tu disura’na, kumua la umperasai kamaparrisan tu Mesias, anna allo ma’pentallun Namalimbangun sule dio mai to’ to mate,

⁴⁷nadipalele sola sanganNa tu kamengkatobaran umpasae kadipa’deian kasalan lako mintu’ issinna lino nasambo langi’ narande tana, randuk dio mai Yerusalem.

⁴⁸Na iate mintu’na te kamumo la sa’binna.

⁴⁹Manassa tae’ nasalai tang Kuparampo lako kalemi tu pangallu’Na Ambe’Ku, na kamu ma’peagi-agi bangmokomi lan te kota sae lako dipaselle’imi tu kamatotoran dao mai madona.

⁵⁰Nasolammi lako salianna tondok sae lako Betania, Naangka’i tu limanNa, Nabura’i lindo masakke.

⁵¹Marassan bangsiapa umbura’i lindo masakke, nasisarakmo tinde tau, Nadiangka’ langngan suruga.

⁵²Sulemi tinde tau lako Yerusalem lendu’ parannunna penaanna.

⁵³Tontong bangmi lan Banua Kabusungan umpudi-pudi Puang Matua.