Read Toraja-Sa'dan LUKAS 4 Bible Online

LUKAS 4 - Toraja-Sa'dan bible

LUKAS 4

¹Naponnoi Penaa Masallo’ tu Yesu sule dio mai salu Yordan, Nabaal Penaa lako padang pangallaran.

²Narosomi deata bulituk patangpulo allona. Iato lan mintu’na allo iato tae’ bang apa Nakande. Iatonna lendu’mo tu allo iato mane tangdia’ri.

³Nakuami deata bulituk lako: Iake AnakNaKomi Puang Matua, suai te batu mendadi roti.

⁴Mebali Yesu lako Nakua: Lan Sura’Na Puang Matua nakua: Iatu tau tae’ na kande manna napotuo.

⁵Nasolammi deata bulituk langngan madona, napatiroanni lako tu mintu’ parenta lan te lino, sattu’.

⁶Nakuami deata bulituk lako: Iate mintu’ parenta iate sola mintu’ kamala’biranna la kuben nasangKomi, belanna mangkamo disorong lako kaleku, dadi ma’din kuben minda-minda kuporai.

⁷Iamoto, iake Mipenombaina’, manassa Kamu nasangmo puangna.

⁸Mebali Yesu lako Nakua: Lan Sura’Na Puang Matua nakua: La menombako lako Puang Kapenombammu sia Ia mammo mupekapuangi.

⁹Nasolammi deata bulituk tu Yesu lako Yerusalem, napabendanNi dao bubungan Banua Kabusungan, namane kumua lako: Iake AnakNaKomi Puang Matua, tobangangKomi Kalemi indete rokko,

¹⁰belanna lan Sura’Na Puang Matua nakua: La Nasuangko tu malaeka’Na nakarimmanniko;

¹¹sia natimangko da natitampa’ lentekmu lako batu.

¹²Mebalimi Yesu lako Nakua: Den lan Sura’Na Puang Matua nakua: Da mutoba Puang Kapenombammu.

¹³Iatonna mangkamo ussundunni deata bulituk tu mintu’ pangrosona, soro’mi dio mai tingayoNa Yesu ba’tu sangapa-apa.

¹⁴Napasulemi kamatotoranNa Penaa Masallo’ tu Yesu lako Galilea; lelemi karebanNa dio mintu’ lili’na tondok iato.

¹⁵Mangada’imi lan banua pa’kombonganna tau, pada napudi-pudimi tu Yesu.

¹⁶Rampomi tu Yesu lako Nazaret, tu Nanii lobo’; iatonna allo katorroammo malemi tama banua pa’kombongan, susitu biasanNa, Nake’de’ la umbasa sura’.

¹⁷Nabenmi tau lako tu sura’na nabi Yesaya, Nabungka’mi, Naappa’mi tu dininna ussura’i lan:

¹⁸Den Penaa Masallo’Na Puang Matua lan Kaleku, Belanna mangkaMo’ Nabolloi minna’ la umpa’pangadaran Kareba melo lako to kalala’;

¹⁹sia NasuaNa’, la umpa’peissanan kadirampanan lako to dipali’, sia pakita lako to buta, la ullussuran to dirampa, la umpa’peissanan taun la Nanii Puang Matua umpabu’tu kamarampasanNa.

²⁰Iatonna lulunmi tu sura’, Napasulemi lako to ungkampai banua pa’kombongan, Namane unno’ko’; mintu’na mata lan banua pa’kombongan iato mentiro nasang lako Yesu.

²¹Naparandukmi ma’kada lako tau, Nakua: Iate allo iate malambi’mo allu’na te kada iate lan mai Sura’ rampo tama talingammi.

²²Natonganan nasangmi tau tu kadanNa sia napomangnga tu kada sun dio pudukNa umpabu’tu kapaimanan, nakuami tu tau: tang anaknaraka Yusuf te?

²³Nakuami Yesu lako: Inang la mikua ungkuanNa’ te ponto bannang iate: E! to ma’dampi, pamalekei dolo tu Kalemi; iatu kiranginna dadimo dio Kapernaum, pogau’ dukami susito indete tondokMi.

²⁴Nakuami Yesu: Apa tonganna tongan Kukua mati’: Tae’ misa’ nabi diporai lan tondokna.

²⁵Apa Kukua tongan lako kalemi, kumua: Iatonna Elia, tonna titutu’ langi’ tallung taun annan bulanna, anna ra’pak padang lan mintu’ tondok; iatonna iato buda baine balu dio tondok Israel.

²⁶Apa moi misa’ tu baine balu iato tae’ bangra dinii ussua Elia, sangadi lako Sarfat, misa’ tondok lan parenta Sidon, lako misa’ baine balu.

²⁷Ia duka tonna nabi Elisa buda to Israel golenan natae’ bangra misa’ dipamaleke sangadinna Naaman to Siria.

²⁸Iatonna rangimi mintu’ to lan banua pa’kombongan tu kada susito, ponno nasangmi kasengkean diong tambukna.

²⁹Pakalan nasangke’deran nasualei sun lan mai tondokna tu Yesu, nasurrunni lako kadakean dao tanete, tu dinii umbangun tondokna, la morai umpembuanganNi dao mai.

³⁰Apa Naruang tangnga bang tu tau Namale.

³¹Solo’mi rokko Kapernaum, tondok dio Galilea, naada’i tu tau dio lu, ke allo katorroan.

³²Napotiramban nasangmi penaanna tau tu pangadaranNa, belanna matoto’ tongan tu kadanNa.

³³Denmi lan banua pa’kombongan misa’ tau nataba deata masussuk, melalla-lalla nakua:

³⁴Popa’elo’nakan kami, la siapariki’ e Yesu, to Nazaret! SaeroKomika la ussanggangkan? Kuissan sia kumua mindaraKomi, iamora To masallo’ lu dio mai Puang Matua.

³⁵Nasarabaimi Yesu, Nakua: ma’loko-lokoko, pallaiko dio mai kalena. Nasongkammi deata masussuk tinde tau lan tangnga-tangngana tau, namane sun lan mai, tae’ bangra napatumba-tumbai.

³⁶Mangnga-mangnga nasangmi tu tau, anna sipa’kada-kada, nakua: Kada apa maro’ ia te? Anna kuasa Ia sia matoto’ umparentai tu deata masussuk namallai!

³⁷Tirandami tu karebanNa lako mintu’ lili’na tondok iato.

³⁸Ke’de’mi tu Yesu Nasun lan mai banua pa’kombongan, Namale tama banuanna Simon. Iatu matusanna baine Simon nasanta’ lalla’. Napeta’dan tulungmi tau lako Yesu.

³⁹Bendanmi tu Yesu dio to’ ulunna, Nagagai tu lalla’na namallai lan mai kalena tu lalla’ nata’pa millik, naparakanni kande.

⁴⁰Iatonna lambunmo allo, nabaami tau lako Yesu tu mintu’ to masakinna, ma’rupa-rupa tu sakinna, Naremme’ simisa’mi limanNa, Napamalekei.

⁴¹Buda tau nanii sun deata masussuk melalla-lalla lan mai kalena, nakua: Kamumo tu AnakNa Puang Matua. Nata’tanmi, tang Natangga’ ma’kada, belanna natandaimo, kumua inang iamotu Mesias.

⁴²Iatonna masiangmo, sunmi tu Yesu male lako to’ kasalanna, nadaka’mi to buda namale umpellambi’i, la morai umpatorroI tu Yesu, kumua da Natampei.

⁴³Apa nakua Yesu lako: Tae’ nama’din tang Kupa’peissanan duka tu Kareba melo, diona ParentaNa Puang Matua lako tondok senga’, iari patunna to angKu disua.

⁴⁴Mangada’imi lan banua pa’kombongan dio lu tondok Yudea.