Read Toraja-Sa'dan LUKAS 5 Bible Online

LUKAS 5 - Toraja-Sa'dan bible

LUKAS 5

¹Den pissan nasisuang-suang tu tau lako Yesu, la umperangii kadanNa Puang Matua, tonna bendan dio randan tasik Genesaret.

²Natiromi tu lembang da’dua dio to’ randan tasik apa sunmo tu to ma’dalla’ lan mai, marassanmo umbasei dalla’na.

³Malemi tu Yesu tama tinde lembang misa’, tu lembangna Simon, Napopeturrunni sidi’ dio mai to’ karangkeanna, Namane unno’ko’ tu Yesu Naada’i tu to buda dao mai lembang.

⁴Iatonna upu’mo mangada’i, Nakuami lako Simon: Tokonni te lembang tama malikunna, ammi ma’dalla’ miala bale.

⁵Nakuami Simon mebali: O Puang, sangmai’ situ’turangkan bongi mara’ takkanni, tae’ bang kiala misa’, apa belanna Kamu kumua, dadi la kiparokko bang tu dalla’.

⁶Iatonna buangmi, naluangmi tu bale lendu’ budanna, sidi’mora naserek tu dalla’na.

⁷Naka’bi’-ka’bi’ bangmi tu solana tu lanna lembang misa’ rampe lakona to’ karangkeanna, kumua anna sae untundui; saemi naponnoi tu lembang da’dua sidi’mora natallan.

⁸Iatonna tiromi Simon Petrus tu iannato, lumbangmi rokko to’ guntu’Na Yesu, nakua: O Puang, toyang-toyangKomi dio mai kaleku, belanna aku te to kasalanna’!

⁹Belanna tiramban tu penaanna sola mintu’ to nasolan, tu diona kaunnalanna bale pada to;

¹⁰susi dukato tu anakna Zebedeus sola duai Yakobus na Yohanes nasiban Simon. Nakuami Yesu lako Simon: Da mumataku’, belanna randuk te totemo mudadi pa’dalla’ tau.

¹¹Iatonna patu’tunmi tu lembangna lako to’ karangkeanna, natampe nasangmi namale urrundu’ Yesu.

¹²Tonna lan misa’ tondok, denmi misa’ tau dio nasanta’ golen. Iatonna tiromi tu Yesu lumbangmi rokko padang namengkamase-mase lako, nakua: O Puang! iake Miporai manassa kuasaKomi umpamalekena’!

¹³Nasoronganni Yesu lako tu limanNa, Nakaka’i, Nakua: Kuporai la malekemoko! Ta’pa mondo bangsiami tu golenna.

¹⁴Ma’pakare’nami Yesu lako, Nakua: Da mupokada lenni moi lako misa’ duka tau, sangadinna maleko umpa’pekitanan kalemu lako tominaa sia pemalaranni tu pemala’ belanna kamalekeammu susitu napa’peannan Musa, tu la mendadi tanda lako tu tau.

¹⁵Apa satiseno-senona loo tu karebanNa, sia tae’ ka’tunna tu tau ponno sae umperangii sia kumua anNa pamalekei.

¹⁶Apa merrabunan tu Yesu male lako to’ kasalanna Namassambayang dio.

¹⁷Dikua den sangallo mukkunmo mangada’i, naden ba’tu pira to Farisi unno’ko’ dio sia pandita Sukaran aluk, tu pantan sae dio mai mintu’ tondok Galilea sia Yudea, sia dio mai Yerusalem, sia kamatotoranNa Puang Matua dio ren, anNa matoto’ Yesu umpamalekei tu tau.

¹⁸Denmi tau umbaa misa’ to kupi’, mamma’ diong ampa’na, undaka’mi lalan la morai umbaai tama, la napatorro dio tingayoNa Yesu.

¹⁹Apa belanna tae’ nabelai urreke’ Yesu tu belanna to buda, kendekmi langngan bubungan nabungka’i narorro’i sola ampa’na rokko tangnga-tangngana tau dio tingayoNa Yesu.

²⁰Iatonna tiromi tu kapatongananna tinde tau, Nakuami lako: E tau! dipa’deimo tu kasalammu.

²¹Mintu’na pandita Sura’ sia to Farisi naparandukmo ma’tangnga’-tangnga’ sia ma’kada kumua: To apara Ia te ma’kada solang bang? Minda pole’ tu la umpa’dei kasalan, sangadinna Puang Matua?

²²Iatonna issanmi Yesu tu pa’tangngaranna tinde tau sola nasang, Nakuami: Apara mitangnga’-tangnga’ lan penaammi?

²³Umbannara maraa, dikuaraka: Dipa’dei’mo tu kasalammu, ba’tu dikuaraka: Millikmoko muma’lingka?

²⁴Apa dikua ammi issanni, kumua kuasa tu Anak rampan dilino umpa’dei kasalan lan lino, Nakuami lako tu to kupi’: Kukua ungkuangko: Millikko alai tu ampa’mu, musule lako banuammu!

²⁵Ta’pa millik bangsiami dio tingayona mintu’ tau naalai tu ampa’na, tu nanii mamma’ diong, nasule lako banuanna, sia umpudi-pudi sanganNa Puang Matua.

²⁶Tiramban nasangmi penaanna tu tau iato mai sia umpakaraya Puang Matua sia nakabu’ kamatakuran, nakua: Iate allo iate tatiromo tu penggauran kalle-kallean.

²⁷Undinna sunmi tu Yesu, Natiromi tu passima misa’ disanga Lewi unno’ko’ dio to’ passiman, Nakuami lako: Undiko urrundu’Na’.

²⁸Natampe nasangmi tu pengkaranganna, nake’de’ male urrundu’ Yesu.

²⁹Natoratumi Lewi tu Yesu umpogau’ pa’maruasan kapua lan banuanna; buda passima sirampun dio sia tau senga’ kumande ma’talimbungan sola.

³⁰Iatu to Farisi sia pandita Sura’ situmberu’-beru’, nakua lako anak gurunNa: Ma’apari ammi kumandera sia mangiru’ sola passima sia to kadake gau’na?

³¹Mebalimi Yesu, Nakua: Tae’ naanga’i to maleke tu to ma’dampi, sangadinna to masakiri.

³²Tae’ra Kusae la untambai to malambu’, sangadinna to kasalan, denoupa’ namengkatoba’.

³³Nakuami tu tau lako: Anak gurunna ia Yohanes pembuda ma’puasa sia tae’ nasalai tu kapassambayangan, susi dukato tu mintu’ anak gurunna to Farisi, anna anak gurumMi kamu kumandeora sia mangiru’.

³⁴Nakuami Yesu lako tau iato: Ma’apai mila ussuai tu to pasolan la ma’puasa, ke sisolapi to diparampo?

³⁵Apa la sae tu allona, to ke dialami dio mai kalena tu to diparampo, iamo pole’ to namane ma’puasa.

³⁶Napokadan duka misa’ pa’pasusian lako tu tau, Nakua: Tae’ ia tau misa’ la usserekki sangserek dio mai sambu’ ba’ru napa’tampiranni sambu’ malusa, apa iake napasusi tau to, naserek pissanmi panampi’ ba’ru tu sambu’ malusa sia iatu panampi’ ba’ru tang sitama sambu’ malusa.

³⁷Sia moi misa’ tau tae’ duka umpatama uai anggoro’ ba’ru tama kiriba’ malusa, apa iake napasusi tau to, inang la napopema’tu anggoro’ ba’ru tu kiriba’ natibollo sia sanggang tu kiriba’;

³⁸sangadinna iatu anggoro’ ba’ru sipatu dipatama kiriba’ ba’ru.

³⁹Moi misa’ tau tae’ duka, ke mangkai unniru’ anggoro’ masai, nala ungkamoraiopa ba’runna, belanna nakua: Melo ia tu masainna.