Read Toraja-Sa'dan LUKAS 8 Bible Online

LUKAS 8 - Toraja-Sa'dan bible

LUKAS 8

¹Undinnao to malemi tu Yesu ma’lele-lele lan lu mintu’ tondok kapua sia tondok bitti’, mangada’i sia umpalele Kareba-kaparannuan tu diona ParentaNa Puang Matua; na iatu anak gurunNa sangpulo dua male duka sola.

²Sia ba’tu pira-pira baine, tu malekenamo dio mai kanatabanna deata masussuk sia ma’rupa-rupa sakinna, iamotu Maria disanga Magdalena, pitumo deata masussuk soro’ dio mai kalena, sia

³Yohana, bainena Khuza, to manappa’ lan banuanna datu Herodes sia Susana sia budapa tau senga’, tu ungkaritutui umbenni apa-apanna.

⁴Iatonna buda tau sirampun to pantan sae umpengkaa’i dio mai mintu’ kota, ma’kadami Yesu umpokada misa’ pa’pasusian, Nakua:

⁵Den misa’ to mangambo’ sun la male unnambo’ bannena; marassanmo mangambo’, denmi pira ta’pa rokko biring lalan, nasilessakki tau sia pura nakande manuk-manuk;

⁶sia den pira ta’pa rokko to’ batu, natuo, apa malayu, belanna tae’ namasakka’.

⁷Den duka pira ta’pa tama tangnga to’ duri; napada tuo duri, nataloi tu banne.

⁸Sia den pira tu ta’pa rokko to’ padang lunak; iatu iannato tuo melo namembua manglokkon pessaratu’. Iatonna pokadai te, metambami tu Yesu nakua: Minda-minda tu ketalinga la ma’perangi, nama’perangi!

⁹Napekutanammi anak gurunNa: Apara battuananna tu pa’pasusian iato?

¹⁰Nakuami Yesu: Iatu kamu dibenkomi pa’kamasean, unnissanni tu rasia diona ParentaNa Puang Matua, apa iatu tau senga’ diben pa’pasusian, anna tang paan, ke natiroi sia tae’ naissanni, ke narangii.

¹¹Na iatu pa’pasusian inde sia tu battuananna: Iatu banne iamo kadanNa Puang Matua.

¹²Na iatu diona biring lalan, iamoto umperangii, apa undinna saemi deata bulituk unnalai lan mai penaanna tu kada, kumua, natang umpatonganni sia tae’ nakabu’tui kasalamaran.

¹³Na iatu diona to’ batu, iamotu tau untarimai, ke narangii sia parannu len penaanna; apa tae’ namennuaka’ lan penaanna, sangadi napatongan sangattu’ bangri, ianna rampoi peroso, tikkondo’mi penaanna.

¹⁴Na iatu rondonna tama to’ tangnga duri, iamotu tau umperangii na samasai-sainna sanatalo-taloinna kamasarasan na kasugiran na kaparannuan lan te lino, dadi tae’ namembua tongan.

¹⁵Na iatu lu rokkona padang lunak, iamotu tau, ianna rangimi tu kada, napalanmi penaa matoto’na sia penaa malolona sia napatontong namembua melo.

¹⁶Moi misa’ tau tae’ duka, ke untutungi dama’ anna la ussarongi apa-apa, ba’tu la napadiongi sulluk kamammaran, sangadinna dipadao tongkonanna, anna tiroi tau tu dukkunna, ke tamai.

¹⁷Belanna moi misa’ duka tae’ tu membuninna tang la dipasombo, sia moi misa’ duka tae’ tu rasia, tang la kaissanan sia paan.

¹⁸Iamoto kanandai tonganni, umbara susi parangimmi; belanna minda-minda tu den dio, la diben dukapa lako, na minda-minda tu tae’ dio, la diala dukapa dio mai tu nasanganna la den dio.

¹⁹Saemi tu indo’Na sia siulu’Na Yesu umpellambi’i, apa tae’ nanii urreke’i, belanna buda tau.

²⁰Napokadammi tau, nakua: Indo’Mi sia siulu’Mi ke’de’ bangmo dio salian, la morai ussitiroangKomi.

²¹Apa Nakua mebali: Iari indo’Ku sia siulu’Ku, tu umperanginna kadanNa Puang Matua naturu’i.

²²Den sangallo Nakendek tu Yesu langngan lembang sola anak gurunNa, Nakuami lako: Melo ke ma’lembangki’ lako diona lu te tasik; ke’de’mi.

²³Iatonna ma’lembang, nabokomi mamma’na tu Yesu. Saemi bara’ lan tu tasik, ponnomi uai lan tu lembang, sidi’mora namalabu.

²⁴Saemi tinde anak gurunNa umpellambi’i, natundanNi, nakua: O Guru! o Guru! sabu’kanni! Iatonna tundanmi, ta’pa Nata’tanmi tu angin sia bombang kapua, pakalan naradanmo sia rapa’.

²⁵Nakuami lako: Umbara nanii tu kapatonganammi? Mangngami tinde tau sia mataku’ nakuami sipa’kada-kada: Mindaraka Ia te, anNa ussua angin sia uai, naturu’ tonganNi.

²⁶Rampomi lako biring tasik lako tondok to Gerasa, sibala tasik tondok Galilea.

²⁷Iatonna kendekmo langngan karangkeanna, saemi napessitammui misa’ tau dio mai tondok iato to nataba deata masussuk, masaimo tae’ nama’tamangkale natae’ bangmo natorro lan banua, sangadinna dio bang lu to’liang.

²⁸Iatonna tiromi tu Yesu, melallak-lallakmi nasongka dio tingayoNa sia bassa’ bang metamba-tamba, nakua: La siapariki’ e Yesu, AnakNa Puang Patodoranna? Kupalaku lako Kalemi da Mipakario-riona’.

²⁹Tu belanna Nasuamo Yesu tu deata masussuk soro’ dio mai kalena tinde tau, apa masaimo tu deata iato untamai; narantemo sia napungo tau tu lentekna, la napatorro, apa naka’tu-ka’tu tu pungona, napallaianni deata masussuk lako padang pangallaran.

³⁰Nakutanaimi Yesu Nakua: Minda sangammu? Nakua: Legiun, belanna buda tonganmo deata untamai.

³¹Napalakumi tinde deata sola nasangi kumua, da Nasuai lako to’ inan kamalillinan.

³²Denmi sangtuntunan bai dio undaka’ kandena dao tanete. Napalakumi deata, kumua, Naeloranni untamai tu bai. Napopa’elo’nami.

³³Sangsunammi lan mai kalena tinde tau, nalu tama bai; sipettu’mu’-tu’mu rammi tinde bai dao mai aya’ mi’lan rokko tasik, namate malammu’.

³⁴Iatonna tiromi to mangkabi’na tu apa mangka dadi, sipa’dondo-dondoammi male umpokadai tama kota sia dio lu kampong.

³⁵Sangsunammi tu tau, la lao untiroi tu apa mangka dadi, nasae lako Yesu, nakabu’tui tu tau mangka nanii sun deata lan mai kalena unno’ko’ diong to’ letteNa Yesu ma’tamangkalemo sia mengkilalamo; saemi kamatakuranna tu tau sola nasang.

³⁶Sia iatu mintu’ to mangka untiroi unnuleleanni lako tau tu kadirampananna tinde to nataba deata.

³⁷Napalaku nasangmi tau dio tondok Gerasa lako Yesu, kumua, anNa toyang-toyang dio mai kalena, belanna budamo kamatakuranna sola nasang. Malemi tu Yesu rokko lembang, Namale sule.

³⁸Iate to nanii soro’ deata lan mai kalena, napalaku lako Yesu, kumua, anna torro sola, apa Nasua Yesu male, Nakua:

³⁹Sulemoko lako banuammu, pokadanni tau tu penggauran kapua mangka napogau’ Puang Matua lako kalemu. Malemi tinde tau umpokadanni mintu’na tau lan tondok iato tu diona penggauran kapua Napogau’ Yesu lako.

⁴⁰Iatonna sulemo tu Yesu natammuimi to buda, belanna inang nakampai bangmo sola nasangi.

⁴¹Saemi misa’ tau disanga Yairus, iamo kapala banua pa’kombongan, tukku malinguntu’ rokko to’ lentekNa Yesu sia napalaku lako, kumua anNa sae dio to’ banuanna,

⁴²belanna den anakna baine, anak misa, agi-agi sangpulo duamo taunna dadinna, la mate mannamo. Iatonna male tu Yesu buda tau ussisi’pinNi.

⁴³Denmi misa’ baine masaki, nakasunni nenne’ bang rara, sangpulo duamo taunna sia puramo tu apa-apanna napamalean to ma’dampi, apa moi misa’ tae’ duka umpapa’dei.

⁴⁴Saemi dio boko’Na Yesu nakaka’i tu rombe-rombe sambu’Na, nata’pa radan tu rarana.

⁴⁵Nakuami Yesu: Minda ungkaka’Na’? Iatonna meongan nasangmo nakuami Petrus: O Guru, to buda bangsia ungkasaKomi.

⁴⁶Nakuami Yesu: Den tau ungkaka’Na’, belanna Kusa’dingmo den tu kamatotoran sun lan mai Kaleku.

⁴⁷Iatonna tiromi tinde baine, kumua tang naissanmo la umbunii, saemi ma’parondo-rondo, malinguntu’ dio tingayoNa, naakui lako dio tingayona to buda tu battuanna nanii ungkaka’I anna ta’pa umpomalekei.

⁴⁸Nakuami Yesu lako tinde baine: Manassa kapatonganammumo umpatuoko, sule marampa’moko.

⁴⁹Iatonna marassan ma’kada susito, saemi misa’ tau dio mai banuanna kapala banua pa’kombongan, umpokadai kumua: Matemo tu anakmi, damo mira’ta’i tu Guru.

⁵⁰Apa Naranginna sia Yesu to kada iato, Nabalinna sia, Nakua: Da mimataku’ patongan bangmi, la matumbaori ia!

⁵¹Iatonna tamamo banua tu Yesu, moi misa’ tau tae’ duka Natangga’i tama sola sangadinna Petrus na Yakobus na Yohanes na ambe’namo tinde pia sola indo’na.

⁵²Tumangi’ nasangmi tu tau umbatingi. Apa Nakua Yesu: Marangakomi! tae’ ia namate, sangadinna mamma’ri.

⁵³Napetaaimi tau, belanna naissan, kumua matemo tu pia.

⁵⁴Apa Natoemi tu limanna tinde pia, namane untambai Nakua: E, lai’! millikko!

⁵⁵Sulemi tama tu sumanga’na, anna ta’pa millik; Nasuami umbenni kande lako.

⁵⁶Tibaliangmi ara’na tu indo’na sola ambe’na, apa Nakuan Yesu, kumua, da napokadai tu apa mangka dadi moi lako misa’ duka tau.