Read Toraja-Sa'dan LUKAS 9 Bible Online

LUKAS 9 - Toraja-Sa'dan bible

LUKAS 9

¹Natambaimi Yesu tu anak gurunNa sangpulo dua sirampun, Nabenni kamatotoran la ungkuasai mintu’ deata masussuk sia la umpasoro’ mintu’ saki.

²Nasuami umpatale’ ParentaNa Puang Matua sia umpamaleke to masaki;

³sia Nakua lako: Da mibaa apa-apa lako lalan, ke malekomi, da mibaa tekken ba’tu kandu’, da mibaa kande ba’tu doi’, sia da miden umbaa sambu’ sida’dua.

⁴Umba-umba banua minii kendek, torrokomi dio, anna dio minii male pole’o.

⁵Minda-minda tu tae’ natarimakomi, iammi sun lan mai kota iato, pentambakanni tu barra’-barra’ dio pala’ lentekmi, tanda sa’bi salana tu tau.

⁶Sangmaleammi ma’lele-lele lan lu mintu’ tondok umpatale’ kareba melo sia umba-umba nii to masaki, napamaleke.

⁷Narangimi Herodes, datu sangtepona tondok, tu mintu’ penggauran Napogau’ Yesu, pussakmi penaanna, belanna nakua tau pira: malimbangunmo tu Yohanes dio mai to’ to mate.

⁸Sia nakua tau pira: saemo tu Elia; sia nakua tau senga’: ba’tu umbannamo misa’ tu nabi tonna to dolo tuo sule namalimbangun dio mai to’ to mate.

⁹Nakuami Herodes: Mangka kuta’takki ulunna tu Yohanes, mindara ia te kunii urrangi kumua susi a’ganna to? Undaka’mi tangnga’ datu la morai untiroI.

¹⁰Iatonna sule nasangmo tu rasulu’, nauleleammi lako Yesu tu mintu’na mangkanna napogau’ sola nasangi. Nasarakki misami Yesu tu rasulu’, Nasolanni lako tondok disanga Betsaida.

¹¹Iatonna issanmi to buda, sangundiammi urrundu’I. Natarimai Yesu sia Nauleleanan lako tu diona ParentaNa Puang Matua sia Napamaleke tu sipatunna siamo dipamaleke.

¹²La lambunmo allo, nasangsaean tu anak gurunNa sangpulo dua umpellambi’i, nakua lako: Umbai melo ke Mikuammi tu to buda namale, anna loo tama tondok, sia dio lu to’ banua salian tiku lao undaka’ inan sia kande, belanna iate kita te indeki’ mai to’ kasalanna.

¹³Nakuami Yesu lako: Kamumo umpakandei. Mebalimi anak gurunNa: Sa’bamora roti lima na bale da’dua inde, sangadi ke malekan unnallianni kande te tau pada to.

¹⁴Belanna umbai den limangsa’bu tau tu muane. Nakuami lako anak gurunNa: Suai unno’ko’ sirampun-rampun silimangpulo tu tau, ke sangtorroanoi.

¹⁵Napogau’mi anak gurunNa susito; nasua nasang unno’ko’ tu tau mintu’.

¹⁶Naalami Yesu tu roti lima na bale da’dua. Namentingara langngan langi’ sia massambayang, Namane untepu-tepui, Nabenni anak gurunNa, anna patorroi dio tingayona to buda.

¹⁷Kumandemi sola nasangi, sadia’na. Naalami tau tu roti sesanna tu mangkanna ditepu-tepu sangpulo dua baka ponno.

¹⁸Den pissan tonna torro misa tu Yesu massambayang sia anak gurunNa dio duka sola, Nakutanaimi tu anak gurunNa. Nakua: NasangaRa’ minda to buda?

¹⁹Mebalimi nakua: Yohanes Pa’dio’, sia den tu kumua: Elia; den pole’o tu kumua: ba’tu umbannamo misa’ tu nabi tonna to dolo tuo sule namalimbangun dio mai to’ to mate.

²⁰Nakuami Yesu lako: Apa iake kamu misangaRa’ minda? Mebalimi Petrus nakua: Mesias lu dio mai Puang Matua.

²¹Napakai’timi sia Napakare’na-re’na tongan Yesu, kumua da napokadai tu iannato moi lako misa’ duka tau.

²²Nakua: Iatu Anak rampan dilino manassa tae’ nasalai tang la umperasai buda parri’ sia la naali’ mintu’ pekaamberan sia pangulu to minaa sia pandita Sura’ sia la dipatei, na allo ma’pentallun Nadipamalimbangun sule dio mai to’ to mate.

²³Sia nakua ungkuanni sola nasangi: Minda-minda la morai urrundu’Na’, la ussa’biangan kalena sia unnendekan kayu pea’ta’na keallo-keallo undi urrundu’Na’.

²⁴Belanna minda-minda la morai ungkatirinnai katuoanna, iamo la kapa’dean katuoan, apa minda-minda tu kapa’dean katuoanna tu belanna Aku, iamo la ungkatirinnai.

²⁵Apa apara napomaupa’ tau, moi susinna naassangi tu mintu’na lino, apa kapa’dean ba’tu karugian penaanna?

²⁶Belanna minda-minda ungkasirisanNa’ sola kadangKu, ia dukamo la Nakasirisan Anak rampan dilino, ke saeI nakabu’ kamala’biranNa sia kamala’biranNa Ambe’Na sia mintu’ malaeka’ madatu.

²⁷Apa tonganna tongan Kukua mati’, den ba’tu pira-pira tu to bendan inde te tae’ nala sikita kamatean, ke tae’pi nakita ParentaNa Puang Matua.

²⁸Den pissan umbai karuamo allona lendu’na tonna pokadai to, Nasolammi tu Petrus na Yohanes na Yakobus, Nakendek langngan misa’ tanete la massambayang.

²⁹Marassanmo massambayang namembali tu rupanNa sia iatu pakeanNa mabussang pandillak-dillak.

³⁰Pakalan denmi da’dua tau Nasipa’kada-kadan, iamo Musa na Elia,

³¹tu bu’tu situang kamala’biranna sia umpokada-kadai tu diona katappuranNa, tu la Napamangka dio Yerusalem.

³²Apa iatu Petrus sia iatu to nasolan tikapipimo, belanna tikkaru’du’ tonganmo; iatonna pana’dingmo, natiromi tu kamala’biranNa sia da’dua tau Nasolan ke’de’.

³³Iatonna soro’mo tu tau da’dua dio mai Kalena, nakuami Petrus lako Yesu: O, Guru! melo ke indemiki’ te! kigaragamora lantang tallu, misa’ Kamu, misa’ Musa, misa’ Elia. Apa tae’ bang naissanni tu apa napokada.

³⁴Iatonna ma’kada susito, saemi sangleon gaun unnonganni; mataku’mi tonna male tama gaun.

³⁵Narangimi tu gamara lan mai gaun, nakua: Manassa Iamo Anak Kutonno’ te, perangii.

³⁶Iatonna den tu gamara iato Yesu mannamo misa-misa. Napa’loko-lokoi bangmi sola tallui, sia tae’ bang misa’ naulelean lako to senga’ tonna iato tu diona penggauran mangka natiro.

³⁷Iatonna masiangto, tonna mengkalaomo dao mai tanete, budami tau sae umpellambi’i Yesu.

³⁸Denmi misa’ tau lan mai tu to buda metamba nakua: O Guru! Kupalaku la Mitiroampa’ dikka’ anakku, belanna pakamondona anak dio kaleku.

³⁹Nataba deata, nata’pa melalla-lalla, napopa’lisu sarongi, anna pambura pudukna sia kamma-kamma natang umparadanni napandasa tongan.

⁴⁰Kupalakumo lako anak gurumMi, Puang, la urrambai sun, apa tae’ nakullei.

⁴¹Mebalimi Yesu, Nakua: E, bati’ to tang ma’patongan sia to leko’ penaanna, sangapa pole’Pa’ la ussisolangkomi sia la umpama’tanangkomi penaa? Baai tu anakmu mai.

⁴²Iatonna la saemo napandasami deata masussuk napopa’lisu sarongi. Apa Nasarabai Yesu tu deata masussuk, Napamalekei tu pia, Namane umbenni ambe’na sule.

⁴³Iatu tau sola nasangi tirambanmi penaanna untiroi tu kakapuanna kuasanNa Puang Matua. Iatonna mangnga bangmo sola nasangi tu diona mintu’na Napogau’ Yesu, Nakuami Yesu lako anak gurunNa:

⁴⁴Patananni talingammi te kada iate: Belanna iatu Anak rampan dilino la disorong lako tau.

⁴⁵Apa tae’ naissanni te kada iate, sia napusa’i, iamo pole’ natae’ natandai, sia mataku’ umpekutananni lako tu kada iato.

⁴⁶Nasipakkaimi tinde anak gurunNa tu diona kakapuan ba’tumbannai kapua.

⁴⁷Nadoloimi Yesu tu lanna penaanna tinde tau, Naalai misa’ tu pia’-pia’ Napareke’i lako Kalena,

⁴⁸Namane kumua lako tau iato mai: Minda-minda untammui tu pia’-pia’ susite diona sangangKu, ia dukamo untammuiNa’ sia minda-minda tu untammuiNa’, ia dukamo untammui tu To ussuaNa’ belanna iatu bitti’na lan te kamu sola nasang, iamo kapuana.

⁴⁹Mebalimi Yohanes lako, nakua: O Guru! Untirokan tau misa’ urrambai deata masussuk tete dio sangamMi, angki gagai, belanna tae’ kisisola undi urrundu’Komi.

⁵⁰Nakuami Yesu lako: Da migagai, belanna iatu to tang unneakomi, iamo solami.

⁵¹Tonna la ullambi’mi tu allo la dinii umpakala’bi’ Yesu, ma’palulakomi, la male lako Yerusalem.

⁵²Nasuami tu pesuanNa dolo. Malemi tinde tau natama dio misa’ tondok to Samaria, la umparandananNi inan pa’bongian;

⁵³iatu tau iato tae’ natarimai tu Yesu, belanna ma’palulako Yerusalem.

⁵⁴Iatonna tiromi anak gurunNa, iamotu disanga Yakobus na Yohanes, tu iannato, nakuami: O Puang! Mieloranraka angki sua api mengkalao dao mai langi’ la ummangsanni tu tau?

⁵⁵Messailemi Yesu, ussarabai sola duai.

⁵⁶Pakalan namalemo lako misa’ tondok senga’.

⁵⁷Iatonna matangngamo lumingka, denmi misa’ tau ma’kada lako Yesu susite: La moraina’ undi urrundu’Komi, moi umba-umba Miola male.

⁵⁸Nakuami Yesu lako: Io, apa sindallung ia den sia lo’ko’na sia mintu’ manuk-manuk den duka serangna, na Anak rampan dilino Ia tae’ bang inan Nanii ussurrukan ulunNa.

⁵⁹Nakuami lako to senga’ misa’: Undiko urrundu’Na’! Nakuami tu tau: O Puang! La messimanpa’ angku laopa umpeliang ambe’ku dolo.

⁶⁰Nakuami Yesu lako: Da’ito na to matemora umpeliang to matena, malemoko ria umpatale’ ParentaNa Puang Matua.

⁶¹Nakua pole’omi misa’ tau senga’: O Puang! la undina’ urrundu’Komi; apa la messimanpa’ kulaopa dolo umpokadanni to dio banuangku.

⁶²Nakuami Yesu lako: Tae’ misa’ tu to untoe tengko, namessaile-ile, la den patunna lako ParentaNa Puang Matua.