Read Toraja-Sa'dan PA’TOLE 1 Bible Online

PA’TOLE 1 - Toraja-Sa'dan bible

PA’TOLE 1

¹Inde sia tu kada mangka napokada Musa lako mintu’ to Israel sambalinna lu Yordan, lan padang pangallaran, dio Araba-Yordan, tu sitingoan Suf, dio alla’na Paran na Tofel, Laban, Hazerot sia Di-Zahab.

²Iatu lalan dio mai Horeb lu lako ma’buntunna Seir sae lako Kadesh-Barnea, kalingkan sangpulo misa allona.

³Lan taun ma’patangpulo tonna bulan ma’pessangpulo misa lan allo bunga’na bulan iato, ma’kadami tu Musa lako to Israel susi tu mintu’ Napepasanan PUANG lako kalena diona tau iato mai,

⁴tonna mangkamo untaloi tu Sihon, datu to Amori, tu ma’tondok dio Hesbon, sia Og, datunna Basan, tu ma’tondok dio Astarot, dio Edrei.

⁵Na sambalinna lu Yordan, lan padang Moab randukmi tu Musa umpa’peissananni tu Sukaran aluk iate sia ma’kada nakua:

⁶Iatu PUANG, Kapenombanta, ma’kadamo lako kaleta dio Horeb, Nakua: Silasamo masainna to minii torro inde te sikandappi’ buntu iate.

⁷Ke’de’mokomi ammi male ma’palulako ma’buntunna to Amori sia lako tu to nasikandappiran, lan Araba-Yordan, dao Ma’buntunna, diong, Padang Mengkadiongna, dio Padang lo’na lu sia dio biring tasik, — tondok to Kanaan, sia lako Libanon sae lako salu kapua, iamotu salu Efrat.

⁸Manassa la Kusorongangkomi tu tondok iato, tamamokomi, ammi alai tu tondok, tu Naallu’mo PUANG umpalao sumpa lako nene’ to dolomi, Abraham, Ishak na Yakub, kumua la Naben lako tau iato sola bati’na.

⁹Tonna attu iato angku ma’kada lako kalemi, kumua: tae’ kubelai misa-misa umpassan tanggungan la ungkaduttu’komi.

¹⁰Iatu PUANG, Kapenombammi umpamakambanmokomi, sia manassa totemo makambanmokomi susito bintoen dao langi’.

¹¹Narangngannimira PUANG, Kapenombanna nene’ to dolomi, pessangsa’bu pada bilangammi totemo sia Napamasakkemorokomi, susitu Naallu’ lako kalemi.

¹²Umbara kukua naaku manna ma’din umpassanni tu kamasussammi, tu passanammi sia iatu kara-karami?

¹³Pamanassami dio mai sukummi tu to kinaa, to matarru’ sia to paissan, angku tappui dadi pangulummi.

¹⁴Mebalimokomi, ammi ma’kada mikua: Melo to, tu mipa’petimbangan.

¹⁵Iamoto angku tambai tu pangulunna sukummi, iamotu to kinaa sia to paissan, angku tappui dadi pangulummi, iamotu kamandangna to sangsa’bu, to saratu’, to limangpulo sia to sangpulo, sia mantari’na sukummi.

¹⁶Sia attu iato kupepasanan lako to ma’paolai salummi, kumua: Tananni meloi talinga te kara-kara nasialla’i siulu’mi sia ra’ta’ maloloi tu kara-kara nasialla’i patomali, ba’tu iatu siulu’na ba’tu to sae misisolan.

¹⁷Lan pa’paolaian salu da mipelindo tau; la pada miperangii tu to bongko ba’tu to la’bi’ moi misa’ tau da mikataku’i, belanna iatu pa’paolaian salu Kapenomban umpoissanni. Iatu kara-kara magasa lako kalemi, la mibaa lako kaleku, angku perangii.

¹⁸Attu iato kupepasanan lako kalemi tu mintu’ apa sipatu la mipogau’.

¹⁹Attu iato anta ke’de’ dio mai Horeb sia talendu’i tu padang pangallaran malona’ sia metakuran, tu mangka mitiro, ma’palulako padang ma’buntunna to Amori, susitu mangka Napepasanan PUANG, Kapenombanta, lako kaleta, anta rampo lako Kadesh-Barnea.

²⁰Pakalan ma’kadamo’ lako kalemi kukua: Rampomokomi lako padang ma’buntunna to Amori, tu la Nabenki’ PUANG, Kapenombanta.

²¹Manassa PUANG, Kapenombammu, ussorongi te tondok iate lako kalemu, ke’de’moko, ammu alai, susitu Napokadammoko PUANG, Kapenombanna nene’ to dolomu; da mumataku’ sia da mutiramban.

²²Attu iato mengkareke’ nasangkomi lako kaleku ammi ma’kada kumua: Melo ke tasuai ba’tu pira-pira tau dolo, la umparessangki’ tu tondok iato sia la umpaissanniki’ tu lalan sipatu taola sia iatu mai kota la tarampoi.

²³Iatu iannate melo dio pentiroku. Iamoto kupilei sangpulo dua tau dio mai sukummi, simisa’ tau ke misa’oi suku.

²⁴Ke’de’mi tu tau iato, natuka’ langngan ma’buntunna, narampo rokko lombok Eskol, anna paressai.

²⁵Naala dukami tu bua kayunna tondok iato, nabangki’. Naparampoan dukaki’ kareba dio mai, sia ma’kada nakua: Iatu tondok la Nabenki’ PUANG, Kapenombanta, melo.

²⁶Apa manokakomi male lako, sia mibali tu parentaNa PUANG, Kape- nombammi.

²⁷Ma’paropo’komi lan tendami sia ma’kada kumua: Belanna Nakabiri’ki’ PUANG, iamoto Nasolangki’ lan mai tondok Mesir anNa sorongki’ tama kuasanna to Amori sia Nasanggangki’.

²⁸Umbara la takua kendek langngan? Napabonnongmo siulu’ta tu penaanta nakua: Iatu tau dio mandu kapua sia malangka’ na kita, iatu mai kota kapua sia ditambakuku malangka’ langngan langi’, sia tatiro duka dio tu to Enak.

²⁹Ma’kadana’ lako kalemi kukua: Da mima’parondo sia da mikataku’i tu tau iato.

³⁰Iatu PUANG, Kapenombammi, tu undoloangkomi, Ia la umparariangkomi situru’ tu mintu’ apa mangka Napogaurangkomi dio pentiromi lan Mesir,

³¹sia lan padang pangallaran, tu minii untiroi, umba Nakua tu PUANG, Kapenombammi, ussompokomi, susitu tau ussompo anakna, dio mintu’ lalan miolai, sae lako saemi inde te.

³²Apa moi susito tu kadangku, tae’ duka mipatonganni tu PUANG, Kapenombammi,

³³tu undoloangkomi dio lu lalan la undakarangkomi inan, tu minii ma’tenda: ke bongi lan to’ api la umpatiroangkomi tu lalan umba sipatu miola, sia ke allo lan to’ gaun.

³⁴Iatonna rangimi PUANG tu kadammi, Sengkemi, anNa umpalao sumpa Nakua:

³⁵Manassa moi misa’ te bati’ kadake iate tae’ na la untiroi tu tondok melo, tu umpalaoNa’ sumpa umpokadai la ungkamaseanni nene’ to dolomi,

³⁶sangadi iatu Kaleb, anakna Yefune; manassa tau iato la untiroi, ondongpi lako kalena la Kunii ussorongi tu tondok iato, tu nalesemo, sia lako anakna, belanna kalebumo penaanna unturu’ PUANG.

³⁷Ia duka tu aku Nasengkeimo’ PUANG belanna kamu, anna ma’kada Nakua: Iko duka tae’ mula tama dio.

³⁸Iatu Yosua, anakna Nun, tu tontong umpengkaolaiko, la rampo dio; pamatoto’i belanna iamo la umpogau’i tu mintu’nato, anna ketaa mana’ tu to Israel.

³⁹Iatu anakmi tu bitti’pa, tu mipokada a’ganna, kumua la dipopangrampa, — sia iatu mintu’ anakmi muane, tu tang untandaipa melo sia kadake, manassa la rampo dio, ondongpi lako kalena la Kunii ussorongi sia la napoapamo.

⁴⁰Apa iatu kamu, balikkomi la ke’de’ lako padang pangallaran, ma’palulako tasik Teberau.

⁴¹Attu iato mebalikomi sia ma’kadakomi lako kaleku, kumua: Kasalammokan umbali PUANG. La ke’de’mokan parari situru’ tu mintu’ Napepasanan PUANG, Kapenombangki, lako kaleki. Pantankomi untakin pa’bunomi, belanna misanga maraa tu ungkendekki ma’buntunna.

⁴²Apa ma’kadami tu PUANG lako kaleku Nakua: Pokadanni tau iato kumua: Da mike’de’ parari, belanna tae’ Kula dio lu kalemi, kumua da natalokomi ualimmi.

⁴³Sia ma’kadana’ lako kalemi, apa tae’ miperangii, sangadi pabali-balikomi umbali parentaNa PUANG; matampo penggaurammi sia kendekkomi langngan ma’buntunna.

⁴⁴Pakalan tassu’mi tu mintu’ to Amori, tu umpa’tondokki ma’buntunna, umpessitammuikomi, anna ula’komi susito enoan, sia natalokomi dio Seir sae lako Horma.

⁴⁵Attu iato sulemokomi tumangi’ dio oloNa PUANG, apa tae’ Naperangiikomi PUANG sia tae’ Natanannikomi talinga.

⁴⁶Iamoto mitorro masai dio Kadesh; ba’tu sangapa-apa allona minii torro dio.