Read Toraja-Sa'dan PA’TOLE 13 Bible Online

PA’TOLE 13 - Toraja-Sa'dan bible

PA’TOLE 13

¹Iake denni misa’ nabi tunannang dio lu kamu ba’tu misa’ to mangimpi, anna paissanniko misa’ tanda kalle-kallean ba’tu misa’ tanda mangnga,

²anna dadi tu tanda kalle-kallean ba’tu tanda mangnga iato, tu mangkako napokadan, nakua: la taturu’mo tu kapenomban senga’, tu tae’pa mutandai, anta penombaimi —

³da muperangii tu kadanna nabi ba’tu to mangimpi iato, belanna iatu PUANG, Kapenombammi, untobakomi la untandai, kumua ba’tu la ponnoi penaammi sia kalebu deatammi ungkamali’i tu PUANG, Kapenombammi.

⁴La mituru’ tu PUANG, Kapenombammi, sia mikataku’, sia la mikaritutui tu pepasanNa sia la miperangii tu kadanNa, iamotu la mipenombai sia la’ka’komi lako.

⁵Apa iatu nabi ba’tu to mangimpi iato manassa la dipatei, belanna naada’imoko memboko’ dio mai PUANG, Kapenombammu, tu ussolangko lan mai tondok Mesir sia ullendokangko dio mai inan munii dipokaunan, — la umpasepangko dio mai lalan, tu Napepasanan PUANG, Kapenombammu lako kalemu la muturu’i. Susimoto la munii umpa’dei tu apa kadake dio lu kamu.

⁶Iake nanaran buniko siulu’mu, tu nadadian indo’mu, ba’tu anakmu muane, ba’tu anakmu baine, ba’tu baine kalemu, ba’tu sangmane tongan-tonganmu, nama’kada nakua: Tamalemo umpenombai kapenomban senga’, tu kapenomban tang mutandaipa la iko la nene’ to dolomu,

⁷iamotu deata naala bilanganna bangsa untikuikomi, mandappi’na ba’tu mambelanna, dio mai randan langi’ sae lako randan langi’,

⁸da muturu’i tu pa’poraianna, ba’tu umperangii kadanna; da mukamasei ba’tu ungkasayangi sia da musamboi tu salana.

⁹Apa manassa la mupatei; iko dolo la umpata’pai limammu sia umpatei, namane limanna mintu’ bangsa.

¹⁰La mutumbui batu, anna mate; belanna undaka’mo lalan umpopemboko’ko dio mai PUANG, Kapenombammu, tu mangka ussolangko lan mai tondok Mesir, lan mai inan munii dipokaunan.

¹¹Attu iato narangi mintu’ to Israel, anna mataku’ sia tae’mo natolei la umpogau’ kakadakean susito dio lu kamu.

¹²Iake murangimi lan sala umbanna misa’ kota, tu la Nabenko PUANG, Kapenombammu, la munii torro, ma’kadami tu tau nakua:

¹³Den tu to kadake bu’tu dio lu kamu, tu umpopemboko’i tu to umpa’tondokki kotana, ma’kada nakua: Tamalemo umpenombai kapenomban senga’, tu tae’pa mitandai —

¹⁴attu iato la muparessa melo sia la mupekutanan tongan; iake tonganni sia manassa, kumua den apa megallian dipogau’ dio lu kamu,

¹⁵manassa la muparampoi bassi mataran tu pa’tondokanna kota iato sia ussabu’i bassi mataran kota iato sola mintu’ issinna sia iatu mai patuoanna.

¹⁶Iatu mintu’ pangrampa la murampun dio tangngana tana lapang, sia la muballa tu kota iato sola mintu’ pangrampa, dipopemala’ ditunu pu’pu’ lako PUANG, Kapenombammu; iamotu la tontong daun lauan sae lakona sia tae’mo nadibangun pole’.

¹⁷Moi misa’ duka apa tu dipa’pemalii tae’ nama’din le’ke’ dio limammu, kumua Napamerei PUANG tu kare’dekan ara’Na, sia Napa’petiroan tu pa’kamaseanNa lako kalemu, Naka- maseiko sia Napopemba’ka’ko, susitu Naallu’ lako nene’ to dolomu Napa- laoan sumpa.

¹⁸Ianna susito, muperangii tu gamaranNa PUANG, Kapenombammu, ammu turu’i tu mintu’ pepasanNa, tu kupapassanangko totemo, ke mupogau’i tu apa malolo dio pentiroNa PUANG, Kape- nombammu.