Read Toraja-Sa'dan PA’TOLE 14 Bible Online

PA’TOLE 14 - Toraja-Sa'dan bible

PA’TOLE 14

¹Kamumo tu anakNa PUANG, Kapenombammi; da mitori’-tori’i tu kalemi, ba’tu miku’ku’i tu beluakmi dio kidemi belanna kamatean.

²Belanna iatu iko misa’ bangsa masero dio PUANG, Kapenombammu, sia iatu iko Natonno’ko PUANG kumua ammu dadi bangsa marimbanganNa Puang dio mai mintu’ bangsa, tu untorroi kuli’na padang.

³Da mukande len moi misa’ apa megallian.

⁴Inde sia tu olo’-olo’ ma’din mikande iamotu sapi, domba sia bembe’,

⁵donga, kijang, anuang, bembe’ lampung, tangali, sapi laki lampung sia domba lampung.

⁶Mintu’ olo’-olo’ tu ma’kasapak kalungkungna — iamotu tipa’dua kalungkungna — sia lenga’ dio lu olo’-olo’, iamoto tu ma’din mikande.

⁷Apa inde sia tu olo’-olo’ lenga’ ba’tu tipa’dua kalungkungna tae’ nama’din la mikande, iamotu unta, kalinti sia kalinti to’ batu, belanna moi anna lenga’, apa tae’ natipa’dua tu kalungkungna; manassa la maruttak to lako kalemi.

⁸Sia ia duka tu bai, belanna moi natipa’dua tu kalungkungna, apa tae’ nalenga’; maruttak to lako kalemi. Iatu duku’na tae’ mila ungkandei sia da mikaka’i tu batang rabukna.

⁹Inde sia tu ma’din mikande tu mintu’ apa kepenaa diong to’ uai, iamotu mintu’ apa kekaa-kaa sia kesissik, ma’din mikande to,

¹⁰apa da mikandei tu tae’na nakekaa-kaa, ba’tu kesissik; maruttak to lako kalemi.

¹¹Mintu’ manuk-manuk masero ma’din mikande.

¹²Apa inde sia tu tae’ mima’din la ungkandei, iamotu langkan maega, langkan, sia langkan tasik,

¹³tengnge’, pa’bulan sia mintu’ kadoya sanda rupanna;

¹⁴kadoya kapua sanda rupanna;

¹⁵burung unta, totosik, manuk-manuk tasik sia mintu’ tarru’ sanda rupanna;

¹⁶langau to’ batu, langau sia langau mabusa;

¹⁷kayo, alo sia koro’-koro’;

¹⁸tambolang ballau sia mintu’ tambolang sanda rupanna, dora’ na ledo.

¹⁹Sia ia duka tu mintu’ olo’-olo’ pandiu, tu kepani’ — iamoto tu maruttak lako kalemi, tae’ nama’din dikande.

²⁰Iatu mintu’ manuk-manuk masero ma’din mikande.

²¹Da mikande batang rabuk; ma’din mupakandean to sae, tu torro lan babangan kotamu, ba’tu ma’din mubaluk lako to salian bangsa, belanna ikomo tu misa’ bangsa tu masero lako PUANG, Kapenombammu. Da mutollo’i tu anak bembe’ laki lan to’ pangandu’na indo’na.

²²Iatu mintu’ bura padang, tu muambo’, dio pa’lakmu, ke taunoi, la mupennoloan tu taa sangpulona.

²³La mukande dio oloNa PUANG, Kapenombammu lan inan tu Napilei, la Napannii sanganNa, tu taa sangpulona bura padangmu, uai anggoro’ ba’rummu sia minna’mu, sia anak pa’bunga’na sapimmu sia anak pa’bunga’na dombamu sia bembe’mu, kumua ammu pelada’i ungkataku’ PUANG, Kapenombammu, lan mintu’ allo katuoammu.

²⁴Iake tarru’ mambelai tu lalan muolai, muurungan tae’ mukullei umbaai tu iannato, belanna iatu inan tu Natonno’ PUANG, Kapenombammu, la Napannii sanganNa, mambela tongan dio mai kalemu, ke Napamasakkeko PUANG, Kapenombammu,

²⁵manassa la mubalukan bang, na iatu doi’ allinna la mubaa, ammu male lako inan, tu la Natonno’ PUANG, Kapenombammu.

²⁶Sia iatu doi’ iato la muallian mintu’ apa muporai, iamotu sapi ba’tu domba sia bembe’ ba’tu uai anggoro’ ba’tu pangiru’ mepamalango, ba’tu iatu apa muporai, sia la kumandeko inde to dio, dio oloNa PUANG, Kapenombammu, sia parannu-rannuko, la iko la iatu mai to lan banuammu.

²⁷Ia duka tu to Lewi, tu torro lan babangan kotamu, tae’ ammu la ussa’bianganni, belanna tae’ apa mipoapa ba’tu mipotaa mana’ sola.

²⁸Iake upu’mi sitallung taun la mubaa tu mintu’ taa sangpulona tu bura padangmu lan taun iato, ammu patorroi lan to’ babanganmu.

²⁹Attu iato la sae tu to Lewi, belanna tae’ apa mipoapa sia mipotaa mana’ sola sia iatu to sae sia pia biung sia baine balu, to torro lan babangan kotamu, la kumande sadia’na — anNa pamasakkeko PUANG, Kapenombammu, lan mintu’ pengkarangan, tu mukarang.