Read Toraja-Sa'dan PA’TOLE 18 Bible Online

PA’TOLE 18 - Toraja-Sa'dan bible

PA’TOLE 18

¹Iatu to minaa to Lewi, iamotu mintu’ suku Lewi, tae’ apa napoapa ba’tu napotaa mana’ sola to Israel; la nakande tu taana dio mai pemala’ pantunu dipemalaran lako PUANG sia dio mai taa mana’na Puang,

²apa dio lu siulu’na tae’ taa mana’na, belanna PUANG tu taa mana’na, susitu mangka Naalluranni Puang.

³Iamote tu taana la napotaa to minaa dio mai pa’tondokan, iamotu dio mai to umpennoloan pemala’ pangrere’, la sapi la domba sia bembe’. Manassa la napa’bengan tau lako to minaa tu pesesena, popona patomali sia tumabangna.

⁴Iatu bua bunga’na gandungmu, sia uai anggoro’ ba’rummu sia minna’mu sia bunga’ bulu dombamu, la musorong nasang lako.

⁵Belanna iatu PUANG, Kapenombammu, umpilei lan mai mintu’ sukummu, kumua anna tunannang dio oloNa PUANG, untoe kamenomban tete dio sanganNa, la ia la iatu mai anakna muane, tontong kiallo-kiallo.

⁶Iake tassu’i tu to Lewi dio mai sala umbanna kotamu lan mintu’ Israel, tu nanii umpatuo rambu, sia male unturu’ lalan inaanna lako inan, tu la Napilei PUANG,

⁷sia untoe kamenomban tete dio sanganNa PUANG, Kapenombanna sia mintu’ siulu’na, to Lewi, tu tunannang dio inan iato dio olona PUANG,

⁸iamoto la napotaa pada taana tu tau dio, tae’ nadipasibilang tu taana dio mai ambe’na, tu mangka nabalukan.

⁹Iake rampomoko tama tondok, tu la Nabenko PUANG, Kapenombammu, da mupelada’i unturu’ gau’ megallianna tu bangsa iato.

¹⁰Da naden misa’ tau dio lu kamu diapparan tu umpatama to’ api tu mai anakna muane ba’tu anakna baine tu umpogau’ kapakita-kitan, to ma’biangi, to umbattuananni tanda, ba’tu to unnampui balik mata,

¹¹to ma’basa-basa, da naden to sola-sola bombo, ba’tu sola-sola deata ba’tu umpalaku pa’pentimbangan lako to mate.

¹²Belanna minda-minda umpogau’i tu apa iate, iamo misa’ to Nakagalli PUANG, sia diona te kamagallian iate, Napobannang PUANG, Kapenombammu, unnula’i tu tau iato mai dio mai tingayomu.

¹³La tang sayuan tu gau’mu dio oloNa PUANG, Kapenombammu.

¹⁴Belanna iate bangsa iate, tu la muula’i, umperangii to ma’biangi sia to pakita-kita, apa lako kalemu tae’ Naeloranni PUANG, Kapenombammu.

¹⁵La Napabu’tuangko PUANG, Kapenombammu, tu misa’ nabi dio lu kamu dio mai siulu’mu, susite aku; lako kalena la minii ma’perangi.

¹⁶Manassa susitu mangka mupalaku lako PUANG, Kapenombammu, dao Horeb, tonna allo kasirampunan, tu munii ma’kada mukua: Tae’mo kula urrangi gamaranNa PUANG, Kapenombangku, sia tae’mo kula untiroi tu api kapua iate, da kumate.

¹⁷Attu iato ma’kada tu PUANG lako kaleku, Nakua: Melo tu apa mangka napokada tau iato mai.

¹⁸La Kupabendanan misa’ nabi tu tau iato dio mai mintu’ siulu’na, susitu iko; la Kupadio pudukna tu kadangKu, sia la napokadan nasang tu apa Kupepasanan.

¹⁹Minda-minda tae’ naperangii tu mintu’ kada, tu la napokada tete dio sangangKu, manassa la Kupa’tuntunni tu tanggunganna.

²⁰Apa iake den misa’ nabi umpamadao penaanna la umpokada misa’ kada tete dio sangangKu, tu tang Kusua umpokadai, ba’tu ma’kada tete dio sanganna kapenomban senga’ — manassa nabi iato la mate.

²¹Iake ma’kadako lan penaammu, kumua: Umbara kikua untandai kada, tu tang Napokada PUANG? —

²²Iake ma’kadai tu misa’ nabi tete dio sanganNa PUANG, anna tae’ nadipalanda’ tu kadanna sia tae’ nabuai, manassa apa iato misa’ kada tang Napokada PUANG. Matampo penaanna tu nabi iato, anna pokadai tu iannato, da mukataku’i tu nabi iato.