Read Toraja-Sa'dan PA’TOLE 20 Bible Online

PA’TOLE 20 - Toraja-Sa'dan bible

PA’TOLE 20

¹Iake la ke’de’ko lao parari ullaoi ualimmu, ammu tiroi tu mai darang sia kareta, iamotu misa’ bangsa mandu buda anna iko, manassa da mukataku’i, belanna iatu PUANG, Kapenombammu, urrondongko, tu ussolangko sun lan mai tondok Mesir.

²Iake tarru’mokomi lao parari, la tassu’ tu to minaa dio tingayomi, anna ma’kada lako to buda, nakua:

³Perangii, e to Israel! Tarru’komi lao parari, ullaoi ualimmi; da naranggang tu penaami sia da mimataku’, da mimagiang sia da mipotirambanni tu tau iato,

⁴belanna iatu PUANG, Kapenombammi den ussisolangkomi la umparariangkomi ullaoi ualimmi, kumua Nabenkomi kapataloan.

⁵Sia la ma’kada tu mai mantari’ lako to buda nakua: Minda tu umbangun banua ba’ru, apa tae’pa nanii? Dieloran male sule lako banuanna, kumua da nasabu’ lan kapararian, sia nanii to senga’ tu banuanna.

⁶Sia minda tu untananni pa’lak anggoro’, anna tae’pa nakandei tu buanna? Dieloran male sule lako banuanna, kumua da nasabu’ lan kapararian, sia nakande to senga’ tu bua anggoro’na.

⁷Sia minda tu sikampamo misa’ baine, natae’pa napobainei? Dieloran male sule lako banuanna, kumua da nasabu’ lan kapararian sia da napobainei to senga’ tu baine iato.

⁸Sia ma’kada tu mantari’ lako to buda nakua: Minda mataku’ sia ranggang penaanna? Dieloran male sule lako banuanna, kumua da napabonnong tu penaanna siulu’na susi penaanna.

⁹Iake naupu’imi mantari’ umpokadai lako to buda tu iannato, la naangka’ tau tu mai kamandang surodadu umpangului tu mai to buda.

¹⁰Iake mureke’i tu misa’ kota la urrarii, la ussitimbangiko kamarampasan.

¹¹Iake napebalii meloko sia nabungkarangko babangan, manassa iatu mintu’ pa’tondokan, tu torro lan, la ma’diama lompo dio kalemu sia la umpengkarangangko.

¹²Apa iake tae’ misikaelo, sangadinna la morai urrariiko, manassa la mutalimbung tama.

¹³Sia la Nasorong PUANG, Kapenombammu, tama kuasammu, ammu pata’pai bassi mataran tu mintu’ muane umpa’tondokki.

¹⁴Sangadinna iatu mintu’ baine sia iatu mai pia, patuoan, sia mintu’ ianan lan kota, mintu’na pangrampa iato la murampan kalemu sia iate apa murampa dio mai ualimmu, tu Nabenko PUANG, Kapenombammu, ma’din mupake.

¹⁵Susimoto la mugauran mintu’ kota, tu mandu toyang dio mai inanmu, tu tang naala bilangan kotana te mai bangsa iate.

¹⁶Apa dio mai kotana te mintu’ bangsa tu la Nasorongangko PUANG, Kapenombammu, la mupotaa mana’, moi misa’ apa kepenaa, da mupatuoi.

¹⁷Sangadinna la musabu’i nasang tu bangsa iato, iamotu to Het, to Amori, to Kanaan, to Feris, to Hewi sia to Yebus, susitu Napasanangko PUANG, Kapenombammu,

¹⁸kumua da naada’ikomi umpogau’i tu mintu’ apa megallian, tu napogauran deatanna, miurungan umpogau’ kasalan umbali PUANG, Kapenombammi.

¹⁹Iake masaiko untalimbung tamai tu misa’ kota ullaoi sirari, la unnalai tu kota iato, da mulellengi uase ummangsanni tu mai to’ kayunna tiku lao, iatu buanna ma’din mukande, apa da mulellengi. Belanna tolinoraka tu to’ kayu dio lu padang, ammu pasangbilanganri to ditalimbung tama?

²⁰Sangadinna iatu to’ kayu mutandai, kumua tae’ nadikande tu buanna, iamoto tu ma’din mumangsanni sia mulelleng, ammu popa’tombonni langngan munii ullaoi tu kota musirarian sae lako musongkanna.